100 мянган айлын орон сууц баригдана

 100 мянган айлын орон сууц баригдана

Нийслэлийн Засаг дарга тэргүүтэй хотын удирдлагууд өчигдөр Барилга, хот байгуулалтын сайд Х.Баделхантай ажил хэргийн уулзалт зохион байгууллаа. Уг уулзалтаар “Харгиа” цэвэрлэх байгууламжийн нөхцөл байдал, Эмээлт болон Налайхын үйлдвэрлэл, технологийн парк байгуулах ажлыг эрчимжүүлэх, иргэдийг орон сууцжуулах ажлыг нэмэгдүүлэх, 100 мянган айлын орон сууц барих болон томоохон төсөл хөтөлбөрүүдийн асуудлаар санал солилцсон юм.

 

Барилга, хот байгуулалтын яам иргэдийг хямд өртөгтэй, чанартай орон сууцаар хангах, орон сууцны нийлүүлэлтийг нэмэгдүүлэх чиглэлд анхаарч, ажиллаж байгаа бөгөөд 100 мянган айлын орон сууц барихаар төлөвлөөд байгаа юм. Уг хөтөлбөрийг Улаанбаатар хотыг 2040 он хүртэл хөгжүүлэх ерөнхий төлөвлөгөөнд нийцүүлэн хэрэгжүүлэх, чөлөөлөгдсөн газраа ашиглах, цаашлаад нөхөн төлбөр олгож иргэдээс газрыг авах, хотоос зайдуу газруудад байгальд ээлтэй дэд бүтцийг нь бий болгож орон сууц барих зэрэг олон хувилбарыг хэрэгжүүлэхээр санал солилцлоо.



Харин түрээсийн орон сууцны санг нэмэгдүүлэх хүрээнд баригдаж буй “Буянт-Ухаа” 2 хорооллын хоёрдугаар ээлжийн 972 айлын орон сууцны бүтээн байгуулалтын ажил дуусаж байгаа бөгөөд ирэх долоо хоногт Засгийн газрын хуралдаанаар эцэслэн шийдвэрлэх юм.

Улаанбаатар хотын шинэ цэвэрлэх байгууламжийн хувьд компаниа сонгож, гэрээгээ байгуулаад байна. Энэ нь урт хугацааны асуудал бөгөөд шинэ цэвэрлэх байгууламж ашиглалтад орох хүртэлх хугацаанд олон жил хуримтлагдсан лагийг үнэргүйжүүлэх, усгүйжүүлэх арга хэмжээ авч байгаа аж.

 
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.