Түрээсийн орон сууцны хөтөлбөр, журам, бүртгэлтэй холбоотой мэдээлэл хийлээ

Түрээсийн орон сууцны хөтөлбөр, журам, бүртгэлтэй холбоотой мэдээлэл хийлээ

Өчигдөр  УИХ-ын Өргөдлийн байнгын хорооны хуралдаан болж, түрээсийн орон сууцны хөтөлбөр, журам, бүртгэлтэй холбоотой асуудлаар иргэдээс ирүүлсэн өргөдлийн дагуу мэдээлэл хийлээ. 2019 онд өргөдлийн байнгын хороонд  нийт давхардсан тоогоор 600 гаруй иргэдээс түрээсийн орон сууцны асуудлаар өргөдөл ирүүлсэн байна.

 

Мэдээллийг Барилга, хот байгуулалтын дэд сайд Б.Мөнхбаатар хийв. Тэрбээр, тус яамны зүгээс ТОСК-ийн захиалгаар 2013-2016 онуудад улсын хэмжээнд 512 айлын орон сууц ашиглалтад оруулсан. Мөн, Буянт-Ухаа 2 цогцолборт 972,  Орхон аймагт 315, Хөвсгөл аймагт 135, Говь-Алтай аймагт 120 айлын орон сууц тус тус ашиглалтад оруулахаар ажиллаж байна. Түүнчлэн, Засгийн газрын 2019 оны 04 дүгээр сарын 10-ны өдрийн хуралдаанаар “Түрээсийн орон сууцыг өмчлүүлэх журам”-ыг хэлэлцүүлж батлуулсан. Уг журам батлагдсанаар иргэд өөрсдийн түрээслэж буй орон сууцыг тухайн орон сууцны эзэмшигчтэй тохиролцон гэрээ байгуулсаны үндсэн дээр 5 хүртэл жилийн хугацаанд нийт төлбөр, эсхүл урьдчилгаа төлбөрийг бүрдүүлж ипотекийн зээлд хамрагдах боломжтой болсон. Түүнчлэн иргэдээс төлсөн төлбөрийг зөвхөн түрээсийн орон сууцны санг нэмэгдүүлэх зардалд зарцуулахаар тусгасан. Цаашид “Түрээсийн орон сууц” хөтөлбөрийн хүрээнд тусгасан төр, хувийн хэвшлийн хамтын ажиллагааны хүрээнд орон нутгийн өмчийн түрээсийн орон сууцны санг нэмэгдүүлж ажиллах. Мөн”Түрээсийн орон сууц” хөтөлбөрийг хэрэгжүүлэхэд шаардлагатай хөрөнгө оруулалтыг улсын төсвөөс гаргах, зайлшгүй зорилтот бүлгийн иргэдийн түрээсийн төлбөрт хөнгөлөлт үзүүлэх боломжийг Халамжийн бодлого хариуцсан төрийн захиргааны төв байгууллагаас судлаж танилцуулах шаардлагатай байна гэлээ.

Бусад мэдээллийн дэлгэрэнгүйг зурагт хуудсаар танилцуулбал,



 

Засгийн газрын дөрөвдүгээр сарын 10 -ны хуралдаанаар түрээсийн орон сууцыг өмчлөх журмыг баталсанаар түрээсийн орон сууцанд амьдарч байгаа иргэд 3-5 жилийн дотор сар бүр тодорхой хэмжээний төлбөр төлөөд, байрны төлбөрийн 30 хувийг бүрдүүлэн, цаашид ипотекийн зээлд хамрагдан байраа өмчлөх, мөн төлбөрийн чадамжтай иргэд урьдчилгаа 30 хувиа төлөөд байраа хувийн үл хөдлөх хөрөнгө болгох боломж бүрдсэн юм.

 
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.