Барилгын салбар хичнээн бэхжинэ улс орон тэр чинээгээрээ хөгждөг

Барилгын салбар хичнээн бэхжинэ улс орон тэр чинээгээрээ хөгждөг

Монгол Улсын гавъяат барилгачин, хурандаа, генерал С.Лувсангомбо гуайд хүндэтгэл үзүүлэх уулзалт Монголын архетикторын эвлэл /МАЭ/ - ийн ордонд өнөөдөр боллоо. Уулзалтад Монголын барилгын салбарыг удирдаж байсан үе үеийн ахмадууд, МАЭ-ийн гишүүд, ахмад архитекторуудын төлөөлөл оролцсон бөгөөд тэрбээр оролцогчидтой барилгын салбарт тулгарч байгаа асуудал, өнөөгийн байдлын талаар яриа өрнүүлэхийн зэрэгцээ зөвлөмж, сургаалиа хайрласан юм. Мөн Монголын түүхэн дурсгалт барилга, музейн барилгуудын чанар аюулгүй байдлыг хангах, тэдгээр барилгын хийц, бүтээцийг сайжруулж, сэргээн засварлах, насжилт, түүхэн үнэ цэнийг өсгөн нэмэгдүүлэх замаар хуучны дурсгалт барилгуудаа хадгалан хамгаалах тухай хөндөж ярьсан юм. Тодруулбал, тэрбээр “Би нутгаасаа гараад 30 гаран жил болжээ. Өнөөдөр ингээд харахад Улаанбаатар хот маань танигдахааргүй болтлоо хөгжиж, олон сайхан барилга баригдсан байна. Мэдээж энэ бүхэн манай уран барилгачдын оргилсон их хүчээр бий болсон гэж бодож байна. Тэгээд ч барилгын салбар хичнээн бэхжинэ, улс тэр чинээгээрээ хөгждөг шүү дээ. Гэхдээ монголчууд бид дэлхийд гайхагдсан түүх, өв соёлтой орон. Иймээс нүүдэлчин соёлоо шингээсэн, давтагдашгүй түүхэн, дурсгалт барилгуудаа сэргээн засварлаж, хадгалан авч үлдэх ёстой. Өндөр шилэн барилга бол дэлхийн хаа саагүй байдаг. Үүнийг та бүхэн бодож, санаж байх хэрэгтэй” хэмээн өгүүлж байсан юм.

Өдгөө 95 настай энэ хүндтэй буурай маань барилга, батлан хамгаалах, байгаль орчин гээд Монгол Улсын хөгжлийн гол, гол салбаруудад бүхий л ажил амьдралаа зориулсан бөгөөд 1959 онд Барилга, барилгын материалын үйлдвэрийн яаманд орлогч сайдаар, 1964 онд Улсын барилгын зөвлөлийн орлогч даргаар, 1968 онд Барилга, барилгын материалын үйлдвэрийн яаманд орлогч сайдаар, 1971 онд Улаанбаатар хотын АДХГЗ-ны даргаар, 1972 онд сайд нарын зөвлөлийн орлогч дарга, 1983 онд НАХЯ-ны сайдаар, 1984 онд сайд нарын зөвлөлийн орлогч дарга, Барилга-Архитектур, техник хяналтын улсын хорооны дарга зэрэг улсын хариуцлагатай өндөр албан тушаал хашиж байсан төр нийгмийн ахмад зүтгэлтэн юм.

Мөн уулзалт өдөрлөгийн үеэр МАЭ-ийн ерөнхийлөгч Э.Хүрэлбаатар одоогоос 5 жилийн өмнө буюу 2014 онд Монголын архетикторын эвлэлээс энэхүү уулзалтыг зохион байгуулж байсан бөгөөд тухайн үед гаргасан шийдлүүдийг өнгөрсөн хугацаанд хэрхэн хэрэгжүүлж, ямар үйл ажиллагаа явуулсан тухайгаа танилцуулсан билээ.  
 
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.