Материалын чанар, зөв сонголт хамгийн чухал цуврал зөвлөгөө №3

Материалын чанар, зөв сонголт хамгийн чухал цуврал зөвлөгөө №3
Амины орон сууцандаа ашиглах материалын тооцоо, сонголтонд дараах зүйлийг анхаараарай.
  1. Материалын орцын норм, зардлыг тооцоолох
Та амины орон сууцныхаа зураг төслийг мэргэжлийн байгууллагаар хийлгэсэн бол мөн төсвийг нь ч  гаргуулах хэрэгтэй. Барилгын төсөвт цалин, материал, тээвэр, машин механизмын гэсэн шууд зардлуудыг тооцдог. Материалын зардлын тооцоог хийхийн тулд
  • Зургаас ажлын тоо хэмжээг бодох
  • Үе шатны ажлуудаар хэрэглэгдэх бүх материалуудын жагсаалтыг гаргах
  • Нэгж ажилд шаардагдах материал, түүхий эдийн орцын нормыг мэдэх
  • Материалын нийт орцыг тодорхойлох
  • Материал нэг бүрийн үнийг судалж, нийт үнийн зардлыг тооцно.
  • Материалын нийт жин, тээвэрлэх зайнаас хамаарч тээврийн зардлыг тооцно.
2. Материалын чанар
Амины орон сууцанд хэрэглэх материалын гарал үүсэл нь тодорхой, холбогдох стандартын шаардлагад нийцсэн, зураг төсөлд заасан анги, маркыг хангасан, тохирлын гэрчилгээтэй, сорилт шинжилгээний үр дүнтэй, хэрэглэх хүрээ нь тодорхой, ашиглах заавартай байх нь чухал. Гадна болон дотор заслын хувьд хүссэнээрээ сонголтыг хийж болох ч үндсэн хана, дээврийн араг бүтээц, хана дүүргэлтэд сайтар анхаарч, чанартай материал авах нь чухал. Иймээс та өөрийнхөө мэдрэмж, сонголтонд тулгуурлан шийдвэр гаргахаас гадна шинэ орчин, өөрчлөлт, чанарыг хүсэж байгаа бол мэргэжлийн байгууллага, хүнээс зөвлөгөө авахад буруутахгүй.
3. Материалын шинж чанарын үзүүлэлт
Материалын физик, механик шинж чанарын үзүүлэлтүүд нь стандартад тавигдах шаардлагыг хангасан байх ба үүнийг итгэмжлэгдсэн лабораторийн сорилт шинжилгээний үр дүн, дагалдах чанарын гэрчилгээнээс мэдэх ба материалын төрлөөс хамаарч шахалтын болон гулзайлтын бат бэх, дулаан тусгаарлалт, хүйтэн тэсвэрлэлт, ус чийг тэсвэрлэлт зэрэг үзүүлэлтүүд чухал байдаг. Байшингийн суурь, хана, хучилтанд хэрэглэх блок, тоосго, бетон, төмөрбетон эдлэлийг бат бэхээр нь (марк), хөлдөлт гэсэлтийг тэсвэрлэх байдлаар нь (хүйтэн тэсвэрлэлт) хэд хэдэн зэрэг болгон үйлдвэрлэнэ. Жишээлбэл, ердийн улаан тоосгыг М50,75,100,125,150 марктай, хүйтэн тэсвэрлэлт нь 25 удаагаас их байхаар үйлдвэрлэх ёстой. Маркийг заасан тоо нь 1см2 гадаргад хүлээж авч чадах хүчийг (кгс) -ээр илэрхийлсэн утга юм.
4.  Байршил, цаг уурын нөхцөл
Зарим төрлийн материалын сонголтыг хийхдээ өөрийн амьдрах орчин, байршил, цаг уурын нөхцөл байдалд тохируулах хэрэгтэй. Ялангуяа барилгын ханын материал, цонх хаалга, фасад, дээврийн материал сонгоход байршил, цаг уурын нөхцөлд тулгуурлаж шийдвэр гаргах хэрэгтэй. Хүйтний эрчмийн бүсээс хамаарсан дцлаан техникийн тооцоог зураг төслийн байгууллагад хийж норм дүрмийн дагуу төсөллөдөг учраас  мэргэжлийн байгууллагаар зураг төслөө хийлгэх нь зүйтэй.
5. Үнэ
Барилгын материал сонгохдоо анхаарах бас нэг гол хүчин зүйл нь материалын үнэ. Та олон  газруудад өөр өөр үнэтэй бүтээгдэхүүн харах боловч хамгийн хямдыг эсвэл үнэтэйг нь сонгох тийм ч оновчтой сонголт биш. Харин худалдан авалт хийхдээ материалын үндсэн шинж чанарын үзүүлэлтүүд, эдэлгээ, зориулалт, хэрэглэх хүрээ, ашиглах заавар, орцын норм зэргийг судалж шийдвэрээ гаргаарай.
6. Нийлүүлэгчийг сонгох
Материалын нийлүүлэгчийг зөв сонгох нь хамгийн чухал. Олон газраар явж цаг хугацаа, ажлаа алдсанаас чанартай материалыг нэг дороос үйлдвэрийн үнээр, орцын тооцоогоо хийлгүүлэн, дагалдах чанарын гэрчилгээтэй нь авах боломж бий. Буцаад буух эзэнтэй, албан ёсны нийлүүлэгч сайн бүтээгдэхүүнийг санал болгож, таны сонголтыг зөв чиглүүлж өгдөг. Амины сууцанд хэрэглэх гол нэрийн барилгын чанартай материалыг нэг дороос үйлдвэрийн үнээр нийлүүлдэг, барилгын материалын цахим худалдан авалтын системийг нэвтрүүлж байгаа “Барилгачин групп” Мишээл барилгын их дэлгүүрийн 2-р давхарт ажиллаж байна.
Амины орон сууцанд хэрэглэдэг гол материалуудын талаар товчхон мэдээллийг хүргэж байна.
  1. Цемент
Цемент нь MNS 974-2008 стандартын шаардлага хангасан, барилгын даацын бүтээцэд хэрэглэх цемент 42.5 ангийн шаардлага хангасан байна.
Цементийг 28 хоногийн дараах шахалтын бат бэхээр нь 32,5; 42,5; 52,5; 62,5 гэсэн ангид хуваана. Цементийг 3, 28 хоногийн дараах бат бэхээр нь ердийн, хурдан бэхжилттэй (R) гэж ангилна. Барилгын үйлдвэрлэлд бүрдүүлэгчийн орцоор нь ангилсан PC42,5- портландцемент, OPC42,5- эрдэс нэмэлттэй портландцементийг ихэвчлэн хэрэглэж байна. Цементийн марк, төрөл, үйлдвэрлэсэн огноо, хадгалах хугацаа, үйлдвэрлэгчийн нэр, стандартын дугаар, жинг  уутан дээр, задгайгаар нийлүүлэх үед дагалдах чанарын гэрчилгээнд бичсэн байна. Цементийг үйлдвэрлэснээс хойш 60 хоногийн дотор хэрэглэхээр тооцож хадгална. Хэрэв энэ хугацаанаас хэтэрвэл цементийн идэвхжил буурч, чанарт нь өөрчлөлт ордог. Уутанд савлах үндсэн хэмжээ 50 кг байх ба бусад хэмжээгээр савлах үед савлагааны жинг хаяглалтад заавал бичнэ. Савалгаа нь бүрэн бүтэн, урагдаж цоороогүй, хадгалах хугацаа нь дуусаагүй, зөв хадгалсан, хатуураагүй цементийг сонгож аваарай.
2. Элс, хайрга дайрга




Бетонд хэрэглэж буй элс, хайрга, дайргыг дүүргэгч материал гэнэ. Дүүргэгч нь бетоны эзэлхүүний 80-85 хувийг эзэлдэг. Бетонд 5-70 мм хэмжээтэй хайрга, дайргыг хэрэглэнэ. Хайрганы ширхэг бөөрөнхийдүү хэлбэртэй, мөлгөр гадаргуутай, голын сайраас авч хэрэглэдэг. Дайрганы ширхэг өнцөгт, шоо хэлбэртэй барзгар гадаргуутай уулын чулуулаг юм. Өргийн зуурмагт 2мм-ээс ихгүй ширхэгтэй элсийг хэрэглэнэ. Элс, хайрга, дайрга нь  бохирдол, тоос шорооны хольцгүй байх, ширхэглэлийн бүрэлдэхүүн, нимгэн үзүүрлэг хэсгийн хэмжээ, хэврэг хэсгийн агуулга, бат бэх, марк зэрэг  үзүүлэлтээрээ стандартын шаардлага хангасан байх ёстой. Элс нь MNS 0392:2014, хайрга нь MNS 0346:2000 стандартын шаардлага хангасан байх ёстой.

3. Бетон

Эрдсэн буюу органик барьцалдагч материал, ус, жижиг ба том дүүргэгчийг тодорхой харьцаагаар тооцон авч, хольцыг нэг төрлийн найрлагатай болтол хольж зуураад хэвэнд цутгаж, нягтруулан ердийн болон уурын орчинд бэхжүүлсэний үр дүнд гарган авсан зохиомол чулуун материалыг бетон гэнэ. Бетоныг нягтаар нь онцгой хүнд- 2500 кг/м3 –ээс их, хүнд – 1800-2500 кг/м3 , хөнгөн – 600- 1800 кг/м3, онцгой хөнгөн – 600 кг/м3 –ээс бага, барьцалдуулагч материалын төрлөөр нь цементэн, царууц, гөлтгөнөт, шааргат, полимерцементэн ба полимербетон, тусгай зориулалтын бетон гэх мэт ангилна. Амины орон сууцны суурийг хүнд бетоноор цутгана. Мөн давхар дундын буюу зоорийн хучилтанд энэ төрлийн төмөр бетон хавтанг хэрэглэж болно. Бетоныг 28 хоногийн дараах шахалтын бат бэхээр нь: В7.5 (М100), В10 (М150), В15 (М200), В20 (М250), В25 (М350), В30 (М400) гэх зэрэг ангилдаг. 1-2 давхар амины орон сууцны барилгын сууринд В10 (М150), В15 (М200), ангийн бетоныг, бетон шаланд В7.5 (М100)-г, давхар дундын хучилтанд В15 (М200) ангийн бетоныг ихэвчлэн хэрэглэдэг.
БНбД81-95-12 Барилгын төсөв зохиох зааврын 4-р хавсралтад бетон зуурмагийн жишиг дараах задаргааг  заасан байдаг.

4. Арматур



Төмөрбетон бүтээц эдлэлийн шахалтын бүсийн бетоныг хүчитгэх, суналтын хүчийг хүлээн авах зориулалтаар арматурыг хэрэглэнэ. Арматурыг бүтээцэд хэрэглэх нөхцөлөөр нь ажлын, угсралтын, хувиарлагч арматур гэж ангилна.
Арматурыг үйлдвэрлэсэн байдлаар нь:
  • Халуунаар цувисан шилбэн арматур
  • Хүйтнээр татаж сунган халуунаар бэхжүүлсэн утсан арматур
Гадаргуугийн байдлаар нь: иржгэр ба гөлгөр
Хэрэглэх аргаар нь: урьдчилан хүчитгэсэн ба ердийн гэж ангилдаг.
Арматурыг ОХУ-А, БНХАУ-HRB, Mонгол-MNS JIS G3112-2002 стандартаар SR, SD гэж тэмдэглэж байна.
Арматур нь барилгын зураг төсөлд заасан анги, төрөл, маркийн шаардлага хангасан, тохирлын гэрчилгээ, сертификаттай байх, барилгын даацын бүтээцэд хэрэглэх арматур нь MNS JIS G 3112-2002 стандартын SD390 төрлийн, ОХУ-д үйлдвэрлэгдсэн арматур бол А400 /А-III/ ангилалын,  БНХАУ-ын арматур бол HRB 400 ангилалын шаардлагыг хангасан байх ёстой.

5. Өргийн материал
Ханын өрөгт хэрэглэх тоосго, гулдмайн эзэлхүүн жин, шахалтын бат бэх, хүйтэн тэсвэрлэлтийн үзүүлэлт нь стандартын шаардлага хангасан эсэх, тохирлын баталгаанд хамрагдсан эсэхийг тус тус магадлаж худалдан авах хэрэгтэй. Тоосго нь ердийн, өнгөлгөөний, царууц, галд тэсвэртэй тоосго зэрэг төрлүүдтэй. Ердийн тоосгоны стандарт хэмжээ 250х120х65мм байдаг. Тоосгыг худалдан авахдаа гүйцэд шатсан эсэхийг шалгах хэрэгтэй. Хэвийн шаталттай тоосго жигд улаан өнгөтэй, өнцөг булан нь эмтрээгүй, ан цавгүй байх ёстой. Дутуу шатсан тоосгыг барьж үзэхэд хүндэвтэр, өнгө нь цайвар байх ба ус их шингээдэг тул бат бэх чанараа алдах нөхцөл бүрддэг.
Сүүлийн үед автоклавын хийт бетон гулдмай /хөнгөн блок/-г ханын материал болгон өргөнөөр ашиглаж байна. Автоклавын хийт бетон гулдмайг барилгын бүх төрлийн даацын болон даацын бус хана, дотор хана, дулаан болон дуу тусгаарлах хана, зоорийн давхар болон хөрсний түвшинээс доошхи ерөнхий хэрэглээнд, гал тусгаарлах хэсэгт ашиглах зориулалттай байдаг.

6. Зүсмэл модон материал


Амины орон сууцанд зүсмэл модон материалыг өргөнөөр ашиглаж байна. Балк нь хуурай нойтон, нарсан, хар модон гээд олон төрөл бий. Модны төрлийн хувьд хар мод удаан эдэлгээтэй тул нуруу, багана тулгууруудад ашиглавал сайн байдаг. Балкыг хөндлөн огтлолын талбай нь 15х15, 20х20см байхаар зүсч бэлтгэдэг. Зүсмэл банзыг заавал хатаасан байна. Зүсмэл банзыг 1,0-6,5м урттай, зузаан нь 13-100мм, өргөн нь 60-200мм байхаар үйлдвэрлэж байна. Модон материалыг өмхрөлт, чийг, хөрсний уснаас хамгаалах хэрэгтэй.
 
Канад технологийн сууцны банз буюу SPF, үйлдвэрээсээ ус чийгний тусгай хамгаалалттай, үйлдвэрлэгчийн нэр шошготой, зориулалт хэмжээтэйгээ зах зээлд гардаг. Канад банз нь урт, өргөн ялгаагүй ширхэг бүр дээрээ тамгатай байдаг. Үйлдвэрийн аргаар маш нарийн хатаан боловсруулсан эдгээр банзуудыг ангилахдаа 2 болон түүнээс дээш гэсэн зэргийг Канад барилгад голлон хэрэглэдэг. Япончуудад зориулсан “J” зэрэг байдаг ба энэ нь яр багатай холтосгүй, дээд зэргийн банз юм. Мөн ОХУ, БНХАУ-д үйлдвэрлэгдсэн зүсмэл материалуудыг хэрэглэж байгаа ба чанар сайтайг нь сонгож аваарай.
 
7. Зоргодсон хавтан буюу OSB

Боловсруулсан зоргодсон хавтан буюу OSB хавтан (Oriented Strand Board) нь маш өндөр даралт болон температурт шахаж бэлтгэсэн байгалийн гаралтай барилгын модон материал юм.
OSB хавтанг ус даах чадвар болон нягтралаар нь 4 ангилдаг.
  1. OSB-1- бат бэхийн үзүүлэлт багатай, ус даах чадвар сул, хуурай нөхцөлд дотор засалд, тавилга хийх зорилгоор ашиглана.
  2. OSB-2- бат бэх сайтай, ус даах чадвар багатай тул хуурай нөхцөлд дотор хананы өнгөлгөө, хучилтанд ашигладаг.
  3. OSB-3- өргөн хэрэглэгддэг ба бат бэх сайтай, ус чийгэнд тэсвэртэй тул гадна ханын өнгөлгөө, даацын хийцэд, чийгтэй орчин, ариун цэврийн өрөөнд хэрэглэхэд тохиромжтой.
  4. OSB-4- өндөр бат бэхтэй, нягтрал сайтай ус чийгийг сайн тусгаарладаг тул  барилгын гадна өнгөлгөө, даацын бүтээцэд, чийглэг ихтэй бүс нутагт өргөн хэрэглэнэ.
 Хамгийн өргөн хэрэглэгддэг OSB хавтангийн хэмжээ нь 2,44х1,22 м байдаг.
OSB хавтангийн хувьд манай зах зээл дээр борлогдож буй Канад, “EGGER”, БНХАУ-ын “Bao Yuang” хавтангууд чанараараа тэргүүлдэг.
 
8. Дулаалгын материал


Барилгын гадна ханын болон хашлага бүтээцийн дулааныг хэвийн горимд барих, дулаан тусгаарлах зорилгоор 20°С температурт 0,175Вт/(м°C)-с ихгүй дулаан дамжуулалтын итгэлцүүртэй байх нөхцөлийг хангасан материалыг дулаан тусгаарлах материал гэнэ. Дулаан тусгаарлах материалыг хэрэглэснээр барилгын жинг хөнгөрүүлэх, өртгийг хямдруулах, ханын зузааныг нимгэрүүлж, дулааны энергийг хэмнэдэг.
Орчин үед шилэн хөвөн, чулуун хөвөн, хөвөн даавуу, целлойд, EPS ба XPS хөөсөн полистирол хавтан, полиуретан, вермикулит, перлит, мод ургамлаас гаралтай мяндас (олс, маалинга, хөвөн, үйс гэх мэт), сүрэл, шар шавар, хонины ноос зэрэг олон төрлийн дулаалгын материал хэрэглэж байна. Дулаан тусгаарлах материалуудын хувьд стандарт болон зураг төсөлд тавигдах шаардлага, эзэлхүүн жин, бат бэхийн үзүүлэлтийг хангасан байх ёстой.
“Rockwool” буюу эрдэс чулуун хөвөнг модон карказан барилгын дулаалгад хамгийн өргөн хэрэглэдэг. Уг материал нь хүний биед хоргүй, эрс тэс уур амьсгалтай манай орны нөхцөлд хэрэглэх боломжтой экологийн цэвэр бүтээгдэхүүн юм. Энэ нь уулын чулуулгийг зууханд өндөр температурт шатааж, шөрмөслөг бүтцэд шилжүүлж, синтетик холбогчтой хольж гарган авсан өндөр зэрэглэлийн эрдэс хөвөн юм. Мөн дуу чимээг маш сайн шингээдгээс гадна галд тэсвэртэй материал учраас галын эсрэг хамгаалалт болгон ашигладаг. Энэхүү чулуун хөвөн нь барилгын хийцүүд (хана, хучилт, дээвэр хамар хана), шугам хоолой, инженерийн системийн дулаан тусгаарлагч гээд олон зориулалтаар хэрэглэгдэж байна.

9.Цонх, хаалга  


 Орчин үеийн амины орон сууцны загварын чиг хандлагад шалнаасаа тааз хүрсэн том шилэн цонх давамгайлж байна. Манай орны нөхцөлд өвлийн улиралд -40 С хүртэл хүйтэрдэг учир цонх, хаалга болон тэдгээрийн амалгаа хэсгээр дулаан их алдагдагддаг. Иймд хаалга, цонхоор дулаан алдагдаад эхэлбэл хэчнээн сайн халаалтын систем, тусгаарлагч сайтай хана байгаад хэрэггүй. Хуванцар (PVC) цонх, хаалга нь дулаан техникийн үзүүлэлт, зураг төслийн шаардлага хангасан байх, цонх, хаалганы хуванцар хүрээ 5-аас дээш тасалгаатай, 70мм-ээс дээш өргөнтэй, шилэн багцны битүүмж стандартын дагуу хийгдсэн, нугас, түгжээ, резин жийрэг нь чанартай, хүрээний уулзварын наалт зай завсаргүй, шилэн багцны шил хоорондын зай 16мм-ээс дээш үзүүлэлт бүхий цонх, хаалгыг хэрэглэх нь зүйтэй.



Бүх талаараа төгс материал гэж байхгүй, тухай бүрдээ өөрсдийн давуу ба сул талтай.Барилгын материалыг сонгохдоо үндсэн шинж чанарын үзүүлэлтүүд нь стандартын шаардлага хангасан эсэх,  тохирлын гэрчилгээтэй, зураг төсөлд заасан шалгуурыг хангасан, хэрэглэх хүрээ, зориулалт нь тодорхой, хаяг шошго нь  тавигдах шаардлагын дагуу, хаана үйлдвэрлэсэн нь тодорхой, хадгалах горим нь зөрчигдөөгүй байх зэрэгт анхаарлаа хандуулаарай, материалын зөв сонголт чанар дагуулна гэдгийг санаарай.
 
























 
Эх сурвалж: Barilga.mn

Сэтгэгдэл (2)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

    зочин 2019-05-07 11:35 43.242.241.210

    ок
    зочин 2019-05-07 11:35 43.242.241.210

    ок