Монголын анхны өвлийн спортын ордон баригдаж эхэллээ

Монголын анхны өвлийн спортын ордон баригдаж эхэллээ

Дэлхийн стандартад нийцсэн иж бүрэн цогцолбор "Мөсөн өргөө" спортын ордны шав тавих ёслол боллоо. Энэхүү ордон "Буянт-Ухаа-2" хорооллын замын эсрэг талд "Шинэ Яармаг" хороололд баригдах юм. Төслийг “Степпе Арена” ХХК санаачилсан бөгөөд компанийн удирдлагууд спортын ордныг 16 сарын дотор ашиглалтад оруулахаар эрчимтэй ажиллана гэдгээ хэлсэн юм. Харин  "Мөсөн өргөө"-ний зураг төслийг "Анаграм" ХХК   боловсруулж байгаа юм байна.
“Мөсөн өргөө” ордон нь 5700 м.кв ашиглалтын талбайтай, 2,600 хүртэлх үзэгчийн суудалтай, олон улсын олимпийн хорооны стандарт хэмжээс болох 60м-30м мөсөн гулгуурын талбайтай юм. Мөн хөгжлийн бэрхшээлтэй иргэдэд зориулсан зам, талбайтай гэдгээрээ онцлог төдийгүй Хойд америк, Европын орнуудад өргөн ашиглаж буй мөсөн талбайн зориулалтын хөргөлтийн төхөөрөмж, агаар сэлгэлтийн системтэй байх юм. Монголын анхны мөсөн өргөө баригдсанаар хоккейн үндэсний шигшээ баг бэлтгэл, сургуулилтаа хийж, уран гулгалт, шорт трейкийн тэмцээн уралдаан зохион байгуулагдах боломжтой болох төдийгүй  сагсан бөмбөг, гар бөмбөг, уран сайхны гимнастик, бокс зэрэг бусад төрлийн спортоор хүүхэд, залуучууд хичээллэх боломж нээгдэх юм. Зөвхөн спортын арга хэмжээгээр хязгаарлагдахгүй соёл урлагийн арга хэмжээ, тоглолтод зориулан хөрвөн өөрчлөх боломжтой байхаар төлөвлөжээ.

Барилга угсралтын ажил 2020 оны долоодугаар сард дуусах ба мөн оны наймдугаар сарын эхээр Монгол Улсын Ерөнхийлөгчийн ивээл дор Улаанбаатар хотноо зохион байгуулагдах “Азийн хүүхдүүд” олон улсын хүүхдийн спортын их наадмын уран сайхны гимнастик, ширээний теннис, таэквондогийн тэмцээнийг тус ордонд  зохион байгуулагдах юм.

Шав тавих ёслолын үеэр Монгол Улсын Ерөнхийлөгч Х.Баттулга “50 метрийн урттай усан бассейн, 10 мянган хүний суудалтай хөл бөмбөгийн  талбай энд нэмж байгуулагдана” гэдгийг онцолж байсан юм.

 
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.