Зочны өрөөгөө өөрчлөхийг хүсвэл эхлээд өнгөө зөв сонгоорой

Зочны өрөөгөө өөрчлөхийг хүсвэл эхлээд өнгөө зөв сонгоорой
Зочны өрөө гэдэг гэрийн хамгийн хүндэтгэлтэй хэсэг бөгөөд тухайн айлын өнгө төрхийг  илэрхийлдэг гэдэгтэй маргах хүн үгүй биз ээ. Сүүлийн үед зочны өрөөний өнгө төрх тод, хурц элементүүдийг багтаасан, байгалийн чимэглэлүүдээр гоёх чиг хандлагатай болсон. Иймд зочны өрөөгөө өөрчлөхийг хүсвэл хамгийн түрүүнд өнгөө зөв сонгох хэрэгтэй юм. Интерьерийн ойлголтын хамгийн том ухагдахуун нь ч өнгөний тоон харьцаа байдаг. Үүнийг тодорхойлсноор орон зайн бүтцийг бий болгодог юм. Жишээлбэл, жижиг өрөөний өнгөний тоог хязгаарлаж, голлох өнгөндөө бусад тавилга, чимэглэлүүдээ захируулж, булангийн зөөлөн гэрэлтүүлэг хэрэглэснээр өрөөний хязгаарыг өргөсгөж өрөөг илүү орон зайтай харагдуулдаг. Хэтэрхий эрээн мяраан өнгө нь бага орон зайд тохиромжгүй.



Түүнчлэн эсрэгээр хэт том орон зайг өөрчлөхийн тулд нэг өнгийн интерьерээс зайлсхийх хэрэгтэй. Цагаан өнгө цэмцгэр байдлыг билэгддэг. Мөн идэвхтэй, гоёмсог, хөнгөн, цовоо байдлыг бий болгодог бөгөөд гэрлээс шалтгаалаад хүйтэн эсвэл дулаан харагддаг гэдгийг мартаж болохгүй. Харин хар өнгө нь уйтгартай, харанхуй, айдас зэргийг илэрхийлдэг боловч маш хүчтэй өнгө юм. Энэ өнгийг ямар ч дизайнд дангаар нь хэрэглэвэл уг зүйлээ тодорхой, сайн илэрхийлж чаддаг. Хэрвээ та зочны өрөөгөө модерн загвартай болгохыг хүсдэг бол хар, цагаан өнгийг хослуулахыг зөвлөж байна. Гэхдээ цагаан өнгийг түлхүү ашиглавал тухайн орон зайг уужим болгож харагдуулдаг давуу талтай. Харин ногоон өнгө хүсэл мөрөөдөл, эрүүл мэнд, залуу нас, өсөлт дэвшлийг билэгддэг. Мөн харааны эрхтэнг бага цуцаадаг. Тэр тусмаа цайвар ногоон өнгө намуун, тайван уур амьсгалыг үүсгэх ба сэтгэл санааг өргөдөг юм.



Өрөөнийхөө голлох өнгийг сонгосны дараа тавилгаа зохицуулбал дулаахан бас илүү зохицолтой харагддаг. Сүүлийн үед хүмүүс нүсэр том тавилгаас татгалзаж, аль болох зай бага эзлэх, сонин, содон дизайнтай, тод өнгөтэй тавилгуудыг сонгох болсон. Энэ нь өрөөг уужим, зайтай харагдуулахаас гадна бага насны хүүхэдтэй айлд хүүхдийг тоглож наадахад нь амар байдаг.
Гэрийн тавилга үнэтэй бас чамин байх албагүй бөгөөд гагцхүү эзний сэтгэлд нийцсэн, тав тухтай, чанартай байх шаардлагатай. Зочны өрөөнд цэвэр модоор хийсэн буйдан байвал илүү зохимжтойгоос гадна арьсан эсвэл толбо болохооргүй материалаар бүрсэн байх нь цэвэр орчинг бүрдүүлж өгдөг.



Сүүлийн үед хулсаар хийсэн тавилгыг хэрэглэх нь их болсон. Учир нь, хулсаар хийсэн тавилга энгийн хэрнээ гайхалтай харагдаж, жинхэнэ байгалийн өнгө төрхийг бүрдүүлдэг билээ. Зочны өрөөний бас нэг чухал зүйл нь аксессуар. Үүнд, хивс, хивсэнцэр, зураг, цэцэг, гэрэл зэрэг элементүүд багтана. Гэхдээ хивс, хивсэнцэр нь зочны өрөөний голлох өнгөтэйгээ зохицож байх хэрэгтэй бөгөөд хананд гэр бүлийн эсвэл орчин үеийн уран зураг, хуулбар зургууд зэргийг гоёмсог хүрээнд хийж өлгөвөл хоосон байсан хана шинэчлэн өөрчлөгдөж халуун дулаан уур амьсгалыг бүрдүүлж чаддаг. Үүнээс гадна таримал цэцэг  өрөөндөө тавих нь эерэг энергээр дүүргэж, байгалийн мэдрэмжийг төрүүлдэг. Дашрамд сонирхуулахад, арчлахад хамгийн амархан ургамал нь хулс юм. Нөгөө талаар хулс аз жаргалыг билэгддэг бөгөөд гоёмсог шил эсвэл вааранд хийгээд зочны өрөөнд байрлуулбал гайхалтай харагдана гэдэгт та итгэлтэй байж болно.


Өрөөний нийт талбайн хэмжээнд тохирсон хэмжээтэй, аль болох тод өнгийн буйдан сонговол зочны өрөөг халуун дулаан уур амьсгалтай болгодог. Харин өөрийн болон гэр бүлийн гишүүдийнхээ хүсэл сонирхлоос хамааран янз бүрийн хэлбэр дүрс, хэв маяг бүхий дэрнүүдээс сонгон буйдангаа чимэглээрэй. Хэрэв танайх бага насны хүүхэдтэй бол үлгэрийн баатруудын дэрээр, өсвөр насны хүүхдүүдтэй бол Instagram, facebook-ийн хэв маягийг агуулсан дэрнүүдээр гэрээ чимж болно. Мөн өөрийн хүсэлтээр өрнийн болон дорнын уур амьсгалыг дэрээр дамжуулж зочны өрөөндөө бий болгож болно.
Зай ихтэй өрөөнөөс илүү зай муутай өрөө нь хүний зан байдалд сөрөг нөлөө үзүүлдэг. Тэр тусмаа хаалттай, зайгүй, давчуу мэдрэмжийг төрүүлдэг хүчин зүйлүүд нь намхан тааз, нарийн зай, жижиг цонх, байгалийн гэрэл муу, бүгчим халуун өрөө эсвэл тавилга ихтэй буюу эд хогшлууд нь чөлөөтэй орон зайг дүүргэсэн байдал юм. Ялангуяа ийм байдал зочны өрөөнд илүүтэй ажиглагддаг гэдгийг анхаарах хэрэгтэй шүү.


Зочны өрөөний интерьерийн голлох хэсгийн нэг нь хөшиг юм. Түүнийг ханын цаас, шалны өнгө, тавилгынхаа хэв маягтай зохицуулна гэдэг санасны зоргоор бүтэх амар ажил  биш. Эн тэргүүнд бодолцох зүйл бол өрөөний зохион байгуулалт. Том том цонхтой цэлгэр өрөөнд хөшиг онцын ач холбогдолгүй байдаг бол хар бараан өнгийн ханатай жижигхэн өрөөнд тод цагаан хөшиг өлгөвөл өрөөг уудам мэт сэтгэгдэл төрүүлнэ. Хэрвээ классик буюу сонгодог стилийг сонирхдог бол цацаг, хээ угалзтай, зузаан материалтай хөшгийг сонгох нь зүйтэй. Хэрвээ энэ хэв маяг танд таалагдахгүй бол юуны түрүүн зочны өрөөндөө сэтгэл татам, зөөлөн, дулаан уур амьсгалыг төрүүлэхийн тулд хананы өнгөтэй уусч байхаар тооцон хөшгөө сонгоорой. Эцэст нь хэлэхэд хөшгийг зөвхөн хэрэглээ талаас нь бус чимэглэл, интерьер талаас нь бодолцох хэрэгтэйг сануулъя.
    
Эх сурвалж: Barilga.mn

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.