“Ахуйн бохирдлыг боловсруулан ашиглах технологи”-ийг аврах гарц мөн үү?

 “Ахуйн бохирдлыг боловсруулан ашиглах технологи”-ийг  аврах гарц мөн үү?
Олон нийтийн цахим сүлжээгээр утаа, хөрсний бохирдол, хог хаягдлыг нэгэн дор шийдэх шинэ технологийг монгол хүн амжилттай туршиж, агаарын бохирдолд  дарлуулж,  аргаа барсан ард иргэдэд  хонгилын үзүүрт гэрэл асав уу гэх  итгэлийн оч өгсөн нэгэн постыг уншигч та магадгүй санаж буй биз. Тус постны доор 14.000 хол давсан коммент, 22 мянган лайк, 13 мянган шэйр хийснээс харахад  монголчууд бид амьд явах эрхэд минь заналхийлж байгаа өнөөдрийн нөхцөл байдлыг сайжруулахын тулд  хэн хүнгүй гарц гаргалгаа эрэлхийлж, тэмцэж буйн нэг хэлбэр бизээ.  Найман жилийн уйгагүй судалгаанд үндэслэж,  “Ахуйн бохирдлыг боловсруулан ашиглах технологи” буюу / АББАТ/ төхөөрөмжийн хөгжүүлэлт, сайжруулалтаа хийж дуусаад туршилт хэрэгжүүлэлтийн шатанд авч яваа эрхэмийг Ц.Ариунбат гэнэ.  Тэрээр MEGAWOOD компаний захирал бөгөөд утаа уушгинд хэрхэн нөлөөлдгийг бие сэтгэлээрээ мэдэрсэн учир дээрхи шийдлийг илэрхийлж судалгаа шинжилгээний ажлаа эхлүүлсэн нь өнөөдрийн үр дүнд хүргэсэн байна.


Барилга.МН сэтгүүлийн хамт олон хэвлэн нийтлэх эрх үүргийнхээ дагуу / АББАТ/ төхөөрөмжийн талаар болоод нүүрс, хог хаядлаас гаргаж авсан хийгээр халаах боломжтой орчин үеийн хоёр өрөө амины орон сууцны талаар мэдээ мэдээлэл авахаар MEGAWOOD компаний захирал,  төсөл санаачлагч Ц.Ариунбаттай уулзан ярилцах гээд зорьж очсон боловч хойшлуулж болошгүй уулзалттай байсан учир тус компаний менежер Ж.Баяраатай уулзан ярилцсан юм.


АББАТ төхөөрөмж нь нүүрстөрөгч агуулсан органик бодисыг хүчилтөрөгчгүй орчинд өндөр температураар маш богино хугацаанд дулааны задралд оруулж, өндөр нэгдэлт молекулуудыг задалж, бага нэгдэлт молекулт бодис болгох процес  юм. Ингэснээр нийлмэл байсан бодисууд дан дан бүтцээр салж хий, шингэн, хатуу биет гэсэн гурван хэсэгт хуваагддаг байна.  Үүний дараа төхөөрөмжийн турбин руу бүгд холилдон орж, шингэн нь дахин задралд орж, хийн төлөвт шилжиж, гурван төрлийн бодис хатуу болон хий болж, хийтэй дагалдах хорт бодис болох хүхэр бусад диоксинуудыг шохой болон бусад уусмалаар шүүн угааж, бэлэн бүтээгдэхүүн болгоно. Харин хатуу үлдэгдэл нь турбины ажлын горимоос шалтгаалж, их бага нь тодорхойлогддог ба  гарсан хатуу үлдэгдлийг хөвүүлэн баяжуулалт буюу флотаци хийж хоосон эрдэс үнснээс нь коксыг хөөсрүүлэн ялгаж авдаг аж.
Шингэн кокс нь маш цэвэр түлш бөгөөд шаталтаас ямар ч утаа хорт бодис ялгарахгүй бөгөөд байгалийн хий шатааж байгаатай адил юм. Экологийн шинэ төрлийн түлш гэж хэлж болохоор гэнэ.
Мөн Налайх, Багануурын нүүрснээс өндөр илчлэгтэй шатдаг хий гарган авах туршилтыг хийхэд амжилттай болж, төв цэвэрлэх байгууламжаас шингэн болон хатсан лаг авчирч, хий гаргаж шинжлүүлж, улмаар бидний  дахин боловсруулж чаддаггүй  ахуйн хатуу хог хаягдлаас хий гарган авч харьцуулан дүгнэхэд бүгд сайн үр дүн үзүүлжээ.
Хог хаягдал, лаг, нүүрс ер нь органик нэгдэл бүхий бүх төрлийн түүхий эдийг боловсруулдаг уг төхөөрөмжөөс 400 орчим ширхэгийг суурилуулахад Улаанбаатар хот утаа, хог, хөрсний бохирдол, модон жорлон, шороон замаасаа салах бөгөөд  500 айлын дунд нэг АББАТ тавигдах ба 500 айлыг 10 хэсэгт 50 айлаар хувааж дунд нь дэд бүтцийг нь холбох бүрэн боломжтой гэсэн тооцоолол гарчээ.  Нүүрс хогонд дагах үнс шороо зэргийг нь замын хавтан болгож ашигладаг нь уг төхөөрөмж 100 хувийн ашиглалттай гэдэг нь харагдаж байгаа аж.
 
                     Өртөгт нийцсэн дулааны хэмнэлттэй сууц
 
MEGAWOOD компаний хамт олон 2016 оноос эхлэн модон бүтээгдэхүүний цогцолбор үйлдвэр барьж ашиглалтад оруулахаар ажиллаж байгаа аж. Нийт 12 мянган метр квадрат талбайтай үйлдвэр ашиглалтад орсноор ОСП хавтан МДФ хавтан үйлдвэрлэхээс гадна угсардаг орлогод нийцсэн хувийн орон сууц үйлдвэрлэж, хувийн сууцанд шаардагдах тавилга тухайлбал шал, хаалга, ор, хувцасны шүүгээ, гал тогооны тавилга зэргийг нэг дор үйлдвэрлэж, хямд өртөгтэй, дулаан алдагдал бага сууцуудыг  үйлдвэрлэж нийлүүлэх төлөвлөгөөтэй байгаа гэнэ. Ингэхдээ нийт 36 төрлийн загварын байшингаас захиалагчийг сонголт хийлгэх боломжоор хангаж,   шалны болон нарны халаагууртай инженерийн бие даасан дэд бүтцийн шийдэлтэй, байхаас гадна нэг сууцыг угсрахад  найман хүний бүрэлдэхүүнтэй 5-6 цаг зарцуулж, нарийн хэмжигдэхүүний дагуу угсрах хэв маягийг баримталж чанартай орчин үеийн дэд бүтэц нь шийдэгдсэн ухаалаг зохион байгуулалттай бүрэн тавилгатай байрыг өөрийн болгох боломж нөхцөл бүрдэх гэнэ.
Манай сэтгүүлийн хамт олон 45 мкв 2 өрөө амины орон сууцны загварын байранд ороод MEGAWOOD компаний захриал Ц.Ариунбат болоод түүний зорьсон хүссэндээ эргэлзээгүй итгэдэг, нүүрлэн ирэх олон асуудлын төлөө цаг наргүй хичээнгүйлэн ажиллах үнэнч ажилтан, албан хаагчдаар үнэхээр бахархах сэтгэл төрж байснаа нуух юун.
Шинийг сэтгэгчдийн нуруун дээр хорвоогийн хөгжил урагшилдаг гэдэг. Нэг хүн нийтийн эрх ашгийн төлөө цаг зав, оюун ухаан, хөрөнгө мөнгөө зориулж найман жилийн тэртээ толгойд нь  торойх санаа төдий байсан зүйлийг бодит болгож,  өөрчлөлт шинэчлэлтийг авчрах гарааны шугаманд ирсэн байгаа нь яахын аргагүй бахархууштай үйл явц юм.
Утаа тортог, хог, хөрсний бохирдол, модон жорлонгоос  салах  өртөгт нийцсэн тус сууцын ашиглалтын талбай, интерьерийн шийдэл нь анхаарал татахаас гадна дулааны хадаглалт, сэлгэлт, зоорийн давхарын ашиглалт цэвэр бохир усыг шийдэж болох септик зэрэг нь үнэхээр ухаалаг шийдэл болж чадсан нь харагдаж байлаа. Шалны халаалтаас гадна нарны дулаанаар давхар халдаг тус сууцыг монгол хүний амжиргааны дундаж түвшинд тохируулж урьдчилсан байдлаар 30 саяын өртөгтэй босгосон байгаа бөгөөд үйлдвэр ашгилтанд орсоноор өртөг илүү нарын гарна. Зочны өрөө, гал тогооны хэсэг, унтлагын өрөө, ванн нойлын өрөө гэх мэт зохион байгуулалттай тус сууцыг зусланд, хөдөө орон нутагт  гээд  хаана ч барьж болохоор аж.  
 

Олон Улсын үзэсгэлэн яармагуудад идэвхитэй оролцож, Монголын барилгын салбарын нэр хүндийг өргөн авч явдаг шинийг сэтгэгч хамт олны нэгэн төлөөлч болох Ж.Баяраа  нийгэм, цаг үе, амьдрах орчин ийм байхад бид зогсох эрхгүй гэж хэлсэн нь тус байгууллагын алсын хараа, зорилго чиглэл, сахилга бат,төлөвлөгөөт ажлын цар хүрээг харуулж буй хэрэг биз ээ.  Шийдлийг олохын тулд шинээр хар гэсэн үг бий. Та бүхний шинэлэг бөгөөд содон санаа энэ цаг үеийн аврах гарц байгаасай хэмээн ерөөгөөд  энэ удаагийн сурвалжлагаа өндөрлөе.
Эх сурвалж: Barilga.mn

Сэтгэгдэл (1)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

    nmj 20 өдрийн өмнө 66.181.160.1

    Болж байна. баяр хүргэе. 1 мкв хэд орчимд гарах вэ?