Барилгын салбарын тулгамдаж байгаа асуудал нь барилгын салбарын асуудлаа тодорхойлж, эрэмблээгүйд байгаа юм

Барилгын салбарын тулгамдаж байгаа асуудал нь барилгын салбарын асуудлаа тодорхойлж, эрэмблээгүйд байгаа юм
 
    Барилгын салбарт удирдах түвшний ажил эрхэлдэг хоёр эрхмийг оролцуулж, зочид маань сэтгүүлчээс үл хамааран бие биедээ асуулт тавьж, хариулах зарчмаар явагддаг “Амжилтын эзэд юу өгүүлэв” дуэль ярилцлагын булангийн энэ удаагийн зочдоор  “Өрх” ХХК-ны  захирал А.Бат-Од, "Пи Си Ди Пи" ХХК-ийн зураг төслийн удирдлагын газрын дарга А.Энхтуяа нар оролцлоо.

А.Энхтуяа: Он гараад удаагүй байна. Нууц биш бол ирэх жилүүдэд юу төлөвлөн ажиллаж байна вэ?
А.Бат-Од: Компанийн болоод хувийн шинж чанартай маш олон зүйл төлөвлөн  ажиллаж байна. Гэхдээ 2016 оноос хойш барилгын салбар жаахан унасан гэж хэлж болно. Тиймээс зах зээлийн өрсөлдөөнд тэсч үлдэхийн тулд илүү хурдтай, илүү технологижсон, илүү чадавхижсан байх шаардлага зайлшгүй гарч ирж байгаа юм. Датанд суурилсан, шинэлэг зүйлийг эрэлхийлсэн байдлаар ажиллаж байна.
А.Энхтуяа: Хувь хүний хөгжлийн тал дээр ямар төлөвлөгөө байна вэ?
А.Бат-Од: Би сүүлийн үед подкаст их сонсч байна. Энд олон талт эерэг мэдээ мэдээллүүд их байдаг. Ялангуяа хувь хүний хөгжлийн талаарх подкастууд надад эерэг нөлөө их үзүүлж байгаа. Монгол агуулгатай подкастуудыг ихэнх нь гадаадад суралцаж байгаа, суралцаад төгссөн залуучууд хөтөлдөг. Би тэднээс  их зүйл суралцдаг. Мөн эрүүл мэнддээ анхаарч усанд сэлж эхэлсэн. Сэлэхдээ зүгээр сэлэхгүй сэлэхийнхээ өмнө арван англи үг цээжилж, цээжилсэн үгээ сэлж байх үедээ санах гэж хичээдэг. Мөн англи үгээ ашиглан тоглоом тоглодог, флаш карт болгодог, үгээ хэдэн хувьтай цээжилснийг шалгадаг апликэйшн татаад өөрийгөө шалгаад, хөгжүүлээд явж байна.
А.Энхтуяа: Мундаг байна шүү. Би бас сүүлийн үед сонирхолтой номнуудын талаар подкаст сонсч байгаа. Түүнээс “The One thing” буюу “Зөвхөн нэг зүйл” гэдэг ном нэлээн сэтгэгдэл төрүүлсэн бөгөөд нэг зүйлд төвлөрч, тухайн зүйлээ сайжруулах тал дээр анхаарч байгаа. Сайн ба муу зуршлын талаар ямар бодолтой байдаг вэ?
А.Бат-Од: Сэтгэлзүйч Ц.Дэлгэрмэнд 2015 оны “TED Talk” дээр сайн зүйл байнга хийхийг хэвшил  гэнэ. Муу зүйлийг байнга хийхийг зуршил гэнэ гэж тайлбарласан байсан. Дадал гэдэг зүйлийг нэг нэг өдрөөр тасралтгүй хийгээд 28-350 хоног буюу 1-10 сар болоход тухайн зүйлдээ  бие организм болоод  сэтгэл зүй дадаж, хийхэд төвдөхгүй болно гэж уншсан. Тиймээс жилээс жилд бүр сараас сард нэг сайн дадлыг бий болгох гэж хичээж байна.

А.Энхтуяа: Түрүүн та яриандаа өрсөлдөөнд тэсч үлдэх, өрсөлдөх чадавхийн тухай цухас дурдсан. Өрсөлдөхөд мэдээж чадвар хэрэгтэй. Таныхаар ямар байхыг өрсөлдөх чадвартай байна гэж үзэх вэ?
А.Бат-Од: Өрсөлдөх гэдэг үгээр бодохоор тийм ч сайхан сонсголонтой үг биш байж болох ч хүн, байгаль, ан амьтад бүгд л хүссэн хүсээгүй өрсөлдөөн дунд амьдардаг. Байгалийнхаа шалгарлаар унах нь унаад ургах нь ургадаг. Амьтдын хувьд хүчтэй нь хүчгүйгээ барьж иддэг. Харин хүмүүсийн  тухайд  чадалтай нь ялаад чадалгүй нь ялагддаг. Бүх зүйл өрсөлдөөн дунд явагдаж байдаг. Өрсөлдөөн бол өсч дэвшихийн эхлэл.  Тэгэхээр өрсөлдөх чадвартай байна гэдэг нь  хүч болоод хурд, чадвар хийгээд чансаа  байгаагийн нэг илрэл.
А.Энхтуяа: Сонирхолтой хариулт байна. Усан сэлэлтийн спортоор хичээллэж байх явцад заримдаа өөртөө чөлөө өгмөөр, өнжмөөр, сэлмээргүй санагдах үе байсан уу? Тэр үед өөрийгөө хэрхэн сахилгажуулж байсан бэ?
А.Бат-Од: Лектор Г.Мөнгөн саяхны нэг илтгэл дээр хэлж  байсан. “Хүндрүүлж бодох хэрэггүй” гэсэн дүрэм байсан. Өөр дээрээ жишээ аваад тайлбарлах гээд хичээе. Мэдээж бид хүн л юм чинь заримдаа сэлмээргүй санагдах үе гарч ирнэ. Тэр үед өөрөө өөртөө шалтгаан тоочих биш хөнгөн бод гэсэн дүрэм юм. Сөрөг бодол орж ирэх юм бол “ямар  ч гэсэн хувцсаа аваад гаръя, сэлэхгүй байсан ч яахав” гээд хувцсаа аваад гар. Тэгээд хувцсаа аваад гарчихсан юм чинь ажлын ойр байгаа бассейнаараа  шагайгаад  л гаръя гэж бодоод ор. Нэгэнт ороод ирсэн юм чинь 10 минут ч хамаагүй сэлчихээд гаръя гээд сэлэх. Өөрийгөө хэт хүчлэхгүй сэтгэл зүйгээ дасгах, хуурах маягаар хөнгөн бодож, дадал бий болгох арга байсан. Заримдаа ийм арга хэрэглэнэ.  Тэгэхгүй бол бид хэтэрхий хүндрүүлж бодоод олон шалтгааныг яаж ийж байгаад гаргаад ирнэ. Хүйтэн байна. Тиймээс сэлэхээ болъё  гэх мэтээр хүндрүүлж бодвол бие сэтгэл тэгж л удирдагдана шүү дээ.



А.Энхтуяа: Дуртай ч бай, дургүй ч бай нэг зүйлээ төгс эзэмших чухал уу? Эсвэл олон талын мэдлэгтэй байсан нь дээр гэж үздэг үү?
А. Бат-Од: Хоёр талтай. Юм юм сэглэж байхаар нэг зүйлийг төгс эзэмшвэл юу нь муу байх билээ. Хэнийг ч урдаа гаргахгүйгээр ажилдаа гаршссан хүмүүс байдаг. Бас ямар ч баяр жаргалгүй, ял юм шиг ажилладаг хүмүүс байдаг. Саяхан “Unlock” подкастын “Battle Hymm of the Tiger Mother” буюу “Бар ээжийн тулаан” номын тухай сонссон юм. Нэг Хятад ээжийн хүүхдээ хүмүүжүүлсэн тухай ном юм. Хүүхэд нь хийл тоглох дургүй байхад өдөр бүр хийлээ давтаж хоёр цаг хичээллэ гэж шахаж шаарддаг байж. Энэ нь хүүхдэд нь огт таалагддаггүй байж. Ээжийнхээ шахалтаар өдөр бүр давтсаар байгаад тухайн зүйлийнхээ мөн чанарыг ойлгоод дуртай болж, амжилт гарсан тухай  жишээ юм. Гэхдээ хичнээн давтаад ч нөгөө зүйлдээ уусч дурлаж чадахгүй бол өөрийнхөө өгөгдлийг хайж өөрийгөө олох нь чухал. Ер нь бодоод байхад өөрийн чаддаг, ойлгодог зүйлдээ хүн дуртай болж хөгжих магадлал өндөр байдаг байх.

                                    Мэдэхийн хэрээр мэдэхгүй зүйл ихэсдэг.

А.Бат-Од: Эмэгтэй цахилгааны инженер гэхээр зарим хүмүүст их сонирхолтой санагддаг байх. Мэргэжлээ сонгоход хэн нэгэн нөлөөлсөн үү?
А.Энхтуяа: Уг нь би эдийн засагч болно гэж боддог байлаа. Тухайн үед шалгалт өгөөд хуваарийнхаа дагуу санамсаргүй сонгочихсон. Тэр үед яагаад ч юм доороосоо хоёр дахь хуваарийг авна гээд бодчихсон байсан. Тэр нь цахилгааны инженер байсан тэгээд л сонгочихсон. Аав маань инженер хүн байсан болохоор ойрхон ч санагдсан байх. Эхэндээ хичээлдээ дурамжхан байсан ч курс ахих тусам сонирхож эхэлсэн.
А.Бат-Од: Одоо мэргэжилдээ сэтгэл хангалуун байдаг уу? Өөрийгөө олсон гэж боддог уу?
А.Энхтуяа: Би энэ мэргэжлээрээ хоолоо олж идэж байгаа учраас мэргэжилдээ хайртай. Барилгын салбарт нэлээн олон жил ажилласан байна. Гэхдээ хүн мэдэхийн хэрээр мэдэхгүй юм нэмэгддэг юм байна. Сурах, суралцах зүйл их байна. Тиймээс өөрийгөө олж яваа гэвэл илүү тохирох байх.
А.Бат-Од: Хэрвээ энэ мэргэжлийг эзэмшээгүй байсан бол хэн байх байсан бол?
А.Энхтуяа: Магадгүй урлаг судлаач ч юм уу. Урлагтай ойр хүн байх байсан болов уу.
А.Бат-Од: Шүлэг бичдэг гэж би ойлгодог шүү дээ. Чөлөөт цагаараа юу хийх дуртай вэ?
А.Энхтуяа: Би шүлэг бичдэггүй шүү дээ. Яруу найргийг унших, мэдрэх дуртай. Мөн сайн кино үзэх дуртай, арт хаус чиглэлийн юм бодуулсан гэх юм уу. Энэ чигэлэлээр “Dreamer’s day” гэж кино сонирхогчдын клубээс зохион байгуулдаг кинонуудыг алгасалгүй үзэхийг хичээдэг.
А. Бат-Од: Хамгийн их сэтгэгдэл үлдээсэн кино ямар кино байна вэ? Яагаад?
А.Энхтуяа: Хэдэн жилийн өмнө тус клубээс зохион байгуулж толилуулсан Францын нэг найруулагчийн “The lovers on the birdge” кино үнэхээр намайг шоконд оруулсан.
А.Бат-Од: Түрүүн надаас асуусан асуултыг чинь өөрөөс тань асууя. Өөртөө бий болгож байгаа сайн дадал байна уу?
А.Энхтуяа: Би хоёр зүйл дээр сайн дадал, ур чадварыг суулгах гэж хичээж байна. Эхнийх нь удирдлагын арга барилд суралцах. Ажилтантайгаа хэрхэн  харилцах, хүний сэтгэл зүйг ойлгох,  зөв оношлох, тохирсон аргаар ажиллах шаардлага тулгардаг юм байна. Тиймээс удирдлагын арга барилд суралцахын тулд олон талт мэдээ мэдээллийг ашиглаж, сургалт семинарт хамрагдах, ном зохиол унших гэх мэт өөрийгөө хөгжүүлж байна. Хоёрдугаарт, эрүүл мэнддээ анхаарах. Амьдралын зөв хэв маяг, дасгал хөдөлгөөнийг дадал болгох зорилгоор  сүүлийн 5 сар бялдаржуулах төвд хичээллэж байна. Оффист суудаг хүмүүс ихэнх нь хөдөлгөөний дутагдалд орсон байдгаас гадна жин нэмэх  хандлагатай болсон байдаг. Миний хувьд мэргэжлийн дасгалжуулагч М.Сарангуа багштайгаа хичээллээд, зөв хооллоод нэлээдгүй жин хасаад явж байна. Үүнийгээ дадал болгож, дасал хөдөлгөөн, зөв хооллолтыг хэвшүүлэх зорилготой байна.
А.Бат-Од: Амьдрал чинь томоохон  нөлөөл үзүүлсэн ментор байна уу?
А.Энхтуяа: Би сайн хүмүүстэй учирдаг азтай нэгэн гэж өөрийгөө боддог. Олон хүн надад сайнаар нөлөөлж үлгэр дуурайлал болж байсан. Тэр дундаас нэг хүн онцлоод хэлэх юм бол Ч.Маралмаа захирлыг хэлнэ. 2016 он бол манай байгууллагын хувьд хүнд үе байсан. Тухайн үед ажил багатайн  улмаас цалин мөнгөө тавих тал дээр асуудал тулгарсан. Манайх олон ажилтантай байсан. Энэ үед зарим компаниуд ажилчдаа цомхотгож, цалинг нь багасгаж байсан. Харин манайх тэгээгүй. Хүнд хэцүү үед итгэл найдвараа гээхгүй урагшлах  ямар чухал болохыг тэр үед харсан. Маш олон ажилтан Ч.Маралмаа захирлыг хэрхэн хөдөлж, ямар шийдвэр гаргахыг нь харж байсан. Харин захирал цалингаа багасгаагүй хүнээ цөөлөөгүй. Сайхан цаг ирнэ, бид үүнийг даваад гарах ёстой гэсэн итгэл, сэтгэлээр тэр бүхнийг ноён нуруутай даваад гарсан. Дараа нь бидэнд үнэхээр сайхан цаг ирсэн. Тиймээс тэр хүний алсын хараа, тэсвэр тэвчээр, хүнийг гэсэн сэтгэл зэргийг нь хараад үлгэр авч явдаг даа.  
А.Бат-Од: Бидний амьдарч буй нийгэм цаашдаа хэрхэн яаж хөгжих юм бол? Таны төсөөлөлд юу бууж байна вэ?
А.Энхтуяа: Алдахдаа алдаад, онохдоо оноод хөгжиж дэвших нь ойлгомжтой л байх. Гэхдээ “хэр хугацаанд хөгжих вэ” гэдэг нь асуудлын гол нь. Өндөр хөгжилтэй орнуудын цалингийн түвшин, хүний эрх, үүргийн ухамсар зэргээр нь харах юм бол манайх их л хойно яваад байх шиг санагддаг. Манай дундаж амьдралтай хүн өндөр хөгжилтэй орны ядуу иргэдийн үнэлэмжтэй ойролцоо байх жишээтэй. Цалин бага байхаар амьжиргаа тааруу байх нь мэдээж. Үүнийг олж харсан боловсролтой залуус эх орныхоо бус  хүний нутгийн хөгжил дэвшилд хөдөлмөрөө зарцуулж байна. Үүнийг би буруутгаж чадахгүй. Хүн нэг л амьдрах юм чинь тэгж бодох нь зүйн хэрэг. Ингэж ярихаар зарим хүмүүс “байгаадаа сэтгэл хангалуун бай”, “талархаж амьдар” гэх мэт тайвшруулах үгийг хэлэх л байх. Гэхдээ ухамсарт оюун ухаантай хүн юм чинь өөрийнхөө бүх нөөц бололцоог ашиглаад хүн хэрхэн амьдарч болох уу тэр хэмжээнд хүрч амьдрах гэж хичээх нь мэдээжийн хэрэг.



А.Бат-Од: Хоёулаа буцаад салбар луугаа оръё. Барилгын салбарын хөгжлийн чиг хандлагыг юу гэж бодож байна ?
А.Энхтуяа: Зориудаар тэсрэлт хийх хэмжээнд биш  ч цаг хугацааны урсгалаараа хөгжиж л байна. Зургийн компаниудын хувьд ойролцоо  түвшний санагддаг. Ихэнх нь гэр бүлийн компаниуд байдаг. Юуны түрүүнд компанийнхаа  засаглалаа сайжруулах тал дээр  анхаарах ёстой гэж боддог. Манай байгууллагын хувьд урт хугацаандаа зөвхөн дотооддоо гэлтгүй гадаад руу чиглэсэн  төсөл, хөтөлбөрүүд хэрэгжүүлэх төлөвлөгөөтэй байна. Энэ хүрээнд олон улсын чанарын удирдлагын тогтолцоог хэрэгжүүлэх ISO-9001 стандартыг хэрэгжүүлэхээр ажиллаж байна. Төр засгийн бодлого, төлөвлөгөө сонгуулиас сонгуулийн хооронд дөрвөн жилийн хугацаанд яваад байдаг учраас бүтээн байгуулагчдын хувьд ч энэ нь нөлөөлж байдаг.
А.Бат-Од: Танай байгууллагын үнэт зүйл юунд оршиж байна гэж үзэж байна вэ?
А.Энхтуяа: Байгуулагдсан цагаас авахуулаад өнөөдрийг хүртэл бүрдүүлсэн бааз суурь, инженер, ажилчид маань бидний үнэт зүйл. Гэхдээ байгууллагын хувьд ярихад зэрэглэл тогтоож ажиллах шаардлагатай юм байна гэдгийг бид бүгд олж харсан. Таван одтой зочид буудал гэдэг шиг зураг төслийн байгууллагуудын хувьд зиндаа, зэрэглэл байж болно шүү дээ. Тэрийг нь нийгэм хүлээн зөвшөөрсөн гадаад дотоодын мэргэжлийн байгууллагын чанар стандартыг хангасан байх тийм байгууллага болохыг зорьж байна.
А.Бат-Од: Хөгжиж байна, хөгжих гэж байна гэдгийг ямар хүчин зүйлээр тодорхойлж хардаг вэ?
А.Энхтуяа: Хувь хүн, байгууллага, улс орон аль ч шатанд алдаанаасаа суралцах нь амжилтын эхлэл юм шиг санагддаг. Алдаж үзэхгүй бол аль нь оновчтойг хэлж мэдэхгүй. Тиймээс алдаа бол маш том сургамж. Ингэвэл бурууддаг гэдгээ мэддэг хүн дахин тэр замаар яваад байхгүй шүү дээ. Зарим буруу гэж харагдсан зүйл  сайн зүйлийн эхлэл байж ч болно.
А:Бат-Од: Бид барилгын салбарын хөгжлөө хиймэл оюун ухааны хөгжил рүү чиглүүлэх хэрэгтэй. Үүний тулд бэлтгэл ажил маань “BIM” буюу “Building Information Modeling” юм. Хиймэл оюун ухааны хөгжлийн гол цөм бол дата. Бид “BIM” -ээрээ дамжуулж дататай болоод түүгээрээ Монголын барилгын салбарынхаа хиймэл оюуныг хөгжүүлэх юм. “BIM”- ээ хэрхэн нэвтрүүлэх тал дээр нэгдсэн бодлого, шийдэл байхгүй явж байгаа нь харамсалтай. Энэ бүхэн нүсэр бас хол сонсогдож байгаа ч гэсэн яг одооноос, жижиг зүйлээс  эхлээд бага багаар,  гол нь тасралтгүй хөгжүүлэх нь эхний зорилт гэж бодож байна. Бидэнд цаашид  хурд хэрэгтэй
байна.


 

                    Цахим ертөнцийг зөвөөр ашиглавал гайхамшиг, зорилгогүй ашиглавал дайсан  

А.Энхтуяа: Та ямар хүмүүсээс үлгэр дууриалал авч суралцдаг вэ?
А.Бат-Од: Энэ тэр  гээд оноогоод хэлэхээсээ илүү өнөөгийн зөв хандлагатай залуус, гадаад дотоодын олон лектор, менторууд бүгд миний зөвлөгчид гэж бодож байна. Бид цахим ертөнцөөс асар их мэдээ мэдээллийг олж авч, алсын зайны  олон ментортой болж байна гэж ойлгодог. Гэхдээ яаж ашиглах вэ гэдэг нь маш чухал. Мэдэхгүй, чадахгүй зүйлээ мэдэх гэж, чадах гэж ашиглаж байвал энэ бол агуу их боломж. Харин цаг нөгцөөж, уйдсандаа утас ухаж байвал өөрийнхөө алтан цаг хугацааг ямар ч зорилгогүйгээр алдаж, өөрийгөө хохироож байна гэсэн үг юм.
А.Энхтуяа: Би бас санал нэг байна. Хүн өөрт хэрэггүй зүйлээ үзэж хараад, хов жив, шар мэдээ уншсан тэр цаг ямар ч өгөөжгүй байдаг. Бүх дэлхийн хов живийг үзэж дуусгахгүйгээс хойш энэ буруу зуршилдаа хүн бүхэн дүгнэлт хийгээд үзээсэй.  Би сүүлийн үед цахим хэрэглээнд бага цаг зарцуулдаг болсон. Орвол зорилготойгоор бүтээмжтэй ашиглаж хэвшиж байгаа.  Цаг үеийн тухай мэдээг орой ээжээсээ очоод л авчихдаг. /Инээв/
А. Энхтуяа: Хүн юу хүснэ. Тэгж амьдрах болно гэсэн нууцын хуульд итгэдэг  үү?
А.Бат-Од: Бүр автах нь ч юу юм. Мэдээж бодит зүйлд тулгуурлах хэрэгтэй. Гэхдээ хүний тархи өөрөө зөв үү, буруу юу гэдгийг ялгаж чаддаггүй. Зөвхөн бодох төдийд биелүүлэх дохиог илгээсээр байдаг гэж уншсан. Интернэтийн Д.Энхбат ах “TED Talk” дээр хэлж байсан. Хүний тархи бол радиогийн долгион хүлээн авагч шиг ажилладаг. Та юуг сонирхож байна, юуг хайж эрэлхийлж байна бидний бодол санаа тэр зүйлийг хайж, олж хардаг гэсэн үг юм. Хүсч байгаа зүйлээ соронз мэт татдаг гэж бас ойлгож болох юм.
А.Энхтуяа: Энэ талаар уншиж байсан ном гэвэл?
А.Бат-Од:  “Казиног номхотгосон түүх” гээд Монгол хүний түүхээс сэдэвлэн  бичсэн ном байдаг. Казинод ялж мөнгөтэй болохын тулд таван одтой зочид буудалд бууж, тансаг хоол идэж, үнэтэй хувцас өмсөөд бие сэтгэлдээ өөрийгөө ялсан хүн гэж итгүүлэн үнэмшүүлж байгаад ялалт байгуулсан хүний тухай гардаг. Өөрөөр хэлбэл ямар ч мөнгөгүй байж мөнгөтэй юм шиг сэтгэлгээг өөртөө өгч, өөрийгөө баян казиночин гэж итгүүлж чадсанаараа хожсон түүх юм. Үүгээр би юу хэлэх гээд байна вэ гэвэл хүн юу хүснэ түүнийгээ  авдаг гэдэг томьёололд итгэдэг.
А.Энхтуяа: Барилгын салбарт тулгамдаж байгаа асуудлыг талаар ямар бодолтой явдаг вэ?
А.Бат-Од: Барилгын салбарын тулгамдаж байгаа асуудал нь барилгын салбарын асуудлаа тодорхойлж, эрэмблээгүйд байна. Бид барилгын салбарын асуудлын талаар цогц судалгаа явуулах хэрэгтэй. Асуудал их байна л гэж яриад байдаг. Яг ямар асуудал байна вэ гэхээр судалгаа шинжилгээтэй, гаргалгааг тодорхойлсон зүйл ховор байдаг. Үүнийг орон сууны судалгаа гэх мэт зах зээл, эдийн засгийн судалгаатай хольж ойлгож болохгүй л дээ. Цэвэр техникийн болон үйл явцын асуудлын талаарх  судалгаа гэсэн үг юм.
Парэтогийн зарчим буюу 80-20 ийн дүрэм гэж байдаг. Асуудалтай байгаа 80 хувь нь үүсгэж байгаа 20 хувиас нь шалтгаалдаг. Гэтэл тэр 20 хувийн асуудлын талаар хэн нэгэн сайд эсвэл дарга нар цээжний бангаараа ямар ч судалгаа дүгнэлтгүй юм ярьдаг. Асуудлыг ул суурьтай, судалгаатай хараагүй болохоор асуудлаа гүйцэт шийдэж чадахгүй шүү дээ.
Уг нь дээрх судалгаагаа нэг удаа бодитоор хүч гаргаад хийчихсэн байхад жил тутамд, бүр болохгүй бол хоёр жил тутамд мониторингийн судалгаа хэлбэрээр хянаад, сайжруулаад явж болохоор байгаа юм.


 
 

                           Характерыг өөрчилж болохгүй ч хандлагыг өөрчилж болно
 
А.Бат-Од: Хуучин барилга байгууламжийн талаар ямар үзэл бодолтой явдаг вэ?
А.Энхтуяа: Хуучин барилга байгууламж гэхээр л хүмүүс нураах, буулгах талаар боддог. Миний хувьд эсрэг байр суурьтай байдаг. Тэр барилгууд бүгд он цагийн түүх дурсгалын гэрч  байсаар ирсэн. Хуучны барилга байгууламж тухайн үеийн хөгжил дэвшил, инженер хүний арга ухааныг шингээж байдаг. Мөн асар олон хүний дурсамжийг шингээн оршдог. Тиймээс аль болох засч залруулж, хүчитгэн бэхжүүлж, хайрлах хамгаалах талаас нь бодох хэрэгтэй.
А.Бат-Од: Тийм шүү. Нэг дүүрэгт байгаа бүх хуучны барилгыг буулгахад тэнд амьдарч байсан бүх хүмүүсийн дурсамжийг үгүй болгоно. Солонгост дахин төлөвлөлт хийхдээ зарим нэг зүйлсийг нь заавал үлдээдэг юм байна лээ.  Олон жил оршин байсан нэг байшинг, модыг хайрлаж хамгаалаад аваад үлдэхэд тэнд хүмүүс ирж дурсамжаа сэргээж, хүүхэд насныхаа аз жаргалын мэдэрдэг байх жишээтэй.

А.Бат-Од: Зургийн компаниудын ажил орж ирэх цаг хугацаа ижил тэгш бус. Зарим жил ачаалалттай байхад зарим жил ажил шахуу байдаг. Энэ тал дээр юу хэлэх вэ?
А.Энхтуяа: Барилгын компанийн нэг онцлог нь улирлын чанартай. Зунжин их ажилтай байж байгаад өвөл нь зогсонги байдалд ордог жишээтэй. Гэтэл манай байгууллага ажилчдаа тогтвортой байлгах үүднээс цалингаа  тогтмол өгдөг. Иймд ажлын ачаалал ихэссэн үeд  “аутсоурсинг” буюу гэрээт ажилтантай хамтарч ажиллах, хөгжүүлэх шаардлага харагдаж байна. Гэрээт ажилтантай ажиллах нь хоёр талтай. Нэг талаасаа ажил гарсан үед л хамтран ажиллаж байгаа нь сайн хэрэг боловч нөгөө талаасаа гар нийлэх, санаа нэгдэх зэрэг дээр асуудал тулгардаг. Гэхдээ дэлхийн чиг хандлага угаасаа ажлын цагт баригдах нь бүтээмж дээшлэх шалтгаан биш гэдгийг харуулж байгаа учраас хүссэн хүсээгүй гэрээт ажилчдын тоо нэмэгдэх нь ойлгомжтой байх.
А. Бат-Од: Монгол инженерүүдийн чадвар гадаадын инженерүүдтэй харьцуулахад ямархуу ажиглагддаг  вэ?
А.Энхтуяа: Томоохон төсөл дээр  хамтран ажиллаж байсан гадаадын инженерүүдийн чадвар манай инженерүүдийн чадвар хоёрын хооронд ялгаа олж хараагүй. Манайхан  эн тэнцүү, магадгүй хурдтай сурах, дасан зохицох чадвараараа  илүү ч байж магад. Харин мэргэжлийн зэрэглэл үзүүлж харуулах диплом,  эсвэл хэлний бэрхшээлээрээ л дутагдаж болох юм.
А.Бат-Од: Захиалагчид ямар шалтгаанаар танайхыг сонгодог гэж бодож байна вэ?
А.Энхтуяа: Захиалагчид юун түрүүнд манай хийсэн зураг төсөл, инжeнeрүүдийн туршлага, ур чадварыг харж  үйлчлүүлдэг гэж бодож байна. Мөн үйлчилгээний уян хатан байдал, шуурхай харилцаа нөлөөлдөг гэж ойлгож байна. Нөгөө талаасаа  барилгын салбарын үзэсгэлэн яармагт тогтмол оролцож, сэтгүүл, сайтад мэдээллээ байршуулснаараа  илүү өргөн цар хүрээг хамрах боломж үүсгэх боломжтой.
Иргэдийн мэдлэг, боловсрол дээшлээгүй цагт хөгжил биднээс хол байх болно
 
А.Энхтуяа: Нийгмийн болж бүтэхгүй зүйл юунаас үүдээд байна гэж үзэж байна вэ?
А. Бат-Од: Ямар ч улс орны хөгжлийн түүхийг хараад байхаар иргэд нь боловсроогүй цагт хөгжил дэвшил удааширдаг нь харагддаг. Эерэг хандлагатай, хариуцлагатай, боловсролтой иргэд бэлтгэгдэх юм бол өөрчлөлт хийх явц хамаагүй амар, хурдан болно. Өнөөгийн нөхцөл байдал тийм ч сайнгүй байгааг хүн бүхэн мэднэ. Энэ их утаа, хог, хөрсний бохирдлоос бид яаж салах тухай олон санал гаргаж байна. Утаа, хөрсний бохирдол юунаас үүсээд байна вэ гэвэл: Нэгдүгээрт мэдээж иргэдийн боловсрол, мэдлэг. Хоёрдугаарт Иргэдийн амжиргааны түвшин, ядууралтай холбоотой. Хүмүүс барилга байшин барьсанаар асуудал шийдэгдэнэ гэж яриад байгаа юм. Аливаа зүйлийг ул сууриар нь шийдэж байж асуудал арилна гэж үзэж байна. Гэр хорооллыг дахин төлөвлөн утаагүй орчин бий болголоо гэж бодоход дахин асуудал гарахгүй байх нь иргэдийн ухамсар хандлагатай шууд холбоотой. “Тархинд байгаа хогийг цэвэрлээгүй бол гадна байх хогийг цэвэрлэж барахгүй” гэдэг үг байдаг шүү дээ. Утаа, хөрсний бохирдол гэх мэт асуудал нэг л өдөр шийдэгдэнэ гэж найдаж байвал наана нь иргэдийн хандлага, ёс зүйтэй ажиллах ажил түүнээс чухал байна гэж би хардаг.
А. Энхтуяа: Тийм шүү. Гарч буй галын шалтгааныг олохгүйгээр гарсан галыг түр зуур унтраах арга хэмжээ авсан төрийн бодлого үйлчлээд байгаа нь харамсалтай. Уг сууриар нь шийдэж юунаас болов гэдгийг нь оношилж байж сая асуудал шийдэх байх. Гуравхан сая хүн амтай. Малынхаа тоогоор ч газар нутгийнхаа тоогоор ч дэлхийд тэргүүлдэг хэр нь яагаад ийм байдалд амьдарч байгаагийн бас нэг шалтгаан нь төр засгийн өнөө маргаашаа бодсон өнгөц шийдвэрүүд юм. Гэтэл Хятад улсын бодлогыг харьцуулаад харахад тэрбум хүнийг ажиллах ажлаар хангаж, бүх иргэдээ дундаж ба дунджаас дээш амьжиргаатай болгох зорилт тавин урагшилж байна шүү дээ.




                                                                                         
Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.