Дэлхийг байлдан дагууж буй архитектор Жулиен Де Смедит

Дэлхийг байлдан дагууж буй архитектор Жулиен Де Смедит

  "Бидний бүтээдэг дизайны гол агуулга  нь олон нийтэд чиглэсэн, эдийн засаг, санхүүгийн хувьд уян хатан, инженерчлэлийн хувьд боломжит байхаар тооцоолон төслүүдээ гаргадаг" хэмээн Данийн Копенгаген хотоос үүсэлтэй "JDS Architects"-ын үүсгэн байгуулагч Жулиен Де Смедит ярьдаг. Тэгвэл "JDS Architects" болон өнөө үеийн хамгийн алдартай архитектор Жулиен Де Смедит гэж хэн бэ?


     Жулиен Де Смедит нь анх Дани улсын Копенгаген хотод байрлах "Далайн эргийн залуучуудын барилга" болон Орхуус /Aarhus/ хотод байрлалтай "The Iceberg" хэмээх өвөрмөц загвар бүхий төслүүдээрээ олон улсын архитектурын ертөнцөд танигдаж эхэлсэн залуу архитектор юм. Тэрбээр Белгийн Бруссел хотод 1975 онд төрсөн өнөөг хүртэл амжилттай ажиллаж байгаа архитектор юм. Анх тэрээр ажлын гараагаа алдарт Рем Күүлхаас архитекторын фирм болох Роттердам хотод байрлалтай "ОМА - Office for Metropolitan Architecture"-аас эхэлж байсан. Тухайн үед тус фирмд ажиллаж байх хугацаандаа хамтран ажилладаг найз архитектор болох бидний сайн мэдэх Бьярке Ингельс /Bjarke Ingels/ архитектортой хамтран 2001 онд  "ФЛОТ" хэмээх архитектур дизайны студийг Копенгаген хотод хамтран байгуулжээ. Уг студи нь маш богино хугацаанд амжилтанд хүрсэн бөгөөд тэдний бүтээлч, шинэлэг загварууд үндэсний болон олон улсын хэмжээнд хүлээн зөвшөөрөгдсөн ба тухайн үеийн бүхий л тэмцээн, тендер болон архитектурын шагналуудыг хүртэж байсан. Тухайлбал, 2004 онд тэдний "Венецийн Биеннале” фестивалийн архитектурын төрөлд нь зориулан бүтээсэн Норвегийн Ставрандер хотод байрлах шинэ хөгжмийн барилгын төслөөрөө архитекурын томоохон олон улсын шагналуудын нэг болох "Алтан арслан" шагналын ялагч болж байжээ. 
     
       Тэдний хамгийн анхны томоохон төсөл болох "VM Houses" нь олон шагналыг тухайн үед хүртсэн байдаг. Архитекторууд амжилттай хамтран ажиллаж байсан боловч 2006 оны нэгдүгээр сард "ФЛОТ" студийнхээ үйл ажиллагааг зогсоож, оронд нь өөрсийн бие даасан архитектурын студиудыг үүсгэн байгуулсан. Ийнхүү анхны "ФЛОТ" студээс дэлхийд алдартай залуу архитекторууд төрөн гарсан нь Жулиен Де Смедит архитектороор ахлуулсан "JDS Architects" болон Бьярке Ингельс архитектороор ахлуулсан " Бьярке Ингельс групп" буюу "BIG" нар байв.
   
       "ФЛОТ" студийн дараагаар бие даан нээсэн Жулиен Де Смедит архитекторын "JDS Architects" студийн хамгийн эхний амжилт нь 2007 онд Осло хот дахь шинэ Холменколен цанын баазын олон улсын архитектурын тэмцээнд түрүүлснээр эхэлсэн. Уг бааз нь 2011 оны Дэлхийн цанын аварга шалгаруулах тэмцээнд зориулагдан бүтээгдсэн бөгөөд энэ нь дэлхийн хамгийн анхны ган төмрөөр хийгдсэн цанын гулгуур юм. Далайн түвшингээс 1,230 метр өндөр гэх мэтчилэн маш олон онцлогтой байгууламж юм. "JDS Architects" студи нь үүсгэн байгуулагдсан цагаасаа эхлэн өнөөг хүртэл Копенгаген, Брюссель, Шанхай зэрэг хотуудад өөрийн салбараа байгуулсан бөгөөд олон тооны чадварлаг, туршлагатай архитектор, дизайнерууд өдгөө хамтран ажиллаж байна. Тэдний ажлын чиглэл нь тавилгын дизайнаас эхлээд олон нийт, орон сууцны барилга, хотуудын мастер планы ажлуудыг мэргэжлийн өндөр түвшинд хийж гүйцэтгэх бөгөөд анхан шатны эскизны үеэс эхлэн бүрэн гүйцэтгэлтэй барилга баригдаж дуустал нь хийж  гүйцэтгэдэг. 

 
    
"JDS Architects" студийн баримталдаг гол архитектурын филисофи нь “Том хэмжээний төслүүдэд олон тооны үйл ажиллагааг нэгтгэж, тэдгээрийг нэгэн зэрэг хамруулан барилгын үйл ажиллагаанд оролцуулах нөхцөлийг бүрдүүлэх” юм. Мөн архитектур дизайны гол баримталдаг зарчим нь “Хүрээлэн буй орчин болон байгалийн төрөлх ландшафттай нь уялдуулж анализ хийсний үр дүнд төслүүдээ бүтээдэг”-т үнэт зүйл нь оршдог. Түүнчлэн Жулиен Де Смедит архитектор нь архитектурын ертөнцөд дижитал технологи болон 3D дижитал дүрслэлийн технологийг ашиглан фото рендэрүүдийг хийж эхэлсэн анхны архитекторуудын нэг юм. 2013 оноос хойш Жулиен Де Смедит нь "А10 сэтгүүл"-ийн ТУЗ-ийн гишүүнээр ажиллаж байгаа бөгөөд энэхүү сэтгүүлийг архитектор Ханс Ибелингс, график дизайнер Аряан Гроот нар RSM групптэй хамтран ажиллаж байна. 

               Түүнчлэн тэрбээр эдгээр ажлынхаа зэрэгцээ их сургуулиудад лекц уншдаг бөгөөд тухайлбал Хьюстон дахь Райс Их Сургууль, Кентакигийн Их Сургуулийн зочин профессор, Ирландын архитектурын холбоо, Иелийн их сургууль, Лос-Анжелес дахь SciArc гэх зэрэг дэлхийн алдартай олон архитектурын их сургууль, холбоодыг дурдаж болно. 

Жулиен Де Смедит нь өнөөгийн хамгийн нөлөө бүхий архитектор бөгөөд дэлхий даяар олон тооны төсөл дээр ажиллаж байгаа ч Копенгаген хот бол түүний анхны болон томоохон төслүүдийнх нь эх орон билээ. 
Шагналуудаас дурдвал:

  • 2014 оны Belgian Building Awards
  • 2013 оны Architizer A+ Award, Спортын шилдэг байршил (Holmenkollen Ski Jump)
  • 2013 оны Architizer A+ Award, Шилдэг орон сууц (The Iceberg)
  • 2013 оны MIPIM Award, Шилдэг орон сууц (The Iceberg)
  • 2008 оны Дэлхийн Архитектурын Шилдэг шагнал, Шилдэг орон сууц  VM Mountain Dwellings
  • 2008 оны Скандинавын орнуудын шилдэг барилга, VM-houses 
  • 2007 Mies van der Rohe Шилдэг аялал жуулчлалын үзэсгэлэн - VM-houses
  • 2006 оны шилдэг барилга (VM House)
  • 2005 Mies van der Rohe Шагнал - Тусгай байр (Далайн эрэг дэх Залуучуудын Хаус)
  • 2004 оны Алтан Арслан
  • 2003 оны Scanorama Design Award
  • 2003 оны Henning Larsen Prize
  • 2002 оны Nykredit Архитектурын шагнал
  • 2001 оны Henning Larsen Prize

Төслүүдээс:   The Iceberg - 2013 он

  Төслийн үул ажиллагаа          Орон сууцны хотхон

   Багтаамж                                  21600 м2

   Байршил                                   Орхуус /Aarhus/ хот,  Дани улс

   Төсөв                                        32.600.000 евро

   Баригдаж дууссан                    2013 он    


Дани улсын хоёрдахь том хот болох Орхуус /Aarhus/ хотод байрлалтай ашиглалтаас гарсан хуучин боомтын чингэлэг терминалыг дахин ашиглах, шинэчлэх замаар хотын нийгмийн тогтвортой байдал, орчныг сайжруулах төслийг хэрэгжүүлж эхэлсэн ба уг төслийн хүрээнд зохион байгуулагдсан олон улсын архитектурын тэмцээнд "JDS Architects "-ын " The Iceberg " төсөл нь 2013 онд түрүүлж байсан.         

     

Энэхүү “хаягдсан” газрыг орон сууцны хороолол болгохын зэрэгцээ соёл, спортын олон  арга хэмжээ зохион байгуулж болохуйцаар төлөвлөж түүнийг дагаад олон мянган ажлын байрыг ч төлөвлөсөн нь хотыг бүрэн утгаар хөгжүүлж чадсан билээ. Үүний зэрэгцээ энэхүү төслийн гол онцлог орон сууцны цогцолборыг бүхэлд нь нарны гэрлийг нэвтрүүлж чадсан явдал. Ингэхдээ "JDS Architects"-ын дэвшүүлсэн гол санаа нь барилгуудыг мөсөн уул мэтээр төсөөлж, барилгын тэгш өнцөгт хэлбэрийг эвдэж уулын оргил мэт төлөвлөсөн нь ийнхүү бүтэн өдрийн турш байгалийн гэрэлтүүлэгтэй байх нөхцөлийг бүрдүүлж чадсанаараа хотыг илүү үзэсгэлэнтэй, амар амгалан, бас өвөрмөц болгож чадсан билээ.

Эх сурвалж: Барилга.МН сэтгүүл

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.