Усан бассейны архитектур төлөвлөлт

Усан бассейны архитектур төлөвлөлт


     Спортын төрлүүд дотроос хүний биед хамгийн сайн нөлөөлж, тэсвэр хатуужилтай, эрүүл чийрэг, гоо сайхан болгодог төрөл нь усан спорт юм. Усанд сэлэх нь биеийн хэлбэр, галбирыг засч, зүрхний булчингийн үйл ажиллагааг сайжруулж, хүчилтөрөгчийг булчингуудад тараахын зэрэгцээ цусны эргэлтийн системийг сайжруулдаг идэвхтэй үйл ажиллагаа гэж анагаах ухаанд үздэг. Тэр тусмаа техник технологийн энэ эрин үед зонхилон тохиолдож буй мэдрэлийн өвчнийг усан спортоор эмчлэх нь хамгийн үр дүнтэй арга болох нь хэдийнэ нотлогдсон билээ. Сүүлийн үед хүүхэд залуус ч энэ спортоор хичээллэх нь ихэсч түүнийг дагаад усан бассейн төвүүд ч цөөнгүй баригдах болсон. Иймээс энэ удаагийн дугаартаа шинэхэн бөгөөд сонирхолтой сэдэв болох усан бассейны архитектур төлөвлөлтийн талаар сонирхуулъя.   



Сайн усан бассейн барих нь ерөнхийдөө тухайн барилга байгууламжийн архитектурыг хэрхэн төлөвлөсний үр дүн билээ. Төлөвлөлтийн үед дотоод орон зайны шийдэл, ялангуяа эдгээр зай бага үед зохилдлоготой байлгахад илүү анхаарах ёстой. Усан бассейн нь маш олон элементүүдээс тодорхойлогддог бөгөөд үүнээс хамгийн ихээр анхаарал татдаг хэсэг нь тааз, дүүжин таазны загвар дизайн, гэрэлтүүлэг ба Ванковерийн Гуйлдфорд Акуатик усан спортын ба усан парк цогцолбороос жишээ авч болох юм.
Энэ нь олимпийн тэмцээнд зориулсан 50 метрийн уралдааны усан бассейнаас гадна, усан эмчилгээ, чөлөөт амралтын, усан массажийн усан сан, удаан урсгалтай бассейн, усан гулгуур, саун, зэргийг явган замаар холбосон томоохон байгууламж юм. Дотор талын цайвар өнгийн судлууд нь уялдуулсан гэрэлтүүлэгтэй хослон цэвэрхэн, уужим эмх цэгцтэй сэтгэгдэл төрүүлнэ. Үйлчлүүлэгчид нь ресепшнээр дамжин газар доор байрлах хувцас солих, душний өрөөнөөс өндөр таазтай цэлгэр усан бассейнд ордог.  
Дүүжин тааз нь аварга цонх болон үргэлжилсэн олон элементүүдээс бүрдсэн бөгөөд шилэн ханатай өндөр гүүр нь гол зайгаар дамжин үргэлжилдэг. Өдрийн туршид нийт талбай нь байгалийн гэрэлд “дүрэлзэн” гэрэлтдэг.
Усан бассейны гэрэлтүүлэх систем нь анхаарал татхуйц чухал хэсэг байхаар төлөвлөгдсөн. 



“Вүүртүйзен”-ий хаалттай усан бассейн нь ногоон ойгоор хүрээлэгдсэн байгалийн сайхан орчин дунд байрладаг. Үүний зэрэгцээ усан бассейны онцлог сонирхолтой хэсэг нь жигд бус хэлбэрээр зүссэн завсрын цайвар өнгийн модон самбараар доторлосон засал юм. Барилгын энгийн бөгөөд тодорхой бүтэц бүхэлд нь хялбархан сонирхох боломж олгодог.
Милан хотын модны төв гудамжинд байрлах “Жиоржио Армани” тансаг зэрэглэлийн 5 одтой зочид буудлын хамгийн дээд давхарт байрлах спортын зориулалттай бус алжаал тайлах орчин үеийн загвар дизайн бүхий усан бассейныг Термигас компани төлөвлөж гүйцэтгэсэн. Усан бассейнд зайлшгүй шаардлагатай олон улсын хэмжээнд хүлээн зөвшөөрөгдсөн нормуудыг мөрдөж зориулалтын стандартын материал ашиглан гүйцэтгэх нь маш чухал юм. Мөн усан бассейн нь орчиндоо дунджаар 60-70 хувийн  чийгийг байнга үүсгэдэг тул агааржуулалтын хоолой болон агаар сэлгэх машин нь тусгай зориулалтын байх шаардлагатай байдаг. Иймээс төлөвлөлтийн хувьд ч усан санд зориулсан байдлаар тусгайлан шийддэг.
Дотор засал, хана шалны материалууд, тэдний наалт болон угсралтууд нь ус чийгтэй орчинд зориулагдсан цавуу бүтээгдэхүүнүүдээр хийгдэх шаардлагатай болдог. Хэрэв дотор заслын зориулалтын бус материал, цавуу, дулаалга чигжээс, өнгөлгөөний материал хэрэглэвэл:
-Эвгүй үнэр гарах
-Усан сангийн ус бохирдох, цагаан өрмөнцөр тогтох
-Хөгц бактер үүсэх
-Заслын материалууд хуурах, сэмрэх, өнгө зүсээ алдах зэрэг сөрөг үр дагавар гардгийг анхаарах хэрэгтэй билээ. 
Эх сурвалж: Барилга.МН сэтгүүл

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.