Орон сууцны хөнгөлөлттэй зээлд 500 тэрбум төгрөг зарцуулахаар боллоо

Орон сууцны хөнгөлөлттэй зээлд 500 тэрбум төгрөг  зарцуулахаар боллоо


        Улсын төсвөөс олгох болон банкуудын санхүүжилтийн эх үүсвэрийг ипотекийн зээлд татан оруулахаар засгийн газар өнөөдрийн хуралдаанаараа шийдвэрлэсэн байна. Тодруулбал, ипотекийн найман хувийн зээлийн санхүүжилтэд жилд зарцуулдаг байсан 300 тэрбум төгрөг 500 тэрбум болж нэмэгдсэн байна.  
Хөнгөлөлттэй зээлийн хөрөнгийг тухайн жилийн төсөвт тусган батлуулах бөгөөд Сангийн яам, Барилга, хот байгуулалтын яам, Монголбанк хооронд гэрээ байгуулж, Монголбанкаар дамжуулан банкуудад олгох аж. Гэхдээ банкууд санхүүжилтийн эх үүсвэрийг өөрийн зорилгод нийцүүлэн ашиглах, зээлийн өргөдөл хүлээн авахаас үндэслэлгүй татгалзах, банкаас иргэдтэй зээлийн үндсэн төлбөрийг урьдчилан төлөх нөхцөлгүй, төлсөн тохиолдолд торгууль, шимтгэл, хураамж ногдуулах нөхцөлтэй гэрээ байгуулахыг хориглосон байна. Үүнтэй холбогдуулж Барилга, хот байгуулалтын сайд Х.Баделхан мэдээлэл хийлээ. Тэрбээр:

-Орон сууцны хөнгөлөлттэй зээлийг анх удаа орон сууц авч байгаа хүмүүст олгоно. Ингэхдээ хотын ерөнхий төлөвлөгөөнд тусгагдсан байршлаас орон сууц олгох юм. Мөн гэр хороололд амины орон сууц барихад зээл олгоно. Гол нь амины орон сууц нь дэд бүтцийн шийдэлтэй байхын зэрэгцээ 120 ам.метр хүртэл хэмжээтэй байх ёстой. Мөн зээлийн хүртээмжийг нэмэгдүүлэх боломжийг бүрдүүлсэн. Харин зээлийн урьдчилгаа 30 хувь хэвээрээ. Манай улс ОУВС-тай өргөтгөсөн санхүүжилтийн хөтөлбөрт хамрагдаж ажиллаж байгаа учир зээлийн урьдчилгааг бууруулах боломжгүй гэсэн юм.
Сайд Х.Баделхан мэдээлэл хийснийхээ дараа сэтгүүлчдийн асуултад хариулав.

-Түрээсийн орон сууцны барилгын явц ямар байна вэ?

-Түрээсийн орон сууцны тухайд “Буянт-Ухаа II” хороололд 972 айлын орон сууц баригдаж байгаа. Энэ барилга ирэх оны нэгдүгээр сард ашиглалтад орно. Нийтдээ 71 тэрбум төгрөгийн санхүүжилт хийгдсэн. 1 ам.метрийн өртөг нь 1.4 сая төгрөг. Энэ орон сууцыг түрээсийн орон сууц болгох асуудлыг Засгийн газарт санал оруулна. 

-Түрээсийн байрыг өмчлүүлэх үү?

-Түрээсийн байрыг өмчлүүлэх шийд одоохондоо гараагүй байгаа. Ер нь цаашдаа түрээсэлсэн байраа өмчлөх шийдвэрийг гаргана.

-Зээлийн хүүг цаашдаа бууруулах уу?

-Зээлийн хүүг одоохондоо бууруулах боломжгүй. Бид өнгөрсөн тавдугаар сард судалгаа хийсэн. Түрээсийн орон сууцанд хамрагдах хүсэлтэй 40 гаруй мянган айл байна. Өнөөдрийн үйлчилж байгаа журмаар урьдчилгаа 30 хувиа төлөөд ипотекийн зээлд хамрагдъя гэсэн 30 гаруй мянган иргэн Улаанбаатар хотод, 14 мянган иргэн орон нутагт  байна. Хүмүүсийн эрэлт маш их байна. Гэхдээ манай улс ОУВС-гийн хөтөлбөрт хамрагдаж байгаа учир зээлийн хүүг бууруулах боломжгүй. Харин 2020 оны нэгдүгээр сарын нэгнээс ипотекийн зээлийг олгох асуудлыг Монголбанкнаас Сангийн яам руу шилжүүлнэ. Энэ үед дахин хэлэлцэнэ. 

Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.