Цахилгаан халаагуур ба түүний хэрэглээ

Цахилгаан халаагуур ба түүний хэрэглээ


  Утааны улирал ирж байгаатай холбогдуулан Засгийн газраас агаарын бохирдлыг бууруулах зорилгоор гэр хорооллын айл өрхөд цахилгаан эрчим хүчний тарифын хөнгөлөлт үзүүлэх журмыг баталсан ба үүнийг хэрэгжүүлэхийн тулд утаагүй зуух буюу цахилгаан халаагуур хэрэглэхийг санал болгож байна. Иргэд орон сууцаа дулаалах, цахилгаан халаагуур түүний ашиглалт хэрэглээний талаар мэдээлэл дутмаг байгаагаас үүдэн дулаан алдалт ихтэй орчинд амьдрах, эрүүл мэндээрээ хохирох цаашилбал эдийн засгийн хувьд их зардал гаргаж байгаа нь илхэн байна. Иймд цахилгаан халаагуурын хэрэглээ, ашиглалтын талаар зөвлөмж бэлдлээ.


Цахилгаан халаагуур, түүний ажиллах зарчим
 


 


  Цахилгаан халаагуур нь цахилгаан гүйдлийг дулааны энерги болгон хувиргадаг төхөөрөмж юм. Цахилгаан халаагуур нь агаарын урсгал дээр тулгуурлан тоног төхөөрөмжийн дулаан солилцооны хэсгээр дамжин агаарыг тасралтгүй эргэлтэд оруулж  жигд халаадаг.
 


Цахилгаан халаагуурын дотоод бүтэц


 


Цахилгаан халаагуурын схем

 


Таны гэрт ямар хүчин чадалтай халаагуур хэрэгтэй вэ?

Юуны өмнө орон байрны тань дээвэр, хана, цонх, хаалга, шал нь дулаан алдагдал ихтэй байгаа бол дулаан алдагдаж буй хэсгийг шаардлагын дагуу дулаалгын материалаар зөв дулаалж цахилгаан халаагуурыг хэрэглээрэй.

Хэрэв та 50 орчим ам метр талбайтай амины орон сууцныхаа дулааныг цахилгаан халаагуураар шийдэх гэж  байгаа бол эхний ээлжид дулааныг жигд хуваарилах зорилгоор халаагуурынхаа байрлалыг зөв сонгох хэрэгтэй.  



 

Гэр, амины орон сууцанд тоолуурын нэгдсэн шитийн автомат нь хамгийн дээд утгаараа 25 А хүчин чадалтай байдаг. Тиймээс 5 кВт-аас бага чадал шаардагдах цахилгаан халаагуур сонгож аваарай. 5 кВт-аас дээш чадалтай халаагуур залгавал таны тоолуур шатах, автомат дахин унах, эвдрэх аюултай. Цахилгаан халаагуурыг өнгөцхөн судалснаас болж чанарын шаардлага хангахгүй, зардал ихтэй, халаагуур авахаас сэргийлж баталгаатай, албан ёсны гэрчилгээтэй, стандартын шаардлага хангасан халаагуур авахыг зөвлөж байна. Халаагуурыг худалдан авахдаа галын аюулгүй байдлыг хангах үүднээс ил улайсч байгаа хэсэг байхгүй, ахуйн зориулалтын халаагуурыг авах нь зүйтэй юм.
 


Цахилгаан халаагуурыг хэрэглэх үед анхаарах зүйлс:

  • Цахилгааны утас, залгуурыг хооронд нь наалдамтгай байдлаар байлгаж болохгүй.

  • Цахилгааны чадал тухайн температурт хүрэхгүй эсвэл доголдолтой байвал мэргэжлийн хүнээр шалгуулах.

  • Цахилгаан халаагуурыг залгаатай бүү орхи. Хэрэглээгүй үедээ цахилгааны тэжээлээс салгаж унтраах.

  • Дулаан дамжуулах нүхийг таглаж, бөглөж болохгүй.

  • Цахилгаан халаагуурын утас гэмтсэн тохиолдолд мэргэжлийн хүмүүст хандах.

  • Цахилгаан халаагуурын ойролцоо усан банн, чийгтэй зүйл байлгахгүй байх (хэрэв шаардлагатай бол дор хаяж 1 м-н зайтай байрлуулах)

  • Босоо буюу үндсэн байрлалаар ашиглана

  • Хэт халалтаас зайлсхийхийн тулд агаар үлээх хэсгийг бүү тагла

Цахилгаан халаагуурын аюулгүй ажиллагаа

 
  • Аюулгүй байдлын үүднээс зөвхөн насанд хүрсэн хүн асааж ажиллуулна.

  • Цахилгаан халаагуурыг хэрэглэхийн өмнө хажуу талд нь байрлах цахилгааны тэжээлийн залгуурыг шалгаарай.

  • Хэрэв залгуур ямар нэгэн байдлаар гэмтсэн бол уг цахилгаан халаагуурыг солиулах буюу нэн яаралтай үйлдвэрлэгч рүү холбогдох.

  • Цахилгаан халаагуурыг зориулалтын дагуу ашиглана.

  • Цахилгаан халаагуурыг тэжээлээс салгаж цэвэрлэх ба хуурай алчуур, даавууг ашиглан хөнгөн дарж цэвэрлэнэ.

  • Цахилгаан халаагуурыг унагаах эсвэл буруу ашигласнаар эвдэрч болзошгүй

  • Халаагуурыг ашиглаагүй үедээ залгуураас салгах хэрэгтэй.
     

Цахилгаан халаагуур болон бусад цахилгаан төхөөрөмжүүдийг:
 

  • ​​​​Чийгтэй орчин, усан сан, угаалгын өрөөнд ашиглахгүй байх.
  • Нойтон эсвэл чийгтэй гар, хөлөөр хүрэхгүй байх.

  • Гадаа ил байлгаж болохгүй.

  • Шатамхай болон хийн түлштэй орчинд байлгахыг хориглоно.


 

Бэлтгэсэн Г.Сондор

 



 

 

Эх сурвалж: Барилга.МН сэтгүүл

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.