Яармагийн шинэ, хуучин гүүрийн замын хөдөлгөөнийг маргааш нээнэ

Яармагийн шинэ, хуучин гүүрийн замын хөдөлгөөнийг маргааш нээнэ

"Яармагийн шинэ гүүр барих, хуучин гүүрийг засварлах" төслийн хүрээнд баригдсан нийт дөрвөн эгнээ шинэ гүүр, хоёр эгнээ хуучин гүүр, нүхэн гарц, рамп гүүр, авто зам, замын байгууламжийн замын хөдөлгөөний нээлт маргааш болно. Зам барилгын ажлын хүрээнд Богдхан уулын арын авто замыг Яармагийн замтай холбох D-рамп хийгджээ. Шинэ гүүрний доор 50 метрийн өргөнтэй нүхэн гарц барьсан байна.

Яармагийн шинэ гүүр нь 250.2 урт, 20.5 метр өргөн, дөрвөн эгнээтэй. Шинэ гүүрийн шавыг 2017 оны тавдугаар сард тавьж байсан юм. Гүүрийг БНХАУ-ын 30 сая ам.долларын хөнгөлөлттэй зээлийн төсөвт өртөгөөр босгосон.

"Хятадын төмөр замын хоёрдугаар групп товчоо" ТӨК ажлыг гүйцэтгэж, зөвлөхөөр Монгол-Германы хамтарсан компани ажиллажээ. Хуучин гүүрийн засварын ажлын хүрээнд хучилтын хавтан, засварын бетон цутгах ажил, явган замын бетон бүтээц гээд төслийн хүрээнд хийгдэх ажлуудыг дуусгасан байна.

Нээлтэд, Ерөнхий сайд У.Хүрэлсүх, нийслэлийн Засаг дарга С.Батболд, нийслэлийн Авто замын хөгжлийн газрын дарга Ж.Тогтохбаяр нар оролцох аж.

 
Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.