Халуун орны ойг санагдуулам ТЭНГЭРИЙН ЦЭЦЭРЛЭГТ ХҮРЭЭЛЭН

Халуун орны ойг санагдуулам  ТЭНГЭРИЙН ЦЭЦЭРЛЭГТ ХҮРЭЭЛЭН
     Дэлхийн томоохон хотуудад байгаль дэлхийг дээдэлсэн, ногоон байгууламжаар дүүрэн өндөр цамхаг, байгууламжууд сүндэрлэсээр байна. Хамгийн сүүлд шинэхэн хэрэгжүүлж буй нэгэн төслийг танилцуулъя.
     “WOHA” архитектурын компани нь Сингапурын төв хэсэгт орших “Oasia” зочид буудлын 30 давхар өндөр уг барилгыг халуун орны ой шугуй тэнгэр баганадсан мэт харагдуулахаар төлөвлөжээ. Барилга нь архитектурын өвөрмөц шийдэлтэйгээс гадна  фасаднуудыг бүхэлд нь ногоон байгууламжаар дүүргэж, олон тооны мод, ургамал ногоо тарьж чимэх аж.
      Ердөө нэг жил хагасын дараа гэхэд усан үзмийн ороонго бут архитектурын энэхүү гайхамшигт бүтээлийг бүрэн бүрхэж, түүнийг нь бид бодитоор харах боломжтой болох юм. Байгаль эхийг архитектурын өвөрмөц загварт уусгасан хэв маяг нь барилгын дотор ба гадна засалд ч мөн үргэлжилсээр. Энэхүү Тэнгэрийн цэцэрлэгт хүрээлэнгийн конспект санааг Испанийн нэрт архитектор Патрисия Уркиола гарган төлөвлөжээ. Тэрхүү хүрээлэнгийн цэнхэртэн толиотох том усан сангийн үзэмж ногоорон халиурах өвс навчтай нь төгс хослон харагдах аж.



     Сингапурын бизнесийн төв дүүрэгт байрлах “Oasia” зочид буудлын уг барилга нь агаарын байнгын солилцоонд байх юм. Учир нь улаан өнгийн хөнгөн цагаан тороор барилгыг битүүмжилсэн нь агаарын солилцоог ийнхүү сайжруулах зорилготой аж. 20 гаруй нэр төрлийн ургамал, усан үзмийн ороонго нь барилгын фасадыг бүрхэн ургах нь уур амьсгалыг чийглэн зөөллөж, цэвэр агаарыг нэмэгдүүлэхэд онцгой ач холбогдолтой.
      Эдгээр ургамал ногоо нь ашиглалтын явцад арчилгаа маш бага шаардах бөгөөд хүчтэй салхинд ч тэсвэртэй бат бөх байхаар тооцсон байна. Хамгийн гол нь арал дээрх хотын дулаарлыг бууруулж, агаарын бохирдлыг багасгаж, агаарыг цэвэршүүлэхэд онцгой ач холбогдолтой гэдгийг төсөл санаачлагчид нь онцолжээ.



     182 өндөртэй Тэнгэрийн цэцэрлэгт хүрээлэн нь гадна хэсэгтээ дөрвөн том талбайтай аж. Зургаа, 12, 21 дүгээр давхруудад аварга том тагттай бол 27 дугаар давхарт тансаг зэрэглэлийн дээврийн террас байрлуулжээ. Барилгад ашигласан улаан өнгөт хөнгөн цагаанаар хийсэн 10 давхартай тэнцэхүйц өндөр дэлгэцээр дээврийн террасыг нарны хэт халалт болон дуу чимээний бохирдлоос хамгаалахаар байрлуулсан байна. Өвс, ургамал, бутнууд уг дэлгэцийг халхлан давж ургах тул террасыг гайхалтай үзэмжтэй харагдуулна.
     Архитектор Патрисия Уркиола нь уг зочид буудлын дотор заслаас гадна гадна орон зайн загвар дээр ч ажилласан юм. AGROB BUCHTAL брэндийн гоёмсог плитатай усан сан бүхий 21 болоон 27 дугаар давхрын гадна хэсэгт яг л баянбүрдэд байгаа мэт сэтгэгдэл төрүүлэхийг хичээсэн гэж тэрээр ярьсан байна.



Орчуулсан: Б.БУРМАА

 

 
Эх сурвалж: Барилга.МН сэтгүүл

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.