А.Амар-Отгон: Хаягдал үнсийг хийт хөнгөн бетоны үйлдвэрлэлд нэвтрүүлж, эко бүтээгдэхүүн үйлдвэрлэж байна

А.Амар-Отгон: Хаягдал үнсийг хийт хөнгөн бетоны үйлдвэрлэлд нэвтрүүлж, эко бүтээгдэхүүн үйлдвэрлэж байна
А.Амар-Отгон: Хаягдал үнсийг хийт хөнгөн бетоны үйлдвэрлэлд нэвтрүүлж, эко бүтээгдэхүүн үйлдвэрлэж байна.
-“Барилга Орон Сууц 2018” үзэсгэлэн яармагийн Шилдэг үйлдвэрлэгч шагналыг "Жи Эс Дорнын хөгжил" ХХК хүртсэн юм. Тус компани нь импортын бүтээгдэхүүнийг орлох хийт хөнгөн бетон блок үйлдвэрлэж, бүтээн байгуулагчдыг чанартай бүтээгдэхүүнээр хангаж буй шилдэг үйлдвэрлэгч. Ингээд "Жи Эс Дорнын хөгжил" ХХК-ийн захирал А.Амар-Отгонтой бүтээгдэхүүн үйлдвэрлэлийн талаар ярилцлаа.

-Танайх барилгын материалын үйлдвэрлэлийн салбарт импортын бүтээгдэхүүнийг орлох хийт хөнгөн бетон гулдмайн үйлдвэрийг 2014 онд ашиглалтад оруулсан байна. Үйлдвэрийн талаар мэдээлэл өгөхгүй юү?
-Манай компани нь барилгын материалын үйлдвэрлэлийн салбарт импортын бүтээгдэхүүнийг орлох хийт хөнгөн бетон гулдмайн үйлдвэрийг 2014 оны наймдугаар сард ашиглалтад оруулж, өнөөг хүртэл амжилттай үйл ажиллагаагаа явуулж байна. Бид эх орондоо хөнгөн бетон блокны сүүлийн үеийн  Евро стандартын технологийг нэвтрүүлэн хөндлөн буюу босоо чиглэлд 10 төрлөөр зүсэх технологийг нутагшуулж, стандартын дотор, гадна ханын дүүргэлтийн хийт хөнгөн бетон блокыг үйлдвэрлэж байна.
 -Хөнгөн бетон гулдмайн үйлдвэрийн хүчин чадал хэд вэ. Байгуулагдаад дөрвөн жил болжээ. Монголын зах зээлийн хэдэн хувийг хангах бүтээгдэхүүн үйлдвэрлэж байна вэ. Цаашид үйлдвэрлэлээ өргөжүүлэхээр төлөвлөсөн үү?
-Манай үйлдвэр Сонгинохайрхан дүүргийн 32 дугаар хорооны нутаг дэвсгэрт үйл ажиллагаагаа явуулдаг.  Бид бүрэн хүчин чадлаараа ажиллавал хоногт 600-700 шоо метрийг үйлдвэрлэх бөгөөд жилдээ нийт 200000 шоо метр бетон гулдмай үйлдвэрлэх хүчин чадалтай. Энэ нь Монголын барилгын материалын зах зээлийн 40 хувийг хангана гэсэн тооцоолол байдаг. Бид одоогийн байдлаар долоон автоклавтай хүчин чадлынхаа 30 хувийг л ашиглаж байна. Цаашид энэ технологиор импортын бүтээгдэхүүнийг орлох өрөө хоорондын хавтан, гулдмайг шинэ технологид нэвтрүүлэх тал дээр голлон анхаарч ажиллана.



-Хөнгөн бетон блокны сүүлийн үеийн технологийн талаар мэдээлэл өгөхгүй юү. Олон улсын зах зээлд ямар технологитой бүтээгдэхүүн хүлээн зөвшөөрөгдөж байгаа вэ. Барилгын компаниуд ямар бүтээгдэхүүнийг эрэлхийлж байна вэ?
-Барилгын салбарт хүч түрэн орж ирж буй барилгын материалын хамгийн эрэлттэй бүтээгдэхүүн бол яах аргагүй хавтгаалж хэлбэрийн дүүргэлтийн хавтангууд байх нь. Энэ хэрэгцээг дагаад манай зах зээлд шинээр хэд хэдэн төрлийн хавтангууд үйлдвэрлэж эхэлж байгаа. Харин хөнгөн бетон блокны хувьд манай компанийн үйлдвэрлэж буй автоклавын зүсэлтийн алдаагүй, D600 маркийн хөнгөн блокууд  барилгын компаниудад эрэлт ихтэй байгаа нь судалгаагаар нотлогдсон.

-Танай компани 2016 онд шинэчлэгдсэн MNS EN0771-4:2016 стандартыг хангаж, 2017 онд  “Шилдэг ногоон техник технологи нэвтрүүлэгч байгууллага”-аар тодорчээ. Дэлхий нийтээр ногоон барилга, ногоон технологи тийш хандаж байна. Ногоон техник технологийн ойлголтыг тайлбарлахгүй юу?
-Ерөөсөө “НОГООН” гэдэг  нь экологийн цэвэр бүтээгдэхүүнийг хэлж байгаа. Энэ нь дэлхийн жишигт нийцсэн сүүлийн үеийн дэвшилтэт техник технологийг нэвтрүүлэн хүн болон байгаль орчинд ээлтэй хор хөнөөлгүй бүтээгдэхүүн үйлдвэрлэхийг шаардсаар байгаа хэрэгцээ болно.
Манай компанийн хувьд, MNS EN0771-4:2016 стандартыг нэвтрүүлсэн бөгөөд  Дулааны IV цахилгаан станцын сангийн үнсийг хийт бетоны үйлдвэрлэлд амжилттай хэрэглэсэн нь тухайн үедээ хийт бетон үйлдвэрлэх технологид том амжилт болон тэмдэглэгдсэн байдаг.  Тус станц нь үүсгэн байгуулагдснаасаа хойш хаягдал үнсийг хуурай ба нойтон аргаар зайлуулж ирсэн байдаг. Нойтон аргаар зайлуулахдаа их хэмжээний талбайд сан байгуулж нөөцлөн хадгалдаг байж. Энэ нь байгаль орчинд сөрөг нөлөөтэй бөгөөд их хэмжээний ус, газар нутгийг хамарч, улмаар маш их хөрөнгө зарцуулагддаг байсан.  Харин бид хаягдал үнсийг хийт хөнгөн бетоны үйлдвэрлэлд нэвтрүүлж  ногоон технологи буюу эко бүтээгдэхүүн болгон үйлдвэрлэж байгаа явдал. Дулааны IV цахилгаан станцын үнсийг хийт хөнгөн бетон гулдмайд хэрэглэснээр дараах эерэг шинж чанарууд бүрддэг.
а. Эдлэлийн бэхжилт шахалтын бат бэх нэмэгдсэн.
б. Хуурай үеийн дундаж нягт буюу жин хөнгөрсөн.
в. Бэхжих үеийн халалтын температур нэмэгдэж, бэхжих хугацааг багасгана.
г. Түүхий эд материал цемент, шохой 8-10 хувиар хэмнэнэ.
д. Эдлэлийн зүсэлт сайжирч, өнгө үзэмж сайжирсан.

-Үйлдвэрлэлийн үйл ажиллагааны талаар илүү дэлгэрэнгүй мэдээлэл өгөхгүй юү?
-Автоклавын дулааны боловсруулалтаас гарах конденсацын усыг дахин ашиглаж хаягдлын буцах шугамд оруулж, технологид ашигласнаар хог хаягдалгүй байгаль орчинд ээлтэй үйлдвэр байгуулсан юм.  Дулааны боловсруулалтаар хаягддаг буцах шугамын саарал усыг дахин ашиглаж, оффисын барилгыг халаах, үйлдвэрийн зутан бэлдэх дамжлагад ашигладаг. Ингэснээр үйлдвэрийн технологийн дамжлагад хэрэглэх цэвэр усны хэрэглээг 40-50 хувиар хэмнэж чадсан. Мөн бид байгаль орчны бохирдлыг бууруулах, агаар, хөрсийг бохирдлоос хамгаалж, цахилгаан станцын хаягдал үнс, гөлтгөнийг эргүүлж ашиглахаас гадна, уурын зуухнаас гарах утааг цэвэршүүлэн, уурын зуухыг усан шүүлтүүрээр тоноглосон нь агаарын бохирдлыг бууруулсан нэг алхам болсон.

 
-Ярилцсанд баярлалаа. Бэлтгэсэн: Б.Бямбасүрэн
 
Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.