Барилгачдын баяртай “Барилга.МН” сэтгүүлийн 100 дахь дугаар таны гарт

Барилгачдын баяртай “Барилга.МН” сэтгүүлийн 100 дахь дугаар таны гарт

   Зөнгөөрөө урсах горхины чимээ, зөрж өнгөрөх хүүхэд багачуудын баясал, эрдэм номын дуу, шаргал навчсын хийсэх чимээгээр хөг нэмсэн, дулаахан намрын энэ л өдөр “Барилга.МН” сэтгүүлийнхээ 100 дахь дугаарыг эрхэм уншигчдынхаа гарт хүргэж байна.

   Монгол Улсад Орчин цагийн барилгын салбар үүсч хөгжсөний 92 жилийн ой, Барилгачдын баяр давхацсан энэ л өдрүүдэд “Барилга. МН” сэтгүүлийнхээ 100 дахь дугаарыг уншигч, захиалагчиддаа толилуулж байгаадаа баяртай байна.

  “Барилга.МН” сэтгүүл 2010 оны гуравдугаар сард анхны дугаараа хэвлүүлснээс хойш өнөөдрийг хүртэл найман жилийн турш сар бүр тасралтгүй хэвлэгдэж, салбарынхаа цогц мэдээ мэдээллийг хүргэдэг барилгын салбарын тэргүүлэх тогтмол хэвлэл болжээ.



   Сэтгүүлийн 100 дахь дугаарт өнгөрсөн сард болж өрнөсөн онцлох үйл явдал, есдүгээр сард болох чухал үйл явдлууд, статистик мэдээлэл, үнэ ханш зэргийг онцолсон байгаа. Мөн “Дугаарын зочин” буланд “NCD Group” ХХК-ийн Гүйцэтгэх захирал, Монголын Барилгын Үндэсний Ассоциацийн Дэд ерөнхийлөгч Б.Хүрэлхүү оролцож, барилгын салбарын тухай болон өөрийнхөө ажил амьдралын хэв маягаас энгийн сайхан яриа өрнүүлснийг уншаарай.

    Харин “Ажлын нэг өдөр” ярилцлагын буланд Монголын барилгын салбарын тухай цуврал судалгааг хийж, олон улсын сэтгүүлд нийтлүүлсэн Солонгосын “Донггук” их сургуулийн судлаач оюутан, инженер Ө.Рэнцэндоржийн сонирхолтой ярилцлага нийтлэгдлээ.



    Түүнчлэн хүйтэн цаг уурын нөхцөлд бетон зуурмаг бэлтгэх зөвлөмж, амины орон сууцандаа гэр бүлийнхээ тав тухтай орчныг хэрхэн бүрдүүлэх тухай Япон архитекторуудын үнэтэй зөвлөгөө, Гэр хорооллыг дахин төлөвлөхдөө хөрш орчныг сайжруулж, тогтвортой хөгжлийг хангахад анхаарах зүйлсийг дэвшүүлсэн судлаачийн бүтээл гээд олон сонирхолтой сэдвүүдийг хөндлөө.

    Мөн 2019 оны интерьерт ямар өнгө зонхилохыг, Монголдоо хуванцар цонх бэлдэж, хуванцар хоолой үйлдвэрлэж буй тухай, нүхэн жорлонг хэрхэн эко болгон, бордоо гаргаж авах боломж, нүүрсний утааг бууруулахаар төр засгаас ямар ажил төлөвлөж буй тухай болон сонирхолтой мэдээ нийтлэлийг багтаасан “Барилга.МН” сэтгүүлийн 100 дахь дугаарыг таалан уншина уу.

   Тариан түрүүний болц гүйцэж, үндэстэй бүхэн ургаж бойжсон, элбэг хангалуун, баяр жаргалын бэлгэдэл алтан шаргал намрын мэндийг хүргэж, эрхэм харилцагч, уншигч, барилгын салбарт бизнес эрхлэгч та бүхэнд сайн сайхныг хүсье.












 
Эх сурвалж: Барилга.МН сэтгүүл

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.