Т.Цэдэн-Иш: Төсөл, хөтөлбөр хэрэгжүүлэхдээ хүн амын нягтаршил, бодит үнэ, чанарыг нь харгалздаг

Т.Цэдэн-Иш: Төсөл, хөтөлбөр хэрэгжүүлэхдээ хүн амын нягтаршил, бодит үнэ, чанарыг нь харгалздаг
Монгол Улсад барилгын салбар үүсч хөгжсөний 92 жилийн ойн хүрээнд өнгөрсөн наймдугаар сарын 24-26-нд зохион байгуулсан “Барилга Орон Сууц 2018” үзэсгэлэн яармаг уламжлал ёсоор амжилттай болж өндөрлөлөө. Үзэсгэлэнд шилдгийн шилдэг оролцогчоор зургаан байгууллага шалгарлаа. Тэдний нэгээр барилгын салбарт үл хөдлөх хөрөнгийн худалдааны чиглэлээр 2013 оноос үйл ажиллагаагаа явуулж буй “Улаанбаатар пропертиз” ХХК шилдэг төсөл, хөтөлбөр хэрэгжүүлэгчээр шалгарсан юм.
Тус компани нь үүсгэн байгуулагдсан цагаасаа үл хөдлөх хөрөнгийн салбарт томоохон төслүүд хэрэгжүүлэн ажиллаж байна. Тухайлбал, анхны хэрэгжүүлсэн төсөл нь залуусын хотхоноор нэрлэгдсэн Х-Apartment орон сууцны хотхон байсан бол дараагийнх нь мөн олны таашаалд нийцсэн “SKY APARTMENT” орон сууцны хотхон байв. Ингээд тус компанийн Борлуулалтын албаны дарга Т.Цэдэн-Иштэй өмнө хэрэгжүүлсэн, мөн шинээр төлөвлөж буй төсөл, хөтөлбөрийнх нь талаар товч ярилцлаа.

- “Барилга Орон Сууц 2018” үзэсгэлэн яармагт амжилттай оролцож, шилдэг, төсөл хөтөлбөр хэрэгжүүлэгч байгууллагаар шалгарсанд баяр хүргэе. Шилдгээр шалгарахад ямар төсөл, хөтөлбөр голлох нөлөө үзүүлсэн гэж дүгнэж байна вэ?

-Юуны өмнө энэхүү нэр хүндтэй шагналын эзэн болсондоо баяртай байгаагаа илэрхийлмээр байна. “Барилга Орон сууц 2018” үзэсгэлэн яармагийг жил бүр шинэ өнгө төрхтэйгээр зохион байгуулж, бидний ажлыг олон нийтэд таниулж өгдөг танай хамт олонд баярлалаа.

Манай компани үл хөдлөх хөрөнгө, худалдаа үйлчилгээний чиглэлээр 2013 оноос үйл ажиллагаагаа явуулж эхэлсэн. Бид нийслэлийн хүн амын нягтаршил, орон сууцны эрэлт, хэрэгцээг судалж, ард түмний хэрэгцээнд нийцсэн, бодит үнэтэй, чанартай орон сууц борлуулахыг эрмэлздэг. Тухайлбал, бидний анхны төсөл болох залуу гэр бүлд зориулан япон архитекторын орон зайн төгс шийдлээр барьсан нийт 413 айлын залуусын “Х APARTMENT” хотхон маш амжилттай хэрэгжсэн. Дараа нь бид Герман чанарыг эрхэмлэн барьсан 72 айлын “SKY APARTMENT”, итали архитекторын зураг төслөөр Европ стандартын дагуу 374 айлын “GRANDEVILLA” орон сууцыг барьж бүрэн ашиглалтад оруулаад байна.

Бид хэрэглэгчдэд илүү ойр байх үүднээс олон төсөл санал болгодог. Зөвхөн “Улаанбаатар пропертиз” ХХК-ийн төслүүдэд зориулсан төлбөрийн хамгийн таатай нөхцөлийг санал болгодог төсөл ч байна. Үүнээс дурдвал, Монголд анх удаа жилийн зургаан хувийн хүүтэй зээлийг санаачлан “Централ Капитал” ББСБ-тай хамтран хэрэгжүүлж байгаа явдал юм. Ипотекийн найман хувийн хүүтэй зээлийн хөтөлбөрөөс ч бага хүүг бид хэрэглэгчдэдээ санал болгодог байгаа биз.

-Амжилтаа бататгах мөн амжилтад хүрэхэд төлөвлөгөө, шинэ санаа, баг хамт олон чухал байдаг. Танай компани үл хөдлөх хөрөнгийн худалдааны чиглэлээр өөр шинэлэг ямар төсөл, хөтөлбөр хэрэгжүүлэх гэж байгаа вэ?

-Бид хэрэгжүүлсэн төсөл, хөтөлбөр бүр дээрээ судалгаа хийж, хэрэглэгчдийн тав тухад бүрэн нийцсэн орон сууц барьж байгуулахаар хичээнгүйлэн ажиллаж байна. Хэрэгжүүлэхээр төлөвлөж буй төсөл, хөтөлбөрийн тухайд, япон архитекторын орон зайн төгс шийдэл бүхий зураг төслөөр барьж буй 17 давхар орон сууцны "X-Апартмент" хотхоны 2 дугаар ээлжийг, “Скай Апартмент-2” 17 давхар орон сууцыг тус тус ирэх оны  нэгдүгээр улиралд ашиглалтад оруулахаар төлөвлөж байна. Мөн Улаанбаатар хотын А зэрэглэлийн бүсэд буюу “Теди” төвийн урд талд байрлалтай "WHITE HOUSE RESIDENCE" “duplex& apartment” орон сууцны барилгыг энэ оны 10 дугаар сард ашиглалтад оруулна.

-Одоо ажиллаж буй МН Тауэр” оффис, үйлчилгээний болон “Гранде вилла” орон сууцны төслийн онцлогийн талаар мэдээлэл өгөхгүй юу?

-“MN TOWER” төсөл нь өндөр зэрэглэлийн оффисийн түрээсийн нийт 20 давхар барилга юм. Нэгээс зургадугаар давхарт үйлчилгээний газруудыг нэг дор төлөвлөсөн бол 7-16 давхарт оффисууд байрладаг. “MN TOWER”-т оффис түрээсэлснээр 100 хүний багтаамжтай хурлын заал, 20 хүртэлх хүний багтаамжтай VIP өрөөг үнэ төлбөргүй ашиглахаас гадна хотыг 360 градусаар тольдох боломжийг 17 давхрын “MN Art gallery” олгоно. Мөн өөрийн хүссэн зохион байгуулалтыг гүйдэг хананы тусламжтай гаргах боломжтой гэдгээрээ бусдаас давуу талтай. “Гранде вилла” хотхон нь хотын төв цэг болох Энхтайваны гүүрний баруун талд дунд голын хөвөөнд байрлалтай. Хамгийн том давуу тал нь чанарыг эрхэмлэн, итали архитекторын зураг төслөөр европ стандартын дагуу барьсанд оршино. “Гранде вилла” хотхоны өрөөний зохион байгуулалтыг ойролцоох оршин суугчдын судалгаан дээр үндэслэн, 2-3 өрөө орон сууц төлөвлөж өгсөн нь хүмүүсийн хэрэгцээнд бүрэн нийцэж чадсан.

-Үл хөдлөх хөрөнгийн салбарт хүч үзэж байгаагийн хувьд зах зээлийн судалгаа хийсэн байх. Үл хөдлөх хөрөнгө худалдан авахад хамгийн нэгдүгээрт байршил гэсэн хэвшмэл ойлголт ард хоцрогдож байх шиг. Монгол Улсад ямар төрлийн орон сууцыг худалдан авагчид илүүтэй сонирхож байна вэ?

- Бидний хийсэн судалгаанаас үзэхэд хүмүүс үл хөдлөх хөрөнгө худалдан авахдаа аюулгүй, тав тухтай орчин, чанарыг илүүд үзэн эрхэмлэдэг болжээ. Барилгын салбар хурдацтай хөгжихийн хэрээр хуучны орон сууц гэсэн ойлголт эвдэгдэж, нэгдсэн төлөвлөлт цогц үйлчилгээг шингээдэг болсон. Энэ нь мэдээж, нэгдсэн харуул хамгаалалт, оршин суугчдын амьдрал хэрэгцээ шаардлагад нийцсэн үйлчилгээний газрууд, сургууль цэцэрлэгийг төлөвлөж байгааг хэлж байна. Хэрэглэгчид ч орон сууц худалдан авахдаа доторх орчноос илүүтэй гадна орчин, дэд бүтцэд анхаарлаа хандуулан сонголт хийдэг болсон.

-Ярилцсанд баярлалаа.

Б.Бямбасүрэн
Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.