“Барилга Орон Сууц 2018” үзэсгэлэн яармагийн Шилдэг оролцогчид шагналаа гардлаа

“Барилга Орон Сууц 2018” үзэсгэлэн яармагийн Шилдэг оролцогчид шагналаа гардлаа

   Гурван өдрийн турш амжилттай зохион байгуулагдсан “Барилга Орон Сууц 2018” үзэсгэлэн яармаг өндөрлөж, үзэсгэлэнгийн шилдэг оролцогч байгууллагуудаа тодруулан шагнал гардуулах ёслолын ажиллагаагаа хийлээ.
           
   Орчин цагийн барилгын салбар манай улсад үүсч хөгжиж эхэлсэний 92 жилийн ойн хүрээнд явагдсан уг үзэсгэлэнгийн ерөнхий зохион байгуулагчаар “Барилга.МН”, хамтран зохион байгуулагчаар Барилга, хот байгуулалтын яам, дэмжигч байгууллагаар Барилгын хөгжлийн төв болон Монголын барилгын үндэсний ассоциаци зэрэг байгууллагууд ажилласан юм.


           
   Барилга, үл хөдлөх хөрөнгө, орон сууц, барилгын материалын үйлдвэрлэл, импорт, дэвшилтэт технологийн худалдаа эрхлэгчид, интерьер болон экстерьер заслын, амины орон сууц барьдаг гээд барилгын салбарын бүтээн байгуулалтад хувь нэмрээ оруулж буй 120 гаруй байгууллага оролцож, бүтээгдэхүүн үйлчилгээгээ олон нийтэд танилцууллаа.
           
   Энэ жилийн намрын үзэсгэлэнгээс барилгын салбар сэргэж эхэлсэн тухай таатай мэдээлэл сонорыг мялааж буй нь онцлох сэтгэгдэл байсан юм. Байр, орон сууц сонирхож байгаа иргэдийн хувьд зөвхөн ипотекийн найман хувийн зээлийг хүлээгээд суух биш, төсөл хэрэгжүүлэгчдийн зүгээс таатай олон боломжийг санал болгож байлаа.


           
   Ипотекийн зээлийн санхүүжилтээс үүдсэн хүндрэлийг компаниуд болон иргэд ч өөрсдөө даван гарах янз бүрийн шинэ санаачилгуудыг гаргасан байв. Компанийн хувь лизинг,  урьдчилгаа төлбөрийн уян хатан байдал, хөнгөлөлт урамшууллуудыг үзэсгэлэнд оролцсон орон сууцны 40 гаруй компаниас зарласан юм.
           
   Ингээд барилгын салбарын худалдаа, зах зээлийг идэвхжүүлж бизнес эрхлэгчдийг худалдан авагчидтай нь шууд холбосон энэхүү үзэсгэлэн яармагийн хаалтын ажиллагааны үеэр шагналаа гардан авсан Шилдэг оролцогч байгууллагуудыг танилцуулъя.

Шилдэг төсөл, хөтөлбөр хэрэгжүүлэгчээр шалгарсан “Улаанбаатар Пропертиз” компани нь үл хөдлөх хөрөнгийн худалдааны чиглэлээр үйл ажиллагаа явуулахаар 2013 онд байгуулагдсан бөгөөд шилдэг, шинэлэг төсөл хөтөлбөрүүдийг нийслэл хотноо хэрэгжүүлж буй үлгэр жишээ хамт олон юм.



Шилдэг бүтээгдэхүүнээр эрчим хүч, дулааны зардлыг 70 хувь хүртэл хэмнэх, байгаль орчинд ээлтэй чанараараа нобелийн шагнал хүртсэн VACUUM шинэ үеийн бойлер шалгарлаа. Энэхүү бойлер, халаалтын төхөөрөмжүүдийг “Графен Овнерс” компани Монголынхоо хэрэглэгчдэд хүргэж байна.



Шилдэг дэвшилтэт технологи нэвтрүүлэгчээр шалгарсан “Сан трейдинг групп” нь дэлхийн шилдэг шинэ технологийг санаачлан хэрэгжүүлсэн ОХУ-ын алдарт Корунд брэндийн үнэргүй, хүний эрүүл мэндэд ээлтэй эко будгийг дотоодын зах зээлдээ нийлүүлж байна.



Шилдэг шинэ орон сууцаар энэ жилийн үзэсгэлэнд “Улз Буянт пропертиз” компанийн оршин суугчдад санал болгож буй “VIP Residence” хотхон тодорлоо. Уг хотхон нь Богд хан уулын бэлтэй залган орших төдийгүй хотхоны 60 хувийг эзлэх цэцэрлэгт хүрээлэн, ногоон байгууламж усан хүрхрээ, автомашины хөдөлгөөнөөс тусгаарлагдсан хүүхдийн тоглоомын талбай, спорт талбай, хиймэл нуур, эрүүл цэвэр орчин бүхий өндөр зэрэглэлийн орон сууцны цогцолбор хотхон юм.



Шилдэг үйлдвэрлэгч шагналыг хүртсэн "Жи Эс Дорнын хөгжил" компани нь импортын бүтээгдэхүүнийг орлох хийт хөнгөн бетон блокийг үйлдвэрлэж, бүтээн байгуулагчдаа чанартай бүтээгдэхүүнээр хангаж буй шилдэг үйлдвэрлэгч юм.



Шилдэг ханган нийлүүлэгчээр шалгарсан “Их гурван марал” ХХК нь Монголынхоо барилгын салбарт гол нэрийн 21 төрлийн бүтээгдэхүүнийг нийлүүлдэг барилгын зах зээлийн тогтвортой ханган нийлүүлэгч юм. Мөн шинээр зургаан нэр төрлийн барилгын материалыг нэвтрүүлж, үйл ажиллагааныхаа цар хүрээг өргөжүүлсээр байна.



Шагнал гардуулах ёслолын ажиллагааны төгсгөл хэсэгт үзэсгэлэн яармагийн зохион байгуулагчийн зүгээс Ерөнхий ивээн тэтгэгчээр хамтран ажилласан “Номин констракшн девелопмент групп” компанид Талархал гардуулсан юм. Тус компани нь барилгын салбарт тогтвортой үйл ажиллагаа явуулж байгаа бөгөөд “Ногоон ирээдүйг бүтээнэ” эрхэм зорилгынхоо хүрээнд байгальд ээлтэй материал, технологи ашиглаж, эрчим хүчинд хэмнэлттэй “Ногоон барилга”-ыг бүтээн байгуулж, нийгэм олон нийтийн дунд байгаль орчноо хайрлан хамгаалах ногоон хөгжлийн үзэл баримтлалыг түгээн дэлгэрүүлэхээр зорин ажиллаж буй хамт олон юм.



Барилгын зах зээл, худалдааг идэвхжүүлсэн “Барилга Орон Сууц 2018” үзэсгэлэн яармаг ийнхүү өндөрлөлөө. Ирэх он 4 дүгээр сард зохион байгуулагдах хаврын хамгийн том, хамгийн олон оролцогч, үзэгчтэй “Barilga Expo 2019” олон улсан яармагт эргэн уулзацгаая.















































Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.