Барилгын тусгай зөвшөөрөл ба агаарын бохирдлыг бууруулах чиглэлээр уулзалт семинар болно

Барилгын тусгай зөвшөөрөл ба агаарын бохирдлыг бууруулах чиглэлээр уулзалт семинар болно
     Монгол Улсад шинэ үеийн барилгын салбар үүсэн байгуулагдсаны 92 жилийн ой, Барилгачдын баярын хүрээнд "Барилга Орон Сууц 2018" үзэсгэлэн яармаг маргааш буюу 2018 оны 08 дугаар сарын 24-нөөс 26-ны өдрүүдэд Мишээл экспо төвд зохион байгуулагдаж байна.

    Уг үзэсгэлэн нь барилгын салбарын аж ахуйн нэгж байгууллагуудынхаа бүтээгдэхүүн үйлчилгээг иргэд, олон нийтэд танилцуулахаас гадна салбарынханд холбогдолтой олон төрлийн уулзалт, семинаруудыг тайзан дээр явуулах юм.

      Тэдгээрээс үзэсгэлэнгийн хоёр дахь өдөр буюу 08 дугаар сарын 25-ны Бямба гарагт болох барилгын тусгай зөвшөөрөл болон агаарын бохирдлыг бууруулахад чиглэгдсэн дараах хоёр семинарын талаар танилцуулъя.

14:20-14:40 цагт болох “Агаарын бохирдлыг бууруулахад агаар-агаарын дулааны насосыг ашиглах нь” сэдэвт илтгэлийг ШУТИС-ийн Эрчим  хүч хэмнэлтийн төвийн захирал Б.Мөнхбаяр тайзан дээр танилцуулж, олон нийтэд мэдээлэл өгнө. Тиймээс зөвхөн барилгын салбарынхан гэлтгүй амины орон сууц барих гэж буй, барилга захиалан бариулах гэж байгаа иргэд,  мэргэжилтнүүд, байгууллагууд та бүхэнд хэрэгтэй зөвлөгөөг өгнө.
 
14:40-15:00 цагт Барилгын тусгай зөвшөөрлийн талаарх мэдээллийг Монголын барилгын үндэсний ассоциацийн Тусгай зөвшөөрлийн хэлтсийн дарга М.Энхбаатар мөн тайзан дээр танилцуулах юм. Тус ассоциациар ахлуулсан төрийн бус байгууллагуудын түншлэл Барилга, Хот Байгуулалтын Яамтай байгуулсан гэрээний дагуу барилгын зарим үйл ажиллагааны тусгай зөвшөөрлийг олгож эхэлсэн билээ. 

   Үүнтэй холбоотойгоор Барилгын ажил гүйцэтгэх тусгай зөвшөөрлийн асуудлаар урьдчилсан дүгнэлт гаргах Ажлын хэсгийнхэн энэ оны 3 дугаар сарын 7-ны өдрөөс хойш нийт 22 удаа хуралдаж, аж ахуйн нэгжүүдийн хүсэлтийг хэлэлцэн шийдвэр гаргажээ. 

   Дээрх хоёр сэдвээр дэлгэрэнгүй мэдээлэл авахыг хүсвэл Мишээл экспо төвд 3 өдөр үргэлжлэх "Барилга Орон Сууц 2018" үзэсгэлэн яармагт хүрэлцэн ирэхийг урьж байна.

 

Холбоотой мэдээ