Түрээсийн орон сууцнууд ирэх аравдугаар сард ашиглалтад орно

Түрээсийн орон сууцнууд ирэх аравдугаар сард ашиглалтад орно


Засгийн газрын 2016-2020 оны мөрийн хөтөлбөрт 20 мянган түрээсийн орон сууцны сан бүрдүүлэх зорилт тусгагдсан. Зорилтын хүрээнд Хөгжлийн банкны санхүүжилтээр баригдаж байгаад зогссон 1500 айлын орон сууцыг ирэх аравдугаар сард ашиглалтад оруулахаар ажиллаж байгаа юм байна.
    Тодруулбал, Улаанбаатар хотод эхлүүлсэн 972 айлын орон сууц, Хөвсгөл, Орхон, Дундговь, Говь-Алтай аймгуудад эхлүүлсэн 590 айлын орон сууцны ажлыг дуусгахаар төлөвлөжээ. 
Ирэх аравдугаар сард дээрх 1500 айлын түрээсийн орон сууц шийдэгдсэн тохиолдолд иргэд Төрийн орон сууцны корпариацид хүсэлтээ тавин гурван жилээр гэрээ хийж түрээслэх боломжтой. Журамд зааснаар 80 метр квадратаас доош байруудыг  дунджаар сарын 300-400 мянга орчим төгрөгөөр түрээслүүлэх юм байна. Харин хөдөө орон нутагт бол харьцангуй хямд байлгахаар албаны хүмүүс ярилцаж байгаа аж.  
Түрээсийн орон сууцанд хамрагдахын тулд та дараах шаардлагыг хангасан байх ёстой. Үүнд: 

  • Эрхзүйн бүрэн чадамжтай, 21 нас хүрсэн
  • Тухайн орон нутагт түр буюу байнга оршин суудаг 
  • Тогтмол орлоготой байх, орлого нь түрээсийн барьцаа, түрээсийн төлбөр болон сууцны ашиглалтын зардлаа төлөх боломжтой.
  • Гэр хороололд амьдардаг,үндсэн өмчлөлийн хувиар өөрийн өмчлөлийн инженерийн бүрэн хангамжтай орон сууцгүй байх.
Улаанбаатарт байр түрээслэх гэж байгаа бол ‘Төрийн орон сууцны корпораци’-д, орон нутагт байр түрээслэх бол аймаг, нийслэлийнхээ Засаг даргын тамгын газарт дараах бичиг баримтыг бүрдүүлж өгөх ёстой. Үүнд: 
  • Иргэний цахим үнэмлэхийн хуулбар 
  • Оршин суугаа хаягийн болон ам бүлийн талаарх тодорхойлолт / тухайн баг, хороонд хэдэн жил амьдарч байгааг тодорхойлсон байх/
  •  Журмын хавсралт маягтын дагуу гаргасан өргөдөл
  • Орлого тодорхойлох баримт бичиг /нийгмийн даатгалын дэвтэр, хувиараа хөдөлмөр эрхэлдэг бол орлогыг нотлох баримтын хуулбар/
  • Үндсэн өмчлөлийн хувиар өөрийн өмчлөлийн инженерийн бүрэн хангамжтай орон сууцгүй болохыг тодорхойлсон аймаг, дүүргийн эд хөрөнгийн эрхийн бүртгэлийн байгууллагын лавлагаа
  • Байгалийн гамшиг гэнэтийн аюулын нөлөөллөөс орон гэргүй болсон иргэд аймаг, нийслэлийн гамшгаас хамгаалах төрийн байгууллагын дүгнэлтийг хавсаргасан байх 

Одоогоор өргөдөл авч эхлээгүй бөгөөд аравдугаар сард орон сууцнууд ашиглалтад орохоор нэгдсэн журмаар түрээслүүлэх ажил эхлэх юм байна.

 

Эх сурвалж: BARILGA.MN

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.