Барилгын материалын сорилт шинжилгээний лаборатори барих ажлыг зургаан аймагт эхлүүлжээ

Барилгын материалын сорилт шинжилгээний лаборатори барих ажлыг зургаан аймагт эхлүүлжээ

   Улсын хэмжээнд энэ оны байдлаар нийт 6627 орон сууц ашиглагдаж байгаагаас ашиглалтын шаардлага хангахгүй, газар хөдлөлтөд тэсвэргүй нь тогтоогдсон нийтийн орон сууцны зориулалттай барилга нийслэлд 349, орон нутагт 702, үүнээс мэргэжлийн хяналтын байгууллагаас ашиглахыг хориглосон нийслэлд 234, орон нутагт 221 барилга байна гэсэн судалгаа гарчээ. Мөн өнгөрсөн онд аймаг, орон нутагт  хийсэн нэгдсэн судалгаагаар нийт барилгын 10,5 хувь нь  ашиглалтын шаардлага хангахгүй, газар хөдлөлтөд тэсвэргүй болох нь холбогдох байгууллагуудын хийсэн нэгдсэн үзлэг шалгалтаар тодорхойлогдсон.

   Жил бүр хэдэн арван барилга хот, хөдөөд нэмэгдсээр байгаа хэдий ч чанарын асуудал орхигдсоор байгааг дээрх баримтуудаас харж болохоор байна. Тэгвэл Барилга, хот байгуулалтын яамнаас барилгын материал үйлдвэрлэлийн салбарт шинжлэх ухаан, техникийн стандарт шаардлагыг хангасан лаборатори байгуулах ажлыг эхлүүлжээ. Тодруулбал, Засгийн газрын тогтоолын хэрэгжилтийг хангах зорилтын хүрээнд одоогийн байдлаар Өвөрхангай, Архангай, Хэнтий, Өмнөговь, Ховд, Баян-Өлгий аймгуудад  барилгын материалын сорилт, шинжилгээний лабораторийн барилга байгууламжийн ажлыг эхлүүлээд байна.

   Аливаа барилга, байгууламжийн он удаан жил орших эдэлгээний хугацаа, аюулгүй байдал, чанар, өнгө үзэмж нь тухайн барилгыг бүтээж бий болгоход хэрэглэсэн материалын чанар, шинж байдлаас шууд хамаардаг. Архитектор, инженерүүдийн тооцож гаргасан зурж бүтээсэн төслийг бодит барилга, байгууламж болгож ашиглалтын хугацаанд тохиолдож болзошгүй байгаль, цаг уурын нөлөөлөл, онц ноцтой хүчин зүйлийг тэсвэрлэх нөхцөлийг тухайн барилга байгууламжид хэрэглэсэн материал бүрийн чанарын үзүүлэлт хангаж өгдөг талаар барилгын салбарын мэргэжилтнүүд олонтаа ярьдаг. Мөн түүнчлэн иргэдийн эрүүл, аюулгүй орчинд амьдрах нөхцөлийг сайжруулахад дээрх бүтээн байгуулалт онцгой ач холбогдолтой хэмээн иргэд, салбарын эрдэмтэд, судлаачид сайшаан хүлээн авч байгаа ажээ.

Б.Наранчимэг
Эх сурвалж: Барилга, хот байгуулалтын яам

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.