​Шинэлэг, чанартай бүхнийг Монголдоо нэвтрүүлнэ

​Шинэлэг, чанартай бүхнийг Монголдоо нэвтрүүлнэ
         “BARILGA EXPO” Олон улсын үзэсгэлэнгийн 2009, 2012-2014, 2016, 2018  “Шилдэг” байгууллагаар зургаан удаа шалгарч, барилгын салбарт 22 дахь жилдээ тогтвортой үйл ажиллагаагаа явуулж байгаа Монголын “анхдагч” хэмээх тодотголтой, хөөсөнцөр хавтан болон чулуут өнгөлгөөний үйлдвэр “Пирамид Индастри” компаниар зочиллоо.

Шинэчлэн өөрчлөгдсөөр байгаа өнөө цагт барилга байгууламжид ашиглах түүхий эдэд тавигдах шаардлага өндөр болсон. Энэ шаардлагыг Монголынхоо томоохон бүтээн байгуулалт төдийгүй олон улсын төсөл хөтөлбөрт хамтран ажиллаж буй Монголын “TOP-50” барилгын материал үйлдвэрлэгчийн нэг “Пирамид Индастри”-ийн бүтээгдэхүүн бүрэн хангаж, чанар чансаагаа харуулсаар байна.

Мөн тэд 1998 онд Барилга Архитектур корпорацитай хамтран Монгол Улсын хөөсөнцөр хавтангийн анхны стандартыг боловсруулсан билээ.


Борлуулалт хариуцсан захирал Т.Төвбаатар:

    Манай үйлдвэр 1996 онд хөөсөнцөр хавтангийн үйлдвэрээ нээж, 2012 онд чулуут өнгөлгөөний үйлдвэрийг ашиглалтад оруулсан барилгын материалын Монголын ууган компаниудын нэг. Аливаа улс орны хөгжил гэдэг тухайн улсын үндэсний үйлдвэрлэлээс ихээхэн хамаардаг. Хүн бүхэн л үндэсний үзэл гэж ярьж байна. Үндэсний үзэл гэдэг бол ямар нэгэн жагсаал цуглаан аль эсвэл хэн нэгнийг шүүмжлэх, зүгээр нэг ярихын нэр биш юм. Үндэсний үзлийг би эх оронч худалдан авалтаас эхэлдэг гэж үздэг. Тиймдээ ч дотоодын үйлдвэрлэлээ дэмжиж бүтээгдэхүүн үйлчилгээг сонгон хэрэглэдэг байх нь эх орондоо оруулж буй хамгийн том хөрөнгө оруулалт юм. Энэ л үзлийг хүн бүр өөртөө төлөвшүүлээсэй гэсэн хүсэл эрмэлзэлээр бид бүтээгдэхүүн үйлчилгээгээ зах зээлд нийлүүлж, Монгол мөрөөдлийн бодит биелэлийн төлөө зорилт тавин ажиллаж байна.

Бид 2011 онд хүчин чадлаа нэмэгдүүлэн хоногт 600, жилд 180 000 метр куб дулаалгын EPS хөөсөнцөр хавтан үйлдвэрлэх хүчин чадалтай болгож, технологийн шинэчлэл хийсэн. Цаг хугацаа биднийг хэзээ ч хүлээхгүй дэлхийн өнцөг булан бүрт технологийн шинэчлэл хийгдэж бүхий л салбар хувьсан өөрчлөгдөж байна. Тиймдээ ч бид энэ онд дахин чулуут өнгөлгөө, хөөсөнцрийн үйлдвэртээ хоёуланд нь нэгэн зэрэг шинэчлэлт хийхээр ажиллаж байна. Нийгэм маань байнгын хувьсан өөрчлөгдөж, худалдан авагчдын хандлага, материалын тухай ойлголт, мэдлэг өргөжиж байгаа нь маш том дэвшил юм. Энэ хандлага нь үйлдвэрлэгчдээс илүү өндөр чанарыг шаардах болсон нь материалын чанартаа анхаарч цаг алдалгүй шинэчлэл хийх ёстойг бидэнд үргэлж сануулдаг.

Дашрамд дурдахад үйлдвэрийн маань бүх техник, бүтээгдэхүүний технологи, сав баглаа боодол БНСУ-ынх юм.

Сүүлд шинээр “хар хөөсөнцөр хавтан”-г зах зээлд нийлүүлж эхэлсэн. Энэ нь дулааны үзүүлэлт болон гал дэмжихгүй чадвар нь маш өндөр, бат бөх байдаг. Гадна фасаданд хар хөөсөнцрийг 8см хийх нь цагаан хөөсөнцрийг 10 см хийхтэй тэнцдэг.
Харин чулуут өнгөлгөөний тухайд угааж болдог ч манай оронд тэр болгон барилгын гадна фасадаа угаагаад байдаггүй учир шороо тоосонд дарагдаж өнгө үзэмж алдагддаг. Иймд бид өнгө алдахгүй болгоход энэ долоон сарын сүүлээр техникийн шинэчлэлт хийхээр бэлтгэл ажлаа бүрэн хангаад байна. Чулуут өнгөлгөө нь өөрөө хямд бөгөөд нарийн ур чадвар шаардахгүй хурдан хийгддэг, үндсэн түүхий эд нь чулуу учраас он удаан жилийн эдэлгээтэй, хөлдөхгүй мөн мөөгөнцөр тогтохгүй. Нийт гадна болон дотор чулуут өнгөлгөөний есөн төрлийн материалыг үйлдвэрлэж байна.
Бид Монгол улсын шилдэг гэсэн бүхий л бүтээн байгуулалт, гадны төсөл, хөтөлбөрт хамтран ажилладаг. Тухайлбал: NCD групп, MCS пропортиз, Цаст констракшн, Пума, Дельта констракшн, Суруга Монгол, Бэрэн групп, Тэдмент констракшн, Орчлон констракшн зэрэг компаниудтай байнгын хамтын ажиллагаатай ажиллаж, бараа бүтээгдэхүүнээ нийлүүлж байна.







“Пирамид индастри”-гийнхан манай сурвалжлагын багийнхныг үйлдвэрийнхээ үйл ажиллагаа, шат дамжлага бүртэй танилцуулсан юм. Биднийг эхлээд хамгийн анхны үйлдвэр нь болох хөөцөнцөр хавтангийнхаа үйлдвэрт зочилууллаа.

Хөөсөнцөр хавтан нь 6м урт, 1.20см өргөн, 60см зузаантайгаар болон 3м урттай, 1.20 өргөн, 60 см зузаантай гэсэн хоёр хэмжээгээр үйлдвэрлэгддэг. Боловсруулах шат нь маш энгийн бөгөөд үйлдвэрлэх, хатаах, зүсэх гэсэн гурван үндсэн дамжлага цехтэй. Үйлдвэрийн дамжлага тус бүр орчин үеийн өндөр технологийн бүрэн болон хагас автомат машинаар тоноглогдсон учир үйлдвэрт ердөө 3-4 хүний оролцоотойгоор хоногт 600 метр куб хөөсөнцөр хавтанг үйлдвэрлэдэг юм байна. Тэдний бүтээгдэхүүний бусдаас ялгарах онцлог нь галын шаталтыг дэмждэггүй тусгай нэмэлт бодистой, дулаан алдагдлыг бууруулах ам дарах ховилтойгоор хийдэг байна.





Хөөсөнцөр хавтанг эхлээд боловсруулах дамжлагаар оруулж, тусгай зориулалтын тор руу үлээлгэнэ. Эндээс тусгай хэвлэх машинд түүхий эдээ оруулахдаа эхлээд дотор агаарыг соруулж байгаад оруулсны дараа агаарыг нь дахин соруулан, уураар жигнэснээр хавтан бэлэн болдог аж. Эцэст нь хатаалгад 3-4 хоног байлгадаг гэнэ.

Энэ төрлийн үйлдвэр хөөсөнцөр хавтангаа боловсруулж, зүсээд л шууд хэрэглэгчдэд нийлүүлж байгаа харагддаг шүү дээ. Яг иймд нөхцөл байдлаас л сүүлийн үеийн хөөсөнцөр хавтан ашигласан фасад нурах, дулаан алдагдах  явдал гардаг гэж үйлдвэрийн ахлах онцолж байсан нь тод санагдана.



Үүний дараа “чулуут өнгөлгөөний материал”-ын үйлдвэртэй танилцлаа. Тус үйлдвэр нь хоногт 1000 ширхэг сав бүтээгдэхүүн үйлдвэрлэх хүчин чадалтай бөгөөд бүх төрлийн чулуут өнгөлгөөний материалыг хэрэглэгчийн хүссэн өнгөөр үйлдвэрлэхээс гадна Монгол орны эрс тэс цаг уурт зохицуулан хавар намрын сэрүүн нөхцөлд ч барилгын ажлын чанарт нөлөөлөхгүйгээр хэрэглэж болох тусгай орц найрлагаар үйлдвэрлэх боломжтойгоороо онцлог гэнэ. Нэг сав нь 24кг савлагаатай, 10 төрлийн чулуут өнгөлгөөг үйлдвэрлэнэ. Гол орц болох байгалийн чулууг БНХАУ болон БНСУ-аас нийлүүлдэг. Өнгөний хувьд хэрэглэгчийн хүссэн 100 гаруй төрлийн өнгийг гаргадаг ажээ.

Материалаа үйлдвэрлэх дөрвөн тогоотой. Энэ бүтээгдэхүүн нь хөөсөнцрийг бодвол илүү олон, арваад төрлийн шат дамжлагаар дамждаг юм байна. Товчхондоо, эхлээд чулууг тусгай найрлагатай цавуутай хамтатган тогоондоо хийн, хутгана. Хамгийн сүүлд өнгө гаргалт хийгддэг байна.



           Үйлдвэрт бидний хөтчөөр ажилласан Чулуут өнгөлгөөний үйлдвэрийн ахлагч Т.Ариунаа үйлдвэрийн өдөр тутмын үйл ажиллагаа болон лаборатори, өнгө гаргалтыг хариуцдаг. Тэрээр Зураач мэргэжилтэйн дээр БНСУ-д чулуут өнгөлгөөний үйлдвэрт ажиллаж байсан арвин туршлагатай, Монголд анхдагч энэ чиглэлд бэлтгэгдсэн “мэргэжлийн хүн” юм. Түүний хэлснээр, “Захиалагчдынхаа сонгосон бүтээгдэхүүнээс дээж авч хадгалдаг тул өнгө зөрөх эсвэл захиалагч нь яг тухайн өнгөө дахин худалдан авахад ямар ч асуудал гардаггүй, Ганц сав чулуут өнгөлгөө захиалсан ч найруулан гаргаж өгдөг” гэлээ.
 
Энэ хүрээд бидний үйлдвэрлэлийн аялал өндөрлөж байна. Зах зээлд шаардлагатай, шинэ соргог, дэвшилтэт бараа бүтээгдэхүүнийг үйлдвэрлэхийг зорьж, хийж хэрэгжүүлж яваа “Пирамид Индастри” ХХК-ийн хамт олонд амжилт хүсье.





Эх сурвалж: Барилга.МН 6 сарын дугаар

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.