​Зөөврийн чингэлгийг тансаг сууц болгосон сонгодог жишээ

​Зөөврийн чингэлгийг тансаг сууц болгосон сонгодог жишээ

   Зөөврийн чингэлгээр олон төрлийн зориулалттай байшин, сууц, үйлчилгээний газар ихээр барих болсон ч түүнийг тав тухтай, оновчтой шийдлээр засч өөрчилж чадаж буй нь цөөхөн билээ. Тэгвэл Германы “Containerwerk” компанийн архитекторууд хэрэглэж байсан хуучин төмөр чингэлгийг тав тухтай, гоёмсог сууц болгох төвөгтэй ажлыг гүйцэтгэж чаджээ.

   Тэд чингэлгийг амины орон сууц, оффис болгон ашиглахад тулгардаг хамгийн чухал асуудал болох дулаан тусгаарлалтыг амжилттай шийдсэн байна. Компанийн үүсгэн байгуулагчдын нэг Иван Маллиновский хөөсөн тусгаарлагч давхарга бүхий бүтэцтэй системийг зохион бүтээжээ.



   Тэрээр, “Дулаан тусгаарлагч бол чингэлгэн байшингийн хувьд хамгийн том асуудал юм. Чингэлгийн бүтцийг харвал ерөнхийдөө ган төмрөөс бүтэж байгаа. Харин ган нь өөрөө маш сайн дулаан дамжуулагч болж чаддаг. Тиймээс бид дулаан тусгаарлагчийн маш онцгой нэг хувилбарыг хийлээ. Дулааны ямар өөр нэгэн нэмэлт хэрэгсэлгүйгээр чингэлгийг бүхэлд нь дээрх дулаан тусгаарлагчаар тусгаарласан нь маш сайн нягттай болж чадсан шүү” хэмээн өгүүлсэн юм.



   Тусгай хөөс ашиглан хийсэн тэрхүү дулаан тусгаарлагчаар бараг 10 см зузаан хана давхар хийснээр чингэлгийн орон зайг багасгаж байгаа ч, үүнийг илүү нимгэн хана болгож бас болох аж. Тус компанийн зүгээс шинэ бүтээлээрээ энэ жил болох Миланы Дизайны долоо хоногт оролцох гэнэ.

   Тус бүр засч янзалсан гурван чингэлгээр хоёр давхар сууц босгожээ. Том цонхнуудтай, өнгөлөгч хана, гадна засал нь чингэлгийг үзэмжтэй, гоёмсог харагдуулж байгаа юм. Орчин үеийн шийдлийг дотор засалд ч мөн тусгаж, байгалийн гэрэлтүүлгийг чөлөөтэй нэвтрүүлэх таатай орон зайг шийдэж, тохилог тавилгуудыг байрлуулжээ. Энэ нь ердийн ган төмөр чингэлгийг гоёмсог, тухтай сууц болгосон гайхалтай сайн жишээ болж чадсан байна.










 
Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.