“BARILGA EXPO 2018” шилдгүүдээ шалгаруулсан ёслолын арга хэмжээнээс...

“BARILGA EXPO 2018” шилдгүүдээ шалгаруулсан ёслолын арга хэмжээнээс...

   Жил ирэх тусам өсөн дэвжсэн барилгын салбар, их хотын өнгө төрхийг тодорхойлж, хамгийн олон оролцогч, хамгийн олон үзэгчтэй болсон Ногоон хөгжлийг дэмжигч “BARILGA EXPO 2018” олон улсын үзэсгэлэн яармаг нь “Барилгын материал” болон “Орон сууц, ногоон барилга” гэсэн хоёр чиглэлээр 04 дүгээр сарын 27-29, 05 дугаар сарын 04-06-ны өдрүүдэд Мишээл экспо төвд амжилттай болж өндөрлөлөө. Уламжлал ёсоор үзэсгэлэнгийн хаалтын өдөр тус үзэсгэлэнгийн шилдэг оролцогчдыг шалгаруулах ёслолыг  зохион байгуулж, өргөмжлөл болон цомыг гардууллаа.

   Үзэсгэлэнгийн зохион байгуулагчаар “Барилга.МН”, хамтран зохион байгуулагчаар Барилга, Хот Байгуулалтын Яам, Нийслэлийн Засаг Даргын Тамгын газар болон Монголын барилгын үндэсний ассоциаци ажиллалаа. Мөн үзэсгэлэнгийн Ерөнхий ивээн тэтгэгчээр “Монцемент билдинг материалс” ХХК, Ивээн тэтгэгчээр “Номин констракшн девелопмент групп” ХХК хамтарсан юм.



   Барилгын салбарын нүүр царай болсон энэхүү үзэсгэлэнд барилга, орон сууцны төсөл хэрэгжүүлэгч, төрөл бүрийн барилгын материал үйлдвэрлэгч, импортлогч, шинэ дэвшилтэт технологи нэвтрүүлэгч, интерьер ба экстерьерийн үйлчилгээ үзүүлэгчид, амины орон сууц барьдаг 250 гаруй компани оролцож, олон нийтэд бүтээгдэхүүн үйлчилгээгээ танилцууллаа. Мөн гадаад орнуудаас зорин ирж оролцож буй байгууллагуудын тоо ч нэмэгдсэн таатай мэдээлэл байгаа юм.

   Үзэсгэлэнг үзэж сонирхохоор ирсэн үзэгчдийн тоо нэмэгдэж, энэ жилийн хоёр үзэсгэлэнг тус бүр 18 мянга, нийтдээ 36 мянга гаруй хүн хүрэлцэн ирснийг “IT zone” компанийн хөдөлгөөн мэдрэгчтэй камераар тоолж бүртгэсэн билээ.

   Энэ жилийн үзэсгэлэн нь Ногоон хөгжлийг дэмжиж буйгаараа онцлогтой учир шилдэг оролцогч байгууллагуудад мөн энэ шалгуурыг тавьсан билээ.

“BARILGA EXPO 2018” олон улсын үзэсгэлэн яармагийн шилдэг оролцогчид

          Шилдэг төсөл хэрэгжүүлэгч “Пи Си Ди Пи” ХХК
“Пи Си Ди Пи” ХХК нь 2013 оноос өдийг хүртэл 110 гаруй төсөл дээр амжилттай ажилласан, барилгын иж бүрэн зураг төсөл, төслийн менежмент, барилга угсралтын менежмент, интерьерийн чиглэлээр үйл ажиллагаа явуулж буй үндэсний шилдэг бүтээн байгуулагч компани юм. Тус компани нь “Оюу толгой” компанийн халаалттай бетон зуурмагийн үйлдвэрийн байгууламжийн төсөл дээр ерөнхий гүйцэтгэгчээр ажилласан билээ.



“Пи Си Ди Пи” ХХК-ийн дэд захирал Т.Түмэн-Өлзий: Олон улсын хэмжээнд яригддаг “BARILGA EXPO 2018 үзэсгэлэн яармагт манай компани үйл ажиллагаагаа танилцуулан оролцлоо. Харин Шилдэг төсөл хөтөлбөр хэрэгжүүлэгчээр шагнал авна гэж төсөөлж ч байсангүй, маш их баярлалаа. Хамт олон маань “Оюу Толгой” компанийн “Бетон зуурмагийн үйлдвэр 4” цогцолбор төслийн ерөнхий гүйцэтгэгчээр ажилласан нь ч энэхүү шагналыг авахад нөлөөлсөн байх гэж бодож байна. Манай компани барилгын төслийн менежмент, зураг төсөл, барилга угсралт, мэргэжилтнүүдийг бусдад санал болгох гэх мэт чиглэлээр дагнан ажиллаж байгаа.

Бидний хувьд энэхүү үзэсгэлэн яармагт оролцсон сэтгэгдэл маш өндөр байна. Энэ экспод оролцохын хажуугаар инженерүүд маань баг болон хуваагдаж шинэ технологи, барилгын материалын үнэ ханш, хөгжүүлэлт хийж байгаа бүтээгдэхүүнүүдийг сонирхох зорилгоор үзэсгэлэн яармагийг үзэж сонирхсон. Зурган дээрээ тусгах бүтээгдэхүүн ч байна, барилгадаа ашиглах нь ч бий, хойшид үйл ажиллагаандаа хэрэгтэй чиглэлийг судлах, хэрэгцээт тоног төхөөрөмжүүдээ харах гээд үзэсгэлэнгээс маш олон төрлийн мэдээллийг авдаг. “BARILGA EXPO 2018” маш өргөн цар хүрээтэй болж өнгөрлөө.

●          Шилдэг төсөл хэрэгжүүлэгч “Эн Си Ди Групп” ХХК
“Номин Констракшн Девелопмент групп” нь “Ногоон Ирээдүйг Бүтээнэ” гэсэн эрхэм зорилгынхоо хүрээнд ногоон хөгжлийн үзэл баримтлалыг бизнесийнхээ чиглэл болгон байгаль орчныг хамгаалах, нөхөн сэргээх ногоон үйлдвэрлэлийг дэмжиж, Монголын барилгын салбарт жишиг болохуйц хотхоны гадаад орчин, ногоон байгууламж, тохижилтын шинэлэг шийдлийг чанар, стандарт, тав тухтай байдлыг цогцоор нь хослуулж, “Ногоон Барилга” бүхий төслүүдийг амжилттай хэрэгжүүлэн ажиллаж байна.



“Эн Си Ди Групп” ХХК-ийн маркетингийн ахлах менежер Г.Батбаяр: Манай компани “Барилга.МН”-ний зохион байгуулдаг үзэсгэлэн яармагийг “Номер нэг” гэж үздэг учраас нэлээд өндөр ач холбогдол өгдөг. Бид зөвхөн борлуулалтаа дэмжихээс илүүтэй нийгмийн хариуцлагынхаа хүрээнд ард түмэндээ барилгын салбарыг сурталчлан таниулах зорилгоор тогтмол оролцдог доо. Энэ жилийн тухайд үзэсгэлэнгийн танхимын нүүрэн талын эгнээнд маш том талбай авч оролцсон. Ер нь эдийн засгийн байдал сэргэж эхэлсэн, нааштай байгаатай холбоотойгоор манай компани нэгэн зэрэг олон төсөл хэрэгжүүлж эхэлсэн.

Компани маань “Ногоон ирээдүйг бүтээнэ” гэсэн эрхэм зорилгынхоо хүрээнд байгальд ээлтэй техник технологи нэвтрүүлэх, хүний амьдрах хамгийн таатай орчныг бий болгох, эрүүл амьдралын хэв маягийг олон нийтэд сурталчлах, төлөвшүүлэх чиглэлд онцгой анхаарч, үйл ажиллагаагаа ч уялдуулан ажилладаг. Дөрвөн хана угсрах төдий биш, хүний гэр бүлийн аз жаргал, хамгийн тав тухтай орчныг бүрдүүлэхэд хэрэгтэй бүх зүйлийг цогцоор нь шийдэхийг эрмэлздэг. Энэ ч утгаараа төсөл хөтөлбөрүүддээ ногоон орчныг бүрдүүлэхэд ихээхэн анхаардаг. Мөн барилгын хийц, технологиудыг аль болох байгаль орчинд ээлтэй, эрчим хүчинд хэмнэлттэй байхаар төлөвлөж, цэвэр усыг хэмнэдэг байхыг эрхэмлэж байна.

●          Шилдэг үйлдвэрлэгч “Пирамид Индастри” ХХК
“Пирамид индастри компани” нь 1996 онд байгуулагдсан цагаасаа хойш 22 жилийн турш барилгын матёриал үйлдвэрлэлийн салбарт үйл ажиллагаагаа явуулж байгаа бөгөөд хөөсөнцөр хавтан, чулуут өнгөөний материал үйлдвэрлэлээрээ Монголдоо анхдагч компани юм. Тэд үргэлж шинийг санаачилж хамгийн сүүлийн үеийн технологийн дагуу бүтээгдэхүүнээ үйлдвэрлэж, өдгөө дотоодын зах зээлийг 100 хувь хангах боломжтой болжээ.



“Пирамид Индастри” ХХК-ийн менежер н.Анударь: “BARILGA EXPO 2018” үзэсгэлэн яармагийн хаалтын ажиллагаан дээр бид Шилдэг үйлдвэрлэгчээр тодорч, шагналаа гардан авлаа. Манай компани 1996 оноос хойш барилгын материал үйлдвэрлэлийн салбарт тогтвортой үйл ажиллагаа явуулж байгаа. Үргэлж шинэ бүхнийг эрэлхийлж, шинийг санаачлахыг эрмэлздэг. Тийм ч учраас тун удахгүй нэгэн шинэ бүтээгдэхүүнээ хэрэглэгчдийн гарт хүргэхээр ажиллаж байна.

Энэхүү үзэсгэлэнд бид тасралтгүй долоо дахь жилдээ оролцож байна. Хамгийн олон үзэгчтэй үзэсгэлэн яармаг учраас “BARILGA EXPO 2018” бол бидний зорилтот зах зээлдээ хүрэх том боломж юм. Тиймээс компанийн зүгээс маш их ач холбогдол өгч, тогтмол оролцдог. Дараагийн үзэсгэлэнгийн үеэр илүү олон арга хэмжээ зохион байгуулахаар төлөвлөөд эхэлчихсэн шүү. Магадгүй үзэсгэлэнгийн Шилдгийн шилдэг шагналын төлөө ч өрсөлдөж болохуйц их ажлыг төлөвлөөд байна.

●          Шилдэг ханган нийлүүлэгч “Клаймакс Интернэшнл” ХХК
“Клаймакс интернэшнл” ХХК нь Монголын барилгын салбарт Европын чанарын шаардлага хангасан сантехникийн бүтээгдэхүүнийг цогцоор нь нийлүүлэх зорилт тавин ажилласаар 12 дахь жилийн нүүрийг үзэж байна. 2006 оноос хойш өнөөдрийг хүртэл олон улсын үзэсгэлэн яармагуудад тогтмол оролцож ирсний дүнд өдгөө Итали, Герман, Польш, Франц, Турк, Хорват зэрэг орны 30 гаруй үйлдвэрлэгчийн Монгол дахь албан ёсны төлөөлөгчөөр ажиллаж, сантехникийн бүхий л барааг үйлдвэрлэгчээс нь дотооддоо шууд нийлүүлсээр байна.



“Клаймакс интернэшнл” ХХК-ийн Борлуулалтын менежер О.Ариунзул: Манай компани нь сантехникийн бараа материалыг Польш, Итали, Турк, Герман зэрэг Европын орнуудын 30 гаруй үйлдвэрлэгчийн Монгол дахь албан ёсны төлөөлөгчөөр ажиллаж, бараа бүтээгдэхүүнийг үйлдвэрээс нь шууд нийлүүлж байна. Бид үйл ажиллагаагаа явуулаад 12 дахь жилээ болж байгаа бөгөөд “BARILGA EXPO” олон улсын үзэсгэлэн яармагт анхлан зохион байгуулагдах үеэс буюу 10 дахь жилдээ алгасалгүй оролцож байна.

●          Шилдэг шинэ технологи нэвтрүүлэгч “Хүннү Конкрет” ХХК
Салбартаа тэргүүлж буй үйлдвэрүүдийн нэг “Hunnu RMC” ХХК нь ажлын бүтээмж, технологио тогтмол шинэчлэн сайжруулж яваа, 100 хувь дотоодын хөрөнгө оруулалттай үндэсний компани юм. Чанартай бүтээгдэхүүнийг үйлдвэрлэхээр ажилтан албан хаагчдаа мэргэшүүлэх ёстой гэдгийг ухамсарласан тэдний хувьд өнгөрсөн онд ажлын байрыг нэмэгдүүлэн амжилттай ажиллаж, техник тоног төхөөрөмжийг улсдаа нэвтрүүлж чанарын хяналт тавих , дэлхийд баталгаажсан шинэлэг технологийг нэвтрүүлсэн албан ёсны эрхтэй Монгол компани болоод байна.



“Хүннү Конкрет” ХХК-ийн дэд захирал Н.Амарбаясгалан: Бид бүхний хэрэгжүүлж буй технологийг онцолж шагнал гардуулсан явдалд Зохион байгуулах хорооны гишүүддээ баярлалаа. Бэлэн болгосон бүтээгдэхүүнээ эцсийн хэрэглэгчдэдээ хүргэхэд “гүүр” болж өгдөг “Барилга.МН”-ний хамт олондоо мөн талархал илэрхийлье. Анх долоон жилийн өмнө бетон зуурмагийн үйлдвэрлэлд хөл тавих үедээ хэрэглэгчдийн тавьж буй шаардлагын дагуу бүтээгдэхүүнээ үйлдвэрлэдэг байсан бол өдгөө салбарынхан маань өөрсдөө чанарыг стандартад оруулах талаас нь анхаардаг болж, өөрсдийгөө хөгжүүлж, технологийн дэвшлийг эрэлхийлдэг болсон байна. BARILGA EXPO 2018” зорилтот хэрэглэгчид рүүгээ чиглэсэн сурталчилгаа хийхэд яг тохирсон, зохион байгуулалт сайтай маш сайхан үзэсгэлэн яармаг болж өндөрлөлөө. Бид бүхний хувьд маш сэтгэл хангалуун байгаа.

●          Шилдэг шинэ орон сууц “Жигүүр гранд Групп” ХХК “ПАРК ВЬЮ” хотхон
Монгол улсын барилгын салбарт 29 жилийн түүхийг бүтээлцэж буй, үндэсний шилдэг бүтээн байгуулагчдын нэг “Жигүүр Гранд” группээс хэрэгжүүлж буй “Парк Вью резиденс” хотхон нь ийнхүү Шилдэг шинэ орон сууцаар шалгарлаа. Ирээдүй хойч үедээ чанартай, тохь тухтай амьдрах орчныг бүрдүүлэх нь “Эрүүл амьдралын хаяанд” уриатай энэхүү хотхоны зорилго билээ.



“Жигүүр Гранд” групп
ийн Ерөнхий захирал Б.Халиун: “BARILGA EXPO 2018” маань олон улсын хэмжээнд зохион байгуулагддаг, өргөн цар хүрээтэй үзэсгэлэн яармаг болжээ. Барилгын салбарынхан энэ үзэсгэлэнд оролцсоноор хэрэглэгчдэд бүтээгдэхүүн үйлчилгээгээ танилцуулаад зогсохгүй өөр хоорондоо танилцаж чаддаг учраас маш их хэрэгтэй арга хэмжээ болж чаддаг. Мөн манай компанийн зүгээс Шилдэг шинэ орон сууц шагналыг хүртсэндээ баярлаж, бахархаж байна. Бид бүхний бүтээн байгуулалтыг үнэлж ийм хүндтэй шагналыг олгосон үзэсгэлэнгийн зохион байгуулагчдад талархсанаа илэрхийлье.

“Парк Вью резиденс” хотхон маань гэрээсээ гараад л Үндэсний цэцэрлэгт хүрээлэнгийн эрүүл агаартай орчин, хүүхдүүдийн тоглоход таатай цэлгэр уужим талбайг санал болгодгийн хувьд байршлаараа номер нэг юм. Эргэн тойрон сургууль, цэцэрлэгийн хүртээмж сайтай, өөрийн гэсэн зургаан давхар Парк Молл дэлгүүртэй учир оршин суугчдынхаа эрэлт хэрэгцээг бүрэн хангаж чадна гэж үзэж байгаа. Зах зээлээ оновчтой мэдэрсэн үнийн бодлогыг баримталж байгаа маань бас нэгэн давуу тал юм. Мөн барилгын салбарт 30 жилийн туршлага хуримтлуулсан “Жигүүр Гранд” групп барьж байгаа нь хамгийн чухал ач холбогдол юм шүү.

●          Шилдэг бүтээгдэхүүн “Майнс Ап” ХХК-ийн Schindler лифт
“Шиндлэр” нь цахилгаан шат, урсдаг шат, урсдаг замын үйлдвэрлэлээр 140 гаруй жилийн арвин түүхтэй, дэлхийд танигдсан Швейцар улсын брэнд юм. Урсдаг шат, урсдаг замын үйлдвэрлэлээрээ дэлхийд №1-т, цахилгаан шатаар топ 2-т ордог үлгэр дууриалал болсон дэлхийн урсдаг шатны хамгийн том, аюулгүй байдлыг 100 хувь хангасан үйлдвэртэй брэнд билээ. Шиндлэрийн цахилгаан шат нь сэргээгдэх эрчим хүчийг ашиглаж, цахилгааныг 100 хүртэл хувиар хэмнэж чаддаг байгальд ээлтэй бүтээгдэхүүн юм.



“Майнс Ап” ХХК-ийн Төслийн менежер Э.Энх-Амьдрал: “Schindler” брэнд нь анх 1874 онд Швейцарын Лусерн хотод үүсэн байгуулагдсан түүхтэй. Моннис ХХК-ийн охин компани болох “Майнс Ап” нь 2015 онд энэхүү “Schindler” брэндийн албан ёсны төлөөлөгчийн эрхийг авсан юм. Лифтийг үйлдвэрлэлийн шатнаас нь ашиглалтын үе хүртэлх бүхий л технологийг байгальд ээлтэй байлгахад маш их анхаардаг. Хамгийн сүүлд нарны эрчим хүчээр ажиллах, цахилгааныг 100 хувь хэмнэх лифтийг нэвтрүүлсэндээ баяртай байна.

●          Шилдгийн шилдэг Гранпри “Монцемент Билдинг Материалс” ХХК
Монгол орныхоо бүтээн байгуулагчдад чанарын өндөр түвшинд үйлдвэрлэсэн цемент, барилгын материал нийлүүлэгч, Үндэсний шилдэг үйлдвэрлэгч “Монцеменет билдинг материалс” ХХК. Тус компани нь хаягдал дулаанаа ашиглаж, үйлдвэрийн хэрэгцээнийхээ 40 хувийг сэргээгдэх эрчим хүчээр хангах, дэлхийд 4-5-хан ширхэг байдаг WHR системийг нэвтрүүлэн ажиллаж байна. Сүүлийн үеийн дэвшилтэт технологиос гадна эрдэм шинжилгээний ажилтнуудтай нягт хамтран ажиллаж, ямагт шинэ сайжруулсан бүтээгдэхүүн үйлдвэрлэхийг эрмэлзэж буй шинийг санаачлагч, хэрэгжүүлэгч байгууллага юм.



“Монцемент билдинг материалс” ХХК-ийн Стратеги, төлөвлөлт эрхэлсэн захирал Э.Болормаа: Манай компани байгуулагдаад удаагүй ч төслийн хугацаа дуусахаас өмнө дэлхийн хамгийн сүүлийн үеийн технологид суурилсан хоёр ч үйлдвэрээ ашиглалтад орууллаа. Эдгээр үйлдвэр маань жилд нэг сая тонн цемент үйлдвэрлэх хүчин чадалтай. Мөн хуурай аргын технологи ашиглах буюу 4-5 дахин бага ус хэрэглэдэг, утаа, тоос тортог гаргадаггүй, ямар нэгэн хаягдалгүй, сэргээгдэх эрчим хүч хэрэглэдэг гээд маш олон давуу талтай.

Энэхүү төсөлд Европын хөгжлийн банкны ивээн тэтгэлгээр хөрөнгө оруулалт авсан. Анхны төсөлд Европын томоохон компаниуд зөвлөхөөр ажилласан бол төсөл хэрэгжиж дуусахаар Монгол инженерүүд өөрсдөө үйлдвэрээ бүрэн дүүрэн авч, ажиллах юм. Гадаадын олон улс орны мэргэжилтнүүд зөвлөхөөр ажилладгаас Энэтхэгийн инженерүүд түлхүү оролцож байна.

















 
Эх сурвалж: Барилга.МН

Сэтгэгдэл (2)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

    Beton 14 өдрийн өмнө 103.26.192.18

    Khunnu Concrete yag yamar technology nevtruulsen um bol? Oilgosongui
    Сэтгүүлч 14 өдрийн өмнө 112.72.9.34

    Үйлдвэртээ 2 шинэ технологийг нэвтрүүлсэн. Удахгүй энэ талаар дэлгэрэнгүй мэдээлэл орох болно.