Хаврын хамгийн том үзэсгэлэн “BARILGA EXPO 2018” өнөөдөр нээлтээ хийлээ

Хаврын хамгийн том үзэсгэлэн “BARILGA EXPO 2018” өнөөдөр нээлтээ хийлээ

Барилгын салбарын ханган нийлүүлэгчид болоод хэрэглэгчдийг нэгэн дээвэр дор нэгтгэдэг Монголын хамгийн том үзэсгэлэн, Ногоон хөгжлийг дэмжигч “BARILGA EXPO 2018” олон улсын үзэсгэлэн яармаг өнөөдөр Мишээл экспо төвд нээлтээ хийлээ.

Үзэсгэлэнгийн Ерөнхий зохион байгуулагчаар “Барилга.МН”, хамтран зохион байгуулагчаар Барилга, Хот Байгуулалтын Яам, Нийслэлийн Засаг Даргын Тамгын Газар болон Монголын Барилгын Үндэсний Ассоциаци зэрэг байгууллагууд ажиллаж, салбарын төрийн бус байгууллагууд дэмжин оролцож байна. Мөн Ерөнхий ивээн тэтгэгчээр “Монцемент Билдинг Материалс” ХХК, ивээн тэтгэгчээр “Номин Констракшн Девелопмент” групп хамтран ажиллаж байгаа юм.



    2018 оны 04 дүгээр сарын 27-ноос 29-нд “Барилгын материал”, 05 дугаар сарын 04-нөөс 06-нд “Орон сууц, ногоон барилга” гэсэн хоёр чиглэлээр үргэлжлэх тус үзэсгэлэнд барилга, барилгын материал, үл хөдлөх хөрөнгө, интерьер, экстерьерийн бүтээгдэхүүн үйлчилгээ үзүүлэгч, амины орон сууц барьдаг, дэвшилтэт технологи нэвтрүүлэгч, орон сууцны төсөл хэрэгжүүлэгч, цахилгаан болон сантехникийн хэрэгсэл нийлүүлэгч зэрэг 300 гаруй компани оролцож байна.

    Жил бүрийн хавар, намрын улиралд тогтмол зохион байгуулагддаг “BARILGA EXPO 2018” нь энэ онд байгаль орчинд ээлтэй, хүний эрүүл мэндэд сөрөг нөлөөгүй Ногоон барилга, барилгын материал, технологийг онцолж байгаа юм.

  Х.Баделхан сайд арга хэмжээг нээж үг хэлэхдээ, Монгол улсынхаа барилга, бүтээн байгуулалтын их салбарт сэтгэл зүтгэлээ зориулж, хөгжлийн түүчээ манлай нь болж байдаг үндэсний үйлдвэрлэгчид, аж ахуйн нэгжүүд, энэ салбарт ажиллаж хөдөлмөрлөж буй эрхэм барилгачид, инженерүүд, бүтээн байгуулагчидад, хүрэлцэн ирсэн хүмүүст мэнд хүрглээ. Ногоон барилга, ногоон хөгжлийг онцолж буй “BARILGA EXPO 2018” олон улсын үзэсгэлэн яармагт 10 дахь жилдээ уламжлал ёсоор манай барилгын материал үйлдвэрлэгчид, шинэ дэвшилтэт технологи нэвтрүүлэгчид, ханган нийлүүлэгчид гээд дотоод, гадаадын 300 гаруй байгууллага оролцож олон нийтэд, иргэддээ бүтээгдэхүүн үйлчилгээнүүдээ хүргэж байна. Салбарын үйлдвэрлэгчид, бизнес эрхлэгчид, бүтээн байгуулагчдаа дэмжсэн энэ арга хэмжээг бид хэзээд дэмжин ажиллаж, хамтарч байх болно гэж онцоллоо.

    Үзэсгэлэнг үзэж сонирхохоор ирсэн үзэгчдийн тоо жил ирэх тусам нэмэгдэж буйтай холбоотойгоор зохион байгуулагчдын зүгээс тэдэнд зориулсан сургалт, семинарууд бүхий олон арга хэмжээг төлөвлөжээ. Эдгээрээс онцолбол, Энэ үеэр Ерөнхий ивээн тэтгэгч “Монцемент Билдинг Материалс” ХХК цементийн үйлдвэрлэл, дэлхийн цемент нийлүүлэгчдийн чиг хандлагын талаарх сонирхолтой баримтууд бүхий илтгэл тавьж, “Барилгачин групп” ХХК-иас амины орон сууцны материалаа зөв сонгох, барих тухай мэргэжлийн зөвлөгөөг өгөх ажээ. Мөн “Жорлонгоо өөрчилье” уриатайгаар улс орон даяар хувьсгал хийхээр өөрсдийн санаачилга, сайн дурын үндсэн дээр нэгдсэн “Нутгийн шийдлийн сан”-ийнхан ч иргэдэд зөвлөгөө өгөх юм.

/Сургалт, семинаруудын дэлгэрэнгүй мэдээллийг эндээс авна уу./

Үзэсгэлэнг үзэхээр ирсэн иргэдэд зориулсан бас нэгэн таатай зүйл бол оролцогч компаниудын зүгээс барьж буй бэлэг юм. Зөвхөн үзэсгэлэнгийн өдрүүдэд зарласан хөнгөлөлттэй, урамшуулалтай, сугалаат худалдааг явуулж эхэлсэн байна.

Орон сууцны төсөл хэрэгжүүлэгчид урьдчилгаа төлбөрийн хэмжээнээс хамааруулан шаталсан хөнгөлөлт үзүүлж байгаа бол 50 саяас дээш төгрөг төлсөн захиалагчиддаа дулаан зогсоол бэлэглэх, мөн бүх захиалагчдынхаа дунд Chevrolet Camaro автомашины супер хонжвортой сугалаат худалдаа явуулж буй оролцогч компаниуд ч байна. Мөн дэлхийд чанар хэрэглээгээрээ хэдийнээ танигдсан барилгын материал, тоног төхөөрөмж, шинэ технологиудыг ч хямдралтай, урамшуулалтайгаар худалдан авах боломж зөвхөн эдгээр өдрүүдэд тохиож байна.


 

/Хөнгөлөлт урамшууллын тухай дэлгэрэнгүй мэдээллийг эндээс авна уу./

Урин цаг ирсэн энэ л өдрүүдэд бүтээн байгуулалтын ажил өрнүүлэх гэж буй хувь хүн, байгууллагууд болон байшин, орон сууц, үл хөдлөх хөрөнгөндөө өнгө нэмэхээр төлөвлөсөн хэн бүхэн хайсан бүтээгдэхүүнээ авахын зэрэгцээ хэрэгцээт зөвлөгөө мэдээллээ нэг дороос авах бүхий л боломжийг “BARILGA EXPO 2018” олон улсын үзэсгэлэн яармагт бүрдүүлжээ.

Үзэсгэлэнгийн өдрүүд хязгаартай тул та бүхэн амжиж ирээрэй.







 

 
Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.