Маш үнэтэй хэрнээ үнэгүй зөвлөгөө /ХАУС барих/

Маш үнэтэй хэрнээ үнэгүй зөвлөгөө /ХАУС барих/
Би бээр барилгын салбартай ажил амьдралаа холбоод 16 жилийг ардаа орхижээ. Энэ олон жилүүдэд ихэвчлэн хувийн орон сууцнууд барьж ашиглалтанд өгч байсан байх юм. Нэгэн өвлийг ардаа орхиод л бөөн туршлага сургамж нэмэгддэг юм. Яагаад гэвэл барьсан барилгын маань төлөвлөлт нь буруу, материалын сонголт нь буруу, чанаргүй гүйцэтгэл гээд л бүх муу талууд нь өвлийн хүйтэнд илэрнэ дээ. Гэхдээ энэ бүхэн маань ирээдүйн барилгуудад маань бөөн сургамж туршлага болон улам сайжирч төлөвлөгддөг. 16 жилийн өмнө барьсан барилгаа одоо харахаар инээдтэй, гунигтай, хөгжилтэй санагддаг.
Энэ бүх хугацаанд хуримтлуулсан туршлага маань өнөөдөр төгс шийдэл бүхий дулаан алдагдалгүй байшин барихад л чиглэгдэж, туршлага маань зузаарсаар өөрийн гэсэн технологийг бий болгож үүнийгээ МОНГОЛ КАРКАС хэмээн нэрийдлээ.
Газар хөдлөлтийн 8 баллд тэсвэртэй, 100% дулаан алдагдалгүй, газрын гүн, нарны энергийг ашигласан тав тухтай хувийн сууц барихад л миний мөрөөдөл минь байсан. Одоо ч хэрэгжүүлсээр ажилласаар л байна. Зарим найзууд маань барилга бариулаад ямар нэгэн асуудал үүсэхээрээ намайг гэнэт санаж залгадаг юм. Очоод харахад зарим асуудал нь яагаад ч шийдэж болохооргүйгээр хийгдсэн байдаг нь намайг гайхшралд оруулдаг. Яагаад намайг байсаар байхад зөвлөгөө авалгүй ийм юм хийдэг юм бэ? гээд л халуун яриа маань өрнөнө. Тйим ээ нөхөд минь! 16 жил барилга барина гэдэг асар их туршлага!!! Ялангуяа эрс тэрс уур амьсгалтай зун нь халуун, өвөл нь хүйтэн Монгол оронд хувийн орон сууц барина гэдэг асар их туршлага!!!
"Өнөөдөр би энэ туршлагаасаа хуваалцаж МАШ ҮНЭТЭЙ хэрнээ үнэгүй зөвлөгөөг ХАУС барих гэж байгаа бүх хүмүүст өгөх гэсэн юм."

  1. Байшингаа барих төлөвлөгөөнөөс эхэлье. Зураг заавал зурах хэрэгтэй. Гараар ч болсон төлөвлөсөн зургаа зур. Өрөөнүүдийнхээ хэмжээг тавь. Яг ижил хэмжээтэй өөр айлуудын өрөөнүүдэд орж үзэх хэрэгтэй. Орсон айлаасаа энэ өрөө чинь хэд хэдийн хэмжээтэй вэ гээд асуучихад болно шүү дээ. Чиний төлөвлөсөн өрөөнд хаана нь юу байрлуулахаа сэтгэлдээ төсөөлөөд л ерөнхий баримжаа чинь гарч ирэх ба хэмжээгээ бага зэрэг өөрчлөх бол одоо л тэр зурган дээрээ өөрчил. Баригдсаны дараа өрөөний хэмжээ тавилгын хэмжээ тооцоолоогүй төлөвлөж толгойгоо гашилгаж суугаа олон хүнтэй таарч байсан шүү. Барилгын зургийг компаниар хийлгэж байгаа ч гэсэн бүх өрөөнийхөө хэмжээнүүдийг бодит орон зайд ямар байхыг заавал мэдэрсэн нь дээр шүү.
  2. Хувийн орон сууц бариулж буй хүмүүсийн хамгийн нийтлэг гаргадаг алдаа бол байшин тань өвөл газар хөлдөхөд доороосоо дулаан алдагдалгүй байх ёстойг ереесөө тоодоггүй. Сүүлийн 5-н жил дулаан алдагдлын шинжилгээг хийж явахдаа энэ асуудалтай бараг байнга тааралддаг. Гаднаас нь дулааны камераар харахад улаагаад л харагдана.
           
Барилгын суурины дулааны зураг /гадна талаас/
 

Жаахан керамзит эсвэл хөөсөнцөр хийгээд л болоо. Гэтэл хүн өвөл хөл нь даарахаар эсгий улавч дэвсдэгээ ямагт санах хэрэгтэй. Байшин ч мөн адил. Доороосоо дулаан алдагдалгүй болгохын тулд бүх оюун санаагаа төвлөрүүл. Дор хаяж 10см XPS дэвсэж дулаан тусгаарлах үеийг хийх хэрэгтэй. Шалны халаалтаар байна уу, радиатораар дулаанаа өгнө үү барилгын суурины дулааны үе сайн байвал шалаар явж буй дулаан чинь доошоо биш дээшээгээ байшинд чинь өгөгдөнө гэдгийг санаж яв. Доошоогоо дулаанаа алдаад байвал таны халааснаас гарах мөнгө л их болно шүү дээ.

  1. Хана болон дээврийн дулаалгыг маш сайн хийх шаардлагатай. Үүнээс гадна манайхны нийтлэг хамгийн том алдааг дурьдахгүй өнгөрч болохгүй нь ээ. Шал, хана, дээврийн дулаалгын үеүүд заавал хоорондоо уулзах ёстой. Энэ үеүүд уулзаагүйгээс дулаан алдагдлууд гардаг ба энэ нь шалны захаар, булан, таазны захаар хөлөрч ус бөнжигнөх маягаар илэрдэг. Үүнийг thermal bridge буюу дулааны гүүр гэж нэрлэдэг.
Дулааны гүүр /thermal bridge/ 
 
                                                                                                                 
Хана дээврийн уулзварын дулааны зураг /дотор талаас/

Энэ завсрын дулаан алдагдалтай хэсгүүдээс болж та өрөөндөө хаалгаа хаачихсан байхад л нуруу бөөр лүү чинь салхилаад байгаа юм шиг мэдрэмж төрдөг юм. Зүгээр л дулаан агаар чинь тэр хүйтэн байгаа газар луу тэмүүлсэн урсгал үүсэж байна гэсэн үг. Битүү өрөөндөө сууж байхад л сэвэлзээд салхилаад байна гэж зовж байгаа олон хүнтэй таарч байсан юмаа. Тиймээс би дулаалгын бүхий л төрлийн бүтээгдэхүүнүүдийг судалж үзэн Полиуретан шүршдэг хөөсний дулаан тусгаарлах чадварыг хамгийн өндөр гэдгийг олж мэдээд 7 жилийн өмнөөс полиуретан хөөсийг шахаж эхэлсэн юм. Дулаалгын материалуудын талаар туршилт хийсэн мэдээлэл удахгүй манай вэбсайт болон фэйсбүүк хуудас дээр тавигдах учир цааш бичилгүй үлдээе.

  1. Шал, хана, таазны дулаалгууд хоорондоо уулзсан цагт ямар ч тохиолдолд хөлрөлт, норолт, цанталт үүсэхгүй. Тиймээс өвөл амьдрах л гэж төлөвлөж байгаа бол дулаалгын материалдаа л мөнгө битгий харамлаарай. Тэр үедээ арай илүү мөнгө зарцуулсан ч 2 өвөл өнгөрөхөд л зардлаа нөхдөг юм шүү. Эхнээсээ дулаан алдагдалгүй сайхан чанартай байшин барьчихвал үр хүүхдэд чинь үлдэх үл хөдлөх хөрөнгө юм шүү.
  2. Манайхан хөрөнгө хэмнээд мансардан 2 давхар байшин их бариулдаг. Үнэн хэрэг дээрээ тийм ч их мөнгө хэмнэдэггүй юм шүү. Одоо цагт барилга метр квадратаар бүх зүйл нь тооцогддог болсон цагт сайхан өндөр таазтай саруулхан 2 давхар байшин бариулах нь танаас ямар ч ялгаагүй шахам хөрөнгө гарна гэдгийг бодоорой. Байшингаа дулаан байлгана гэж таазаа намхан барьдаг нийтлэг алдаа манайханд байдаг. Үгүй үгүй гэж давтан хэлье. Дулаан алдагдалгүй байшин барьсан л бол таны дулаанд зарцуулсан мөнгө чинь байшин дотор чинь хадгалагдан үлдэнэ.
  3. Барилгын араг яс буюу карказ бол ХАОС-ы бас нэгэн чухал зүйл. Газар хөдлөлтөнд тэсвэртэй байх, дулаалахад тохиромжтой байх нь хамгийн чухал. Бид мод, блок, тоосго, бетон материалуудыг хооронд нь харьцуулан туршиж үзэн МОНГОЛ КАРКАЗ технологио гаргаж авсан юм.
 
           
Туршилтын зураг - Блок, тоосго, мод, бетон /зүүн гар талаас/
 

Манай ихэнх орон сууцнууд угсармал буюу бетон, 64-ийн хана буюу тоосгон карказтай байдаг. Тоосгон барилгууд нь угсармал барилгаас илүү дулаан байдаг учир олон хүн тоосгон ханыг сайн гэж итгэсэн байдаг. Энэхүү туршилтын үр дүнг мэдээ болгон удахгүй та бүхэнд хүргэх учир манай фэйсбүүк хуудас https://www.facebook.com/gerchuluuconstruction/ руу орж лайк дараад мэдээлэл авч байгаарай гэж хүсье.

  1. Мөн дээвэртээ удаан жилийн настай чанартай хучилтын материал сонгоорой. Дээврээс дусаал гоожих л юм бол таны байшин тэр чигээрээ норж, хөрөнгө чинь үрэгдэж байна гэсэн үг. Дотор заслаа дахин хийнэ. Шал чинь муухай болно. Солих уу яах уу гээд олон асуудал ар араасаа ундарч эхэлнэ. Иймээс вааран дээвэр /черепица/, PVC мембран, полиуреа /сүүлийн үеийн технологи/ зэрэг 50-60 жилийн настай материал сонгоорой.
  2. Байшин амьсгалах ёстой гэж та хаа сайгүй сонссон байх. Тиймээ үүнтээ санал нэг байна. Гэхдээ барилгын материал биш байшин минь амьсгалах ёстой. Бидний амьсгалсан чийгтэй бохир агаар, гал зуухны чийгтэй агаар, өрөөнүүдийн агаар л гадагш гарч оронд нь цэвэр агаар таны байшинд орж ирэх ёстой болохоос монгол гэрийн эсгий шиг хавар намартаа буулгаж хатааж, өглөө гараад орой ирэхэд амьсгалдаг эсгийгээрээ цэв хүйтэн гэр угтдаг шиг байх ёсгүй юм аа. Ханаараа л байшин амьсгалбал таны дулаанд зарцуулж байгаа мөнгө чинь улам л их болно. Энэ талаар илүү дэлгэрэнгүй мэдээллийг Байшин амьсгалах ёстой гэсэн нийтлэлээс уншаарай.
    Мөн та байшингынхаа агааржуулалтыг дээд зэргийн төгс шийдэх ёстой. Гаднаас оруулах цэвэр агаараа өвөл ямар нэг байдлаар халааж оруулбал бүх асуудал шийдэгдэнэ. Сүүлийн үед импортын төрөл бүрийн халааж оруулах системүүд ихээр орж ирэх болсон.(халаагчтай, шүүлтүүртэй г.м) Газрын гүний дулаанаар ч шийдэж болно. Өвөл манайд -40С хүртэл хүйтэрдэг гэдгээ сайн бодолцож бүтээгдхүүнээ сонгоорой. Нэмж нэг зүйлийг анхааруулахад бүх өрөөнүүд хоорондоо агааржуулалтын хоолойгоор холбогдох ёстой. Тэгвэл удаан хугацаагаар эзэнгүй байгаад эргэж ирэхэд бүх өрөөнүүдийн чинь агаар нь цэвэр, янз бүрийн үнэргүй угтах болно. Доорх зурган дээр та бүхэн ханаараа амьгалдаг байшин, ханаараа амьгалдаггүй байшин 2-ийн дулааны алдагдалыг харж болно.
 Дулаан алдагдалгүй, дулаан алдагдалтай байшингийн дулааны зураг
 
Манай монголчуудын нэг зүйлийг би ерөөсөө ойлгодоггүй юм. Барилгын талаар ямар ч мэдлэггүй хүн, хувь хүмүүс бригадтай тохиролцон байшингаа бариулдаг. Хэдэн нөхөд ирж урьдчилгаа авч эхэлж байснаа дараагийн хүнээс урьдчилгаа авчихвал шууд хаяад л яваад өгдөг. Дараагийн хүмүүстэйгээ бас л тохиролцоно. Дараагийн ирсэн нөхдүүд урьд нь хийж байсан нөхдийг юу ч мэдэхгүй чадахгүй хүмүүс байсан байна гэж муулаад л өөрсдөө ямар ч ялгаагүй шахам зүйлсийг хийж эхэлдэг. Ямар ч уялдаа холбоогүй хэдэн бригадаар /сантехник, цахилгаан, бетон, дээвэр/ байшингаа бариулдаг. Байшин нь дуусаад эхний өвөлтэйгөө золгоод л бүх асуудлууд нь босч ирнэ дээ. Барьж байхдаа би өчнөөн мөнгөө хэмнээд сайхан байшин бариулчихлаа гэж өөрийгөө зөвтгөнө. Эцэс сүүлд нь бүх алдаагаа засах гэж дахин мөнгө төлөх хэрэгтэй болдог юм. Одоо энэ буруу сэтгэлгээнээсээ салах цаг нь болжээ. Байшин гэдэг чинь таны хувийн газар дээр чинь баригдаж байгаа таны үл хөдлөх хөрөнгө. Үр хүүхэд, ач зээ нарт чинь үлдэх үнэт үл хөдлөх хөрөнгө. Чанартай баригдсан үл хөдлөх хөрөнгө бол удах тусмаа үнэд ордог юм. Цаг хугацаа өнгөрөх тусам инфляцитай хамт үнэ нь өсөж байдаг. Өөртөө зориулж барьж байгаа 10-20 жилийн настай барилгаасаа татгалзаж, үр хүүхэддээ хөрөнгө болж үлдэх 60-100 жилийн настай чанартай барилгаа барьцгаая найзуудаа.

Энэ бүхний эцэст та бүхэнд зөвлөхөд сүүлийн үеийн төрөл бүрийн шилдэг технологууд манай оронд ялангуяа барилгын салбарт ихээр нэвтрэн орж ирж байна. Ямар цаг агаартай оронд бүтээгдсэн, монголд буюу зун нь +40С, өвөл нь -40С хооронд эрс тэрс уур амьсгалтай газарт хэр тохирохыг нь бодолцож аливаа материал бүтээгдэхүүнүүдээ сонгон байшингаа барьцгаагаарай.

Миний бичсэн энэхүү зөвлөгөө таны баригдах чанартай барилгад өчүүхэн ч гэсэн нэмэр болбол би баярлах болно. Мөн манай компанийн facebook хуудсаар орж мессэнжерээр зөвлөгөө авч болно шүү.
Гэрчулуу Констракшн компанийн захирал Т.Отгонтөмөр
Таны мөрөөдлийг чанараар тамгална.
Эх сурвалж: www.gerchuluuconstruction.com

Сэтгэгдэл (2)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

    Сүбэдэй 2018-06-14 11:53 66.181.160.25

    Таалагдлаа баярлалаа
    Сүбэдэй 2018-06-14 11:53 66.181.160.25

    Таалагдлаа баярлалаа