Барилгын салбарынхныхаа дунд жил бүр зохион байгуулдаг “BARILGA BASKETBALL 2018” сагсан бөмбөгийн тэмцээн өнөөдөр “Тэмүүжин” спорт зааланд амжилттай эхэлж, нээлтээ хийлээ.

   Найм дахь жилдээ явагдаж буй уг тэмцээн нь барилгын салбарынхаа төр ба хувийн хэвшлийн бүхий л байгууллагуудын дунд нээлттэй зохион байгуулагдаж, нэгэн өдрийг хамтдаа үр бүтээлтэйгээр спортлог өнгөрүүлж, тэдний дунд найрсаг уур амьсгалыг бүрдүүлэх зорилготой юм.

   Тэмцээний ерөнхий зохион байгуулагчаар “Барилга.МН”, хамтран зохион байгуулагчаар Барилга, хот байгуулалтын яам, Барилгын хөгжлийн төв, Монголын барилгын үндэсний ассоциаци ажиллаж байна.





   Энэ жилийн тэмцээний онцлог нь төр, төрийн бус байгууллагууд, хувийн хэвшлийнхний удирдлагуудаас бүрдсэн холимог хоёр багийн хооронд нөхөрсөг тоглолтыг явуулж, спорт сонирхогч залуустаа урам өгсөн явдал байлаа. Тэмцээний нээлтийн арга хэмжээнд БХБЯ-ны Дэд сайд Ш.Лхамсүрэн, Бодлого, төлөвлөлтийн газрын дарга Л.Батжаргал, БХТ-ийн Дэд захирал бөгөөд ерөнхий инженер Б.Энхболд, ГЗБГЗЗГ-ын орлогч дарга А.Батбаяр, “Барилга Эм Эн” ХХК-ийн Ерөнхий захирал Г.Батсүх, “Барилга.МН” сэтгүүлийн эрхлэгч А.Мягмаржав, МБҮА-ийн УЗ-ийн гишүүн, “БҮТИ” ХХК-ийн гүйцэтгэх захирал Г.Батжаргал, МБНХ-ны ерөнхийлөгч М.Батбаатар, “Майнс Ап” ХХК-ийн Ерөнхий инженер н.Ёндонбат, “Монкон групп”-ийн ерөнхий захирал Ч.Дарханбаатар, “Их Модун” группийн ерөнхий захирал  Б.Цогтсэргэлэн, “Эрин интернэшнл” ХХК-ийн ерөнхий инженер н.Сосорбурам нар хүрэлцэн ирж, удирдлагуудын холимог багт хуваагдан өрсөлдсөн юм.







   “BARILGA BASKETBALL 2018” тэмцээн жил ирэх тусам хүрээгээ тэлж, оролцогч багуудын тоо нэмэгдэж, нийт дор дурдсан 30 байгууллагын эрэгтэй 28 баг, эмэгтэй найман багтайгаар үргэлжилж байна.



   Тэмцээн маргааш үргэлжилж эрэгтэй, эмэгтэй багуудаас тус бүр гурван байр  шалгаруулж, цом, медаль (алт, мөнгө, хүрэл), өргөмжлөл, мөнгөн шагналыг олгох юм. Мөн нийт багуудаас эрэгтэй нэг, эмэгтэй нэг шилдэг тоглогчийг тодруулж өргөмжлөл, мөнгөн шагналыг гардуулна.

   “BARILGA BASKETBALL 2018” тэмцээний Ерөнхий ивээн тэтгэгчээр хамтран ажилласан “Майнс Ап” ХХК-д талархал илэрхийлэхийн ялдамд оролцогч нийт баг тамирчиддаа амжилт хүсье.