Барилгын салбарт өргөнөөр ашиглах болсон Канад технологийн сууц нь манай орны уур амьсгалд нэн тохиромжтой, өнөө цагийн хэрэгцээ шаардлагыг бүрэн хангахуйц оновчтой хэрэглээ юм. Энэ нь эрчим хүчний хэмнэлттэй шинж чанараараа байгаль дэлхий, хүний эрүүл мэндэд эерэг нөлөөтэй, эдийн засгийн үр өгөөжтэй сууц гэдгээрээ хэдийн танигдсан билээ. Гэхдээ мэргэжлийн бус, мэдлэг дутуу хүмүүс дур мэдэн энэхүү технологийн сууцыг иргэдэд барьж өгөх тохиолдол цөөнгүй гардгаас Канад технологийн талаарх ойлголтод сөргөөр нөлөөлж байгаа юм.

  Иймд олон жилийн турш энэхүү технологийг ашиглан, байшин сууцаар иргэдийг ханган ажиллаж буй туршлагатай компаниас мэргэжлийн зөвлөгөөг авлаа. Зөвлөмжөөр 63.1 м.кв талбай бүхий сууцыг төлөвлөн барих, төсөв өртгийн мэдээллийг хамтад нь хүргэж байна.


 

   Суурийн нүхний гүн нь хөрсний чанараас хамаардаг. Сайн чанарын буюу хадархаг хөрстэй нөхцөлд гүехэн ухаж болдог. Мөн суурийн гүний сонголтод хөрсний усны төвшин нөлөөлж байдаг. Ус тусгаарлах түрхлэгийг газрын түвшнээс суурийн ёроол хүртэл түрхэнэ. Суурь нь зэргэлдээх байшингийн суурийг гэмтээхгүй байхад анхаарах хэрэгтэй.

   Суурийн бетоныг бат бэх байлгах 2 чухал зүйл бий. Нэгдүгээрт ус болон бусад хольц нь ямар нэг органик буюу бусад бохирдолгүй цэвэр байх хэрэгтэй. Зуурмагийн дүүргэгчийн найрлагын харьцаа тохирсон байх хэрэгтэй. АОС-д харьцаа нь 1:2:4:0.5 (Цемент:Элс:Хайрга:Ус ) байхад зохимжтой.

   Суурь суух гүнийг стандарт хэмжээгээр хөлдөлтийн гүнээс доош буюу 1.2м-ээс багагүй байхаар тооцдог. Манайхны гаргадаг түгээмэл алдаа бол барилгын суурийг өнгөн хөрсийг хуулж тавьдгаас суурь хэв гажилтад орох магадлал өндөр болж, барилгын ашиглалтын хугацааг бууруулдаг. Ийм өнгөц суурь нь газар хөдлөлт, үер зэрэг байгалийн гамшгийн үед эрсдэлийг дагуулж байдаг. Агаарын температур +5 градусаас доош буюу ойрын өдрүүдэд үүнээс доош орохоор бол цутгалтын ажлыг хийхгүй байх нь зүйтэй.


 

 

   Зүсмэл модон материал. Үндсэн хийцлэл нь Канад банз буюу SPF, үйлдвэрээсээ ус чийгний тусгай хамгаалалттай, үйлдвэрлэгчийн нэр шошготой, зориулалт хэмжээтэйгээ зах зээлд гардаг. Канад банз нь урт, өргөн ялгаагүй ширхэг бүр дээрээ тамгатай байдаг. Харин Монголд энгийн аргаар зүссэн банзаар барьснаар байшин эдэлгээ муутай хүйтэн болох нөхцөл бүрддэг.

   Үйлдвэрийн аргаар маш нарийн хатаан боловсруулсан эдгээр банзнуудыг ангилахдаа 2 болон түүнээс дээш гэсэн зэргийг Канад барилгад голлон хэрэглэдэг. Япончуудад зориулсан “J” зэрэг байдаг ба энэ нь яр багатай холтосгүй, дээд зэргийн банз юм. Канад карказан барилгын хийцлэлд 2 дугаар зэргийнхийг ашигладаг.



   Канад технологийн барилгын үндсэн материал Зоргодсон хавтан буюу OSB. OSB (Oriented Strand Board) хавтан нь маш өндөр даралт болон температурт шахаж бэлтгэсэн байгалийн гаралтай барилгын модон материал юм.

   Холбоос төмөр. Хойд Америкчууд нь орон сууцандаа дэлхий дээрх аюулгүй болон тухтай байдлын хамгийн дээд зэргийн стандартыг ашигладаг. Энэ стандартыг Канад модон барилга хамгийн сайн хангадаг бөгөөд холбоос төмрийг ашигладаг учраас барилгыг илүү бат бөх болгож өгдөг.  Энэхүү холбоос төмрийн үйлдвэрлэлд 50 жилийн туршлагатай “Simpson Strong Tie” компани тэргүүлдэг.



   Барилгын дулаалга. Тусгаарлах, дулаалах нь амины орон сууцны барилгын явцын хамгийн чухал хэсгүүдийн нэг. Дулаалга нь эрчим хүчний зардалд ихээхэн нөлөө үзүүлдэг. Дулаан нь халуун газраас хүйтэн рүү байнга шилждэг бөгөөд үүнээс болж байшин хүйтэн байдаг. Өвлийн улиралд байшингийн дотор талын халуун агаар гадагш алдагдаж сууцыг хүйтэн болгодог бол зуны улиралд энэ урсгал нь эсрэгээрээ байж сууцыг тухгүй халуун болгодог.

   Зөв материалаар тусгаарлаж, дулаалсан амины орон сууц нь энэ дулааны урсгалыг багасгаж, урт хугацаанд ихээхэн хэмжээний хөрөнгө зардлыг хэмнэх болно. Канад барилгад АНУ-ын "GUARDIAN" брэндийн эрдэс хөвөнг ихэвчлэн ашигладаг.


 

   Барилгын ажил нь хэд хэдэн үе шатанд хуваагддаг. Барилгачид энэ үе шатуудыг нарийвчлан төлөвлөж биелүүлснээр барилга чанартай болох эсэх, хугацаандаа ашиглалтад орох зэрэг нь шийдэгддэг.

   Бэлтгэл үе шат. Энэ нь байшингийн бүх зураг төсөл, түүний өөрийн өртөг тооцох, санхүүжилтийн асуудлыг шийдэх, зөвшөөрөл авах зэрэгт зарцуулах хугацаа юм. Шаардлагатай бол түр зам засах, барилгын талбайг түр цахилгаанаар хангах ажлууд мөн багтдаг.

   Хөрс болон суурийн бэлтгэл ажил. Улаан шугам татах ажил дууссаны дараа суурийн нүх ухах ажил эхэлдэг. Нүх ухах ажил нь нэг өдөрт ихэвчлэн багтдаг. Харин хэв зангидах, инженерийн шугам сүлжээг байршуулах, бетон цутгах, хэв хашмалаа хуулж авах зэрэг ажлуудад нэлээд хугацаа шаардагддаг.

   Карказ угсралт. Цаг агаарын нөхцөлөөс барилгын дараагийн үе шатны ажлуудыг хамгаалахын тулд карказыг дээвэртэй нь угсрах үйл явц 2 долоо хоног орчим болдог.



   Хаалга, цонх суулгах. Карказын ажил дууссаны дараа хаалга, цонх суулгах ажил 3 хоног хүртэл үргэлжилнэ. Цоож, нугас суулгах ажил мөн багтана.

   Ус дамжуулах шугам, цахилгааны холболт. Ус сувгийн гадаад болон дотоод холбоосуудыг угсарна. Угаалтуур шүршүүрийн холболтуудыг хийж өгнө. Байшиндаа бүхэлд нь цахилгаан болон холбооны шугам татаж галын дохиоллын монтажийг хийнэ. Эдгээр нь 7 хоногт багтана.

   Гадна засал. Гадна заслын хэлбэр, шийдлээс хамаарч энэ ажил нь нэг юм уу, 2 долоо хоног үргэлжилнэ. Гадна засалд тоосгоор өнгөлөх, шавардлага хийх, усны хаялга тогтоох, цонх хаалганы амалгаа хийх, будаг хийх ажил хамаарна.

   Дулаалга. Хэрэв дулаан тусгаарлагчийг хийх үед бороонд норохооргүй бол гадна засалтай зэрэг гүйцэтгэж болно. Дулаалгын ажлыг нягт нямбай хийх хэрэгтэй.



   Дотоод засал. Дотоод заслын ажил нь шал, хана, таазнаас эхэлдэг. Дотор хаалга, гоёлын хүрээ, шатны хайсны шон, бариул зэргийг хийх нь багтдаг. Эдгээр ажилд нэлээд хугацаа шаардагдах ч баримжаагаар 2 долоо хоногийн хугацаагаар төлөвлөх нь зүйтэй.

Гадна талбайн тохижилт ба зүлэгжүүлэлт. Энэхүү сүүлийн шатанд гадна талбайн төлөвлөлт, автомашин орох зам, шат гишгүүр, зүлэгжүүлэлт, мод бут хийх ажлууд багтана. Энэ нь 10 орчим хоног үргэлжилнэ.



Зөвлөгөөг бэлтгэсэн: “Ай Хаус” ХХК