Байгальд ээлтэй 350 метр өндөр модон цамхгийг Япон компани барина

Байгальд ээлтэй 350 метр өндөр модон цамхгийг Япон компани барина
  Японы барилгын “Сумитомо Форестри” компани нь Токио хотын төв гудамжнаа тус улсад хамгийн өндөрт тооцогдох модон цамхгийг барихаар болжээ. Алдарт “Nikken Sekkei” компаниас загварыг нь гаргасан 350 метр өндөртэй уг модон цамхаг нь хүрээлэн буй орчинд ээлтэй “W350” төслийн албан ёсны нэг хэсэг нь юм. Цамхгийг 2041 онд “Sumitomo” корпорацийн 350 жилийн ойг тохиолдуулан ашиглалтад оруулахаар зорьжээ. Төмөр болон модон бүтээц хослуулан барьж буй уг барилга нь хотыг ой мод мэт харагдуулна гэж компанийн зүгээс үзжээ.



   “W350” төсөл нь тус корпорацийн эрүүл амьдрах орчныг бий болгох зорилгын хүрээнд байгалийн гэрэлтүүлгийг илүү сайн тусгасан, ногоон байгууламжийг хангалттай байхаар шийдсэн бүтээн байгуулалт болох аж. Түүнчлэн барилгыг газар хөдлөлтөд тэсвэр сайтай байлгахад анхаарч, мод, ган бүтээцийг 9:1 гэсэн харьцаатайгаар барьж гүйцэтгэх юм байна.



   Барилга бүтээн байгуулалтын хөгжлийн илэрхийлэл болж тэнгэр баганадан сүндэрлэх энэхүү цамхагт зочид буудал, оффис, худалдаа үйлчилгээ, орон сууцнууд байрлана. Энэ барилга нь дэлхийн хамгийн өндөр модон барилгуудын нэг болох юм.



   Барилгад 1.9 сая шоо куб мод, 600 тэрбум гаруй иен шаардагдах юм байна. Мод болон гангийн холимог бүтээцээр барих тул барилгын интерьер засал нь хүмүүст байгалийн цэвэр орчныг санагдуулам байх болно гэж үзжээ. Төсөл нь модон барилгын архитектурын нэр хүндийг өргөж, хөдөө орон нутагт ойн аж ахуйн салбарыг сэргээж, ойжуулалтыг эрчимтэй явуулахад багагүй дэмжлэг болно гэж зохион бүтээгчид нь өгүүлсэн юм.



 
Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.