Ц.Энхжин: Хүүхэд насны мөрөөдөл хожмын амьдралын минь хөтөч болсон

Ц.Энхжин: Хүүхэд насны мөрөөдөл хожмын амьдралын минь хөтөч болсон
Ажил байдлын тодорхойлолт

2014 он “Enterprise Society” Бүтээлч захирал, Англи улс
2015 он “Mineheart” Бүтээгдэхүүний дизайнер, Англи улс
2015 он “Skinny Studio”- Интерьер дизайнер
2015 он-одоог хүртэл “Eden design” ХХК-ийн захирал, интерьер-дизайнер

      Өөрийн хүч чадалдаа итгэж, өөрийгөө дайчилж, хурцалж яваа чадварлаг интерьер- дизайнер, басхүү дэлхийн хэмжээний мисс, манай улсын барилгын салбарын тод нүүр царай, гялбаа нь болсон “Eden design” ХХК-ийн захирал Ц.Энхжинтэй ярилцлаа.

Тус компанийн ажлын байраар зочлоход онцгой сэтгэгдэл төрүүлэм байсныг дурдахгүй өнгөрч боломгүй. Хөшиг, ширээ сандал, тавиур гээд бүхий л тавилга хэрэгслээ эко буюу дахин боловсруулсан материал ашиглан өөрсдийн гараар бүтээсэн нь өвөрмөц санагдсан юм.
 
-Юун түрүүнд тэмцээнд “Дэлхийн мисс 2017” тэмцээнд эх орноо төлөөлөн өндөр амжилттай оролцоод ирсэн танд баяр хүргэе.
-Баярлалаа.
 
-Ярилцлагаа “Ажлын нэг өдөр” булангийн маань уламжлалт асуулт болох өнөөдрийн төлөвлөсөн ажлын тань хуваариас эхэлье.
-Одоогийн байдлаар сургууль нээх гэж байгаатай холбогдуулан засварын ажилд түлхүү анхаарч байна. Өглөө дэлгүүрээр явж заслын материалууд цуглууллаа. Үдээс хойш ажлын уулзалттай, орой хоёр ч хүлээн авалтад оролцох ёстой юм байна.
Ер нь өдөр бүр маш завгүй өнгөрдөг. Өглөө босоод дасгал, бясалгал хийгээд цайгаа тайван уугаад гэрээсээ гарна. Ажилдаа ирэх замдаа утсаар ярих ажлуудаа амжуулж, ирсэн хойноо багийнхантайгаа өмнөх өдрийн ажлаа дүгнэж, тухайн өдрийн ажлаа хуваарилахаас эхэлдэг дээ. Өдөр бүр оролцох арга хэмжээ, уулзалтын хуваарь, хийх ажил маань янз бүр байдаг учир зарим өдрийг урьдчилан төлөвлөхөд бэрх.

 
-Компаниа үүсгэн байгуулсан дурсамжаасаа хуваалцвал?
-“Eden design” компанийг байгуулаад хоёр дахь жилийн нүүр үзэж байна. Сургуулиа төгсөж ирээд л компани байгуулсан. Энэ бол миний багын мөрөөдөл байсан юм. Энэ хугацаанд Италид магистр хамгаалаад, эргэн ирж тогтвортой ажиллах болсон.
Манай компани интерьер, экстерьерийн зураг төсөл, гүйцэтгэл, бүтээгдэхүүний дизайны чиглэлээр ажиллаж байгаа. Одоо шинээр байгуулж буй сургуулийн үйл ажиллагаа бас нэмэгдэж байгаа.
 
-Шинээр байгуулж буй “Eden design” сургуулийнхаа тухай яриач.
“-Eden design school”-д бүх насныхныг хамруулах бөгөөд тэдний бүтээлч сэтгэлгээг хөгжүүлэх, бүтээгдэхүүний дизайны дэс дараалал, багаар ажиллах чадварыг эзэмшүүлэх, гоо зүйн болон тогтвортой хөгжил, гар доорх бэлэн материалыг хэрхэн өөрт ашигтайгаар хэрэглэх гээд олон талын мэдлэгийг өгөх зорилготой. Таны харж байгаачлан манай оффист картон цаасыг ашиглан ширээ, сандал хийсэн. Энэ мэтчилэн элбэг байдаг, хямд төсөр материалаар   байгаль орчин, хүний эрүүл мэндэд ээлтэй, хэрэгтэй эд зүйлсийг өөрийн гараар  хийх аргыг зааж өгөх юм. Мөн манай компанийн дизайнерууд 3D, гар зураг, гар урлал зэрэг хүүхдүүдийг хөгжүүлэх хичээл орно.
 
-Сургуулийг чиглэсэн олон нийтийн хандалт хэр байна?
-Бид энэ долоо хоногт анхныхаа хичээлийг явуулна. Хүмүүс их ам сайтай, өндөр хүлээлттэй байгаа шүү. Энэ үйл ажиллагаа маань хүүхэд, залуус гэлтгүй олон хүнд хүртээмжтэй байж, тэднийг цаг заваа үр бүтээлтэй өнгөрүүлж, бүтээлч нэгэн болоход нь тус болно гэдэгт итгэлтэй байна.
 
-Интерьер дизайны хэчнээн төсөл дээр ажилласан бэ?
-Одоогоор 20 гаруй төсөл дээр ажилласан байна. Айл өрх болон оффисын барилгын интерьер засал дээр түлхүү ажилласан байдаг.
 
-Ард тань бат найдвартай зогсдог хамт олноо танилцуулаач.
-Манай хамт олон салбартаа мэргэшсэн туршлагатай мэргэжилтнүүд цөөнгүй бий. Манай багийн дизайнер Б.Ананд л гэхэд компьютер график, рендерийн чиглэлээр 10 гаруй жил ажилласан, дизайны ажилд хэрэглэгддэг компьютерын программуудыг өндөр түвшинд эзэмшсэн хүн. Дизайнер Б.Цэрэнчимэдийн тухайд шинэ санаа гаргах, 3D график болон маркетинг менежментийн чиглэлдээ илүү сайн. Дизайнер Н.Ундраа маань ажлын зураг дээр түлхүү ажилладаг, гараар маш сайн зурдаг, график дизайнаар мэргэшсэн.  Мөн хэдэн үеэрээ зураач, урлаач хийж буй Итали дизайнер,  олон улсын төсөл хөтөлбөрүүд, онгоцны буудлын төсөл дээр ажиллаж байсан туршлагатай англи архитектор бий. Энэ мэтчилэн чадварлаг хүмүүстэй баг болон ажиллаж байгаадаа их баяртай байдаг шүү.
 
 
-Интерьер дизайн гэдэг таны багын мөрөөдөл, энэ мэргэжилд өөрийгөө эртнээс бэлтгэж эхэлсэн гэсэн. Энэ тухайгаа дэлгэрүүлбэл…
-Би багаасаа интерьер дизайнер болохыг хүсч, үүнийхээ төлөө суралцаж, ажилласаар ирсэн. Ижий, аав хоёр маань намайг 12 настай байхад интерьер дизайнерын багш хөлсөлж, энэ чиглэлийн нэг, хоёрдугаар  курсэд ордог хичээлийг гэрээр заалгаж байлаа. Улмаар энэ мэргэжлийг эзэмшихэд ямар шат дараалалтай суралцах, ямар мэдлэг, чадварыг эзэмшсэн байх ёстойгоо төлөвлөсөн. Ингээд “Элит” олон улсын сургуульд  англи хэлний мэдлэгээ сайжруулаад, дараа нь ШУТИС-ийн Дизайны лицейг төгсөж, тус сургуулийнхаа нэгдүгээр курст орж, зургийн чадвар, дизайны мэдлэгтээ анхаарч, дараа нь Англид суралцахаар болсон. Англид нэгдүгээр зэрэглэл буюу хамгийн өндөр зэрэглэлтэйгээр сургуулиа дүүргэсэн. Энэ хугацаанд сургуулиасаа оюутны төлөөлөгчөөр сонгогдон ажиллаж, бас доод курсийн оюутнууддаа хичээл зааж, сургуулиа төлөөлөн тэмцээн уралдаанд оролцож, үзэсгэлэнгээ хүртэл гаргаж байлаа. Итали улсад суралцахдаа ч мөн адил хамгийн өндөр үнэлгээтэй төгссөн.
 
-Таныг Их Британийн босго өндөртэй сургуулиудын нэг Кембриджийн их сургуулийг төгссөн хүн учраас өнөөгийн Монгол дахь архитектур, дизайны боловсролын систем, түүний ялгааны тухай асууя.
-Англи сургалтын систем илүү практик дээр тулгуурласан байдаг. Оюутнуудыг яаж задгай сэтгэх, гүн утга санаатай дизайныг хэрхэн бүтээх вэ гэдэгт чухал ач холбогдол өгч, тэдний бүтээлч сэтгэлгээг хөгжүүлсэн хичээлүүдийг заадаг. Нэгдүгээр курсээсээ эхлээд л бодит төслүүд дээр ажиллаад явчихдаг учраас төгсөөд шууд ажлын байран дээр гарахад дөхөм байсан. Харин Монголд би зөвхөн нэгдүгээр курсээ дүүргэсэн учраас сайн хэлж мэдэхгүй юм. Гэхдээ миний ажигласнаар сургалтын систем нь илүү онол талдаа  байдаг юм шиг санагдсан. Хичээлүүд нь бодит байдлаас хол, уялдаа холбоо тааруу. Мөн Монголын дизайнерууд ур чадвар сайтай боловч санаагаа хэрхэн илэрхийлэх дээр дутмаг гэж ажиглагддаг.
 
-Таны хүндэлж явдаг дизайнер, архитектор?
-Америкийн архитектор Стивен Холл. Энэ хүн гүн гүнзгий утга санаа, философитой загвар гаргадаг. Тухайн барилгын орчин тойрон гээд бүх зүйлийг нь бодолцож загвараа гаргадаг учир түүний төслүүд хоорондоо давтагддаггүй, өвөрмөц, онцгой байдаг. Мөн гэрэл сүүдрээр сайн тоглодог учир сонирхолтой шийдлүүдтэй.
 
-Суралцах хугацаандаа гаднын сайн бүтээлийг өөрийн биеэр харж, судлах зүйл байсан байх.
-Бидний харж, сонсож, уншиж байгаа бүхэн далд ухамсарт хадгалагдан үлддэг. Тиймээс аль болох шинэ үзэсгэлэн үзэх, ном сэтгүүл унших, сонирхолтой газрууд болон уран барилгууд харах гээд байнга оюун ухаанаа тэлж байх нь чухал. Англид байхдаа эртний болон орчин үеийн уран барилгын шийдлийг шимтэн сонирхож, биеэр очиж үзэж, хаана л үзэсгэлэн нээгдсэн байна, тэнд яваад оччихдог байлаа. Хамгийн их сэтгэлд гүн үлдсэн нь гэвэл дэлхийн хамгийн шилдэг архитекторуудын оролцсон “Sensing spaces” гээд үзэсгэлэн. Энэхүү үзэсгэлэн нь хэлбэр дүрс, үнэр, аялгуу, гэрэл, материалын шинж чанар зэргийг сонирхолтой байдлаар ашиглан таван мэдрэхүйд нөлөөлж, гайхалтай өвөрмөц мэдрэмжийг төрүүлж чадсанаараа онцлог байсан.
 
-Та өөрөө ямар чиглэлийн дизайны шийдэлд дуртай вэ? Мөн таны бүтээл хийх арга барилын тухай?
-Контемпорариг классик хэв маягтай хослуулсан дизайн таалагддаг. Миний ажлаа хийхдээ баримталдаг хамгийн чухал зарчим бол зөв хандлага төрүүлэх явдал юм. Жишээ нь, нэг айлын гэрийн интерьер дизайныг хийхээр бол тухайн гэр бүлдээ хамгийн тав тухтай, халуун дулаан уур амьсгал төрж байгаасай, хүүхдүүд нь хичээлээ хийхдээ анхаарал нь сайн төвлөрөөсэй гэх мэтээр бодож сэтгэж ажлаа эхлүүлдэг. Ингэж сайн сайхныг хүсэж хийсэн ажлын үр дүн өндөр байдаг гэдэгт итгэдэг.
Мөн ажлаа дэс дараалалтай хийхийг хичээдэг. Дизайны үе шатууд нь ажлыг хөнгөвчилж, эмх цэгцтэй бодож сэтгэн, анхны санаанаасаа хазайлгүйгээр оновчтой шийдэл гаргахад тусалдаг. Мөн багийн ажиллагааны үнэ цэнийг маш сайн ойлгосон учраас аливаа ажлыг эхлэхийн өмнө багаараа ярилцаад ажлаа нарийн хуваарилаж, цагаа нарийн төлөвлөсний дараа л эхэлдэг. Ингэснээр багт үл ойлголцол, нэгийгээ хүлээх зэрэг эрч хүч, цаг үрдэг сөрөг хүчин зүйлсээс сэргийлж чаддаг.
Ажлын орчноо өөрчилж байвал илүү шинэ соргог байж чаддаг гэж үздэг учраас заримдаа багаараа кофе шопт сууж ажлаа хийх гэх мэтээр байнга шинэ, соргог сонирхолтой зүйлс санаачилж олж багаа идэвхжүүлэхийг боддог.

 
-“Дэлхийн мисс 2017” тэмцээний үеэр таны санаачилсан төсөл шилдэг 20 хүмүүнлэгийн төсөлд шалгарсан. Энэхүү төслөө та бүхэн цаашид үргэлжлүүлэн хэрэгжүүлэх үү?
-Хэнтийн аймгийн Биндэр суманд дахь ерөнхий боловсролын сурагчдын дотуур байрны ариун цэврийн өрөөг тохижуулахад миний бие дизайныг нь гаргаж, гүйцэтгэлийг хянаж ажилласан. Төслийн маань гол зорилго нь хөрсний бохирдлын хор уршгийг иргэдэд таниулж, дор бүрнээ шийдэх боломж бололцоог бий болгож, түүнд шаардлагатай хөрөнгө оруулалтыг дэлхийн сайн үйлсийн байгууллагуудаас татах юм л даа. Цаашид энэхүү төсөл хэрэгжээд явах болно.
 
-Танай компанийн ирээдүйн зорилт, хэтийн төлөвлөгөө, чиглэл юу байна вэ?
-Эхний ээлжинд сургуулийн үйл ажиллагаагаа тогтвортой, амжилттай явуулахыг зорьж байна.
Сургуулиа төгсөөд Монголдоо ажиллаж эхэлснээс хойш миний анзаарсан зүйл бол манай оронд хэрэглэгчдийн дизайныг хүлээж авах байдал нь их өвөрмөц бөгөөд зарим үед үйлчлүүлэгчдэдээ боловсрол олгох, мэдлэгийг нь дээшлүүлж, хэрэгтэй болдог. Бид энэ хэрэгцээнд үндэслээд бүх насны хүмүүст хэрэгцээтэй байгаа дизайн болон гоо зүйн мэдлэгийг олгох хичээлүүд, контент бүтээх хүсэлтэй байна. Мөн цаашид үйлдвэрлэл эрхлэх бодолтой байгаа.
 
-Цаг зав гарган ярилцсанд баярлалаа.



 

 
Эх сурвалж: Барилга.МН сэтгүүл 2018.01-р сарын дугаар

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.