Ногоон барилгын сонгодог жишээ болсон Шанхайн нисдэг машины цамхаг

Ногоон барилгын сонгодог жишээ болсон Шанхайн нисдэг машины цамхаг
   Нисдэг машин гэхээр шинжлэх ухааны уран зөгнөлт ямар нэгэн зүйлийн талаар өгүүлэх гэж буй мэт санагдаж байна уу? Тэгвэл таны зөв. Үнэхээр уран барилгын уран зөгнөлт бүтээл болсон “Smart Power Long” хэмээх цамхаг Шанхай хотноо сүндэрлэнэ. Энэ нь ирээдүйн нисдэг машин буюу дронуудыг хүлээн авах зогсоолтой, 50 мянган мод, бут бүхий ногоон барилгын бүх шийдлийг агуулсан, өвөрмөц төлөвлөлт, шийдэлтэй  барилга юм.
           
   Түүнчлэн 2017 оны эхэн үеэс нисдэг таксины  үйлчилгээ явуулж  эхэлсэн Дубайн хөрөнгө оруулагчид ч нисдэг машин-дронд зориулсан үйлчилгээг нэвтрүүлэхээр төлөвлөж байна. Харин энэхүү дрон машины цамхаг барих санаачилгыг “RA+D” компани 2015 онд анх гаргасан бөгөөд  2020 онд бүрэн дуусч, ашиглалтад орох юм байна.



   Ихэнх хэсгийг нь орон сууцны зориулалтаар ашиглахаар төлөвлөсөн уг барилгын загварыг Хятадын луугийн урлагаас санаа аван гаргажээ. Барилгын гадна талд дрон машинуудад зориулсан цэнэглэгч станцуудыг суурилуулах гэнэ. Түүнчлэн нүүрстөрөгчийн давхар ислийг олж илрүүлэх 180 төхөөрөмжийг суурилуулж, олон тооны мод, бут сөөг төлөвлөсөн нь орчны агаарыг цэвэршүүлэхэд ихээхэн нөлөө үзүүлнэ гэж архитекторууд тооцоолжээ. 


           
   Байгальд ээлтэй бүтээн байгуулалтыг эрхэмлэх болсон дэлхий нийтийн чиг хандлагыг дагаж, энэхүү барилгын эд анги бүрт цэвэр технологийг ашигласан байна. Тухайлбал, бохир усыг дахин ашиглах боловсронгуй системийг төлөвлөснөөр барилгад “ургах” бүх л ургамал,   модыг услах боломжтой аж.



   Цамхаг дахь босоо чиглэлийн цахилгаан станц нь нар, салхи, ус, газрын гүний дулааныг ашиглан эрчим хүч  үйлдвэрлэж, өөрөө өөрийгөө бүрэн хангах эх үүсвэртэй болох юм. Олон төрлийн зориулалт бүхий энэхүү барилга нь хурлын төв, усны биологийн лабораториуд, орон сууцнуудыг багтаажээ. Шанхайн Пудонг дүүрэгт баригдах тус төслийн нийт төсөвт өртөг  600 сая ам.доллар юм.







Холбоотой мэдээ