Интерьер загварыг "Eden design" компани бүтээв. Энэхүү тансаг зэрэглэлийн хаусын интерьер дизайны шийдлээр дамжуулж, гоо зүйн өндөр мэдрэмжтэй, ая тух орчин, баяр баясгалан төрүүлэх зураг төслийг танилцуулж байна.
Зочны өрөөг хооллох хэсгээс хөвж буй мэт камин зуухаар тусгаарлаж, бүхэлд нь байгалийн завсрын өнгөөр шийдэж, энэ онд трэнд болж буй шийдэл болох хоёр өөр загварын буйданг, алтлаг кофены ширээтэй хослуулжээ.
Алтлаг өнгөтэй Итали гал тогооны тавилга, таазны гэрэлтүүлэг, зочны өрөөний тавилгуудтай хослол үүсгэж, цэвэр цэмцгэр, тансаг бөгөөд тухтай орчинг бүрдүүлнэ.



Хооллох хэсгийг үүдний хэсгээс шилэн тавиураар тусгаарлаж, бага насны хүүхэд хооллох үед бохирдуулахгүй байх үүднээс цэвэрлэхэд хялбар материал бүхий ширээ сандал сонгосон. Гэрэлтүүлэг нь энэ хэсгийн уур амьсгалыг зөөллөж, хөнгөн болгоно.


Мастер унтлагын өрөө нь байгальд буй мэт мэдрэмж өгнө. Хувцасны өрөөний гүйдэг хаалга нь онгойгоогүй үедээ ч өөрийн дизайны үүргийг сайн гүйцэтгэнэ.

Бага насны хүүхдүүдийн өрөөнд пастел өнгүүдийг ашигласан нь, хүүхдийн нүдэнд стресс үүсгэхгүйгээр сонирхолтой орчинг бүрдүүлж өгнө. Унтах, тоглох, хичээллэх орон зайг эмх цэгцтэй, аюулгүй байх шаардлагад нийцсэн байна.
Хүүхдүүдийн ариун цэврийн өрөөг цэвэрхэн бөгөөд хөгжилтэй байдлаар шийдэж өгчээ.



Нэгдүгээр давхрын зочны ариун цэврийн өрөөг гантиг плитагаар шийдэж, гэрэлтүүлгээр атмосфер үүсгэсэн.
Шатны хонгилыг мод болон гантиг чулуугаар шийдэж, босоо шугамын дагуу гэрэлтүүлэг суулгасан нь шинэлэг бөгөөд сүрлэг мэдрэмж төрүүлнэ.