“Тесла” компанийн гол бүтээгдэхүүн болох цахилгаан машин, нарны зайн хавтан үйлдвэрлэл нь автомашины бусад үйлдвэрлэгчдэд хэдийн нөлөөгөө үзүүлжээ. Учир нь “Ниссан”-аас Nissan Energy Solar компанийг байгуулж, энэ салбарт өрсөлдөх гэж буйгаа зарлалаа.

   Тэд нарны эрчим хүч үйлдвэрлэх дээврийн хавтангууд, зай хураагуур xStorage Home бүтээгдэхүүн гаргаж, борлуулж эхлээд байгаа юм. Тухайлбал, шинэ бүтээгдэхүүнийг хамгийн түрүүнд хэрэглэж эхлэх Их Британийн худалдан авагчид нь эрчим хүчний зардлаа 66 хувиар хэмнэх боломжтой болжээ.



   “Nissan Energy Solar” компани нь “бүгдийг нэг шийдлээр” гэсэн уриатайгаар үйлдвэрлэлээ явуулж, гурван төрлийн хавтангийн сонголтыг санал болгож байгаа юм. Үүнд: нэгдүгээрт өрсөлдөхүйц боломжийн үнэ, хоёрдугаарт хамгийн их хэмнэлт хийх боломж, гуравдугаарт дээвэрт суурилуулах загварын хавтангууд гэсэн сонголтууд байгаа аж.

   Эдгээрийг зай хураагуур xStorage Home бүтээгдэхүүнтэй хослуулснаар иргэд сэргээгдэх эрчим хүчийг үр дүнтэйгээр хялбархан ашиглах боломжтой гэнэ. Иргэд нарны эрчим хүчний хавтан, зай хураагуурыг тус бүрээр нь, эсвэл хоёуланг нь хослуулан хэрэглэж ч болох аж. Мөн уг системээр Nissan Leaf болон e-NV200 машинуудыг цэнэглэж ч болох юм байна.



   Хамгийн гол нь үнийн хувьд нэлээд боломжийн хямд гэдгийг тэд харьцуулан гаргажээ. Зах зээл дээр 5,383 доллараар зарагддаг зургаан хавтангийн системийг суурилуулах үнэтэй нь хамт 3,881 доллар, 10,589 доллараар үнэлэгддэг нарны хавтан ба зайн цогц системийг 7,635 доллараар тус тус үнэлжээ. Эдгээр системийг тун удахгүй зах зээл дээр борлуулж эхлэх аж.