Хятад улс дэлхийн хамгийн том агаар цэвэршүүлэгчийг байгуулжээ

Хятад улс дэлхийн хамгийн том агаар цэвэршүүлэгчийг байгуулжээ

   Агаарын бохирдолттой тэмцэх гайхалтай шинэ санааг Хятадын зохион бүтээгчид хэрэгжүүлснээ дэлхий дахинаа зарлалаа. Сүүлийн жилүүдэд ихээхэн шүүмжлэл дагуулаад байсан агаарын бохирдлын асуудлаа шийдэхэд тус улс нэлээд хүчин чармайлт гаргаж, амжилттай ажиллаж байгаа билээ.

   Тухайлбал Шьянси мужид орших Сиань хотноо дэлхийд хамгийн томд тооцогдох агаар цэвэршүүлэгчийг байгуулсан нь олон улс орны анхаарлыг татаад байна. 100 метр өндөртэй уг цамхаг хэдийн хэвийн ажиллагаагаа эхэлсэн бөгөөд агаарын чанарт эерэгээр нөлөөлж эхэлжээ.



   Уг агаар цэвэршүүлэгчийн бүтээсэн төслийн багийн ахлагч, эрдэмтэн Цао Зьюнзи “South China Morning Post” сонинд уг төхөөрөмж нь агаарын бохирдолттой тэмцэхэд ихээхэн хувь нэмэр оруулна гэдэгт найдаж буйгаа ярьсан байна. Тэрээр “Цамхгийн хэмжээнээс үл хамааран үр дүн нь гайхалтай сайн байна” гэжээ.



   Хөлбөмбөгийн талбайн хагастай тэнцэх уг хүлэмжийн цамхгийн суурь нь эргэн тойрны бохир агаарыг өөртөө татан сорох юм. Утааг нарны эрчим хүчээр халааж, цамхаг дотор дүүргэж байгаад хэд хэдэн цэвэршүүлэгчээр дамжуулан шүүж цэвэршүүлэх аж.



   Сиань хотынхон дулаан, халаалтын асуудлаа ихэвчлэн нүүрсээр шийддэг учраас хүйтний улиралд өтгөн утаанаас нь болж агаар ихээр бохирддог юм байна. Өвлийн туршид нарны эрчим хүч доод түвшинд байхаас үл хамааран цамхгийн хүлэмж дэх тусгай гадарга нь жилийн турш утаа, бохир агаарыг сорж цэвэршүүлэх боломжтой гэнэ.

Холбоотой мэдээ