Орон сууцны дулаан хангамж хариуцсан хувийн компаниудад гэнэтийн шалгалт хийжээ

Орон сууцны дулаан хангамж хариуцсан хувийн компаниудад гэнэтийн шалгалт хийжээ

  Өвлийн жавар ид тачигнаж, ес эхэлсэн энэ өдрүүдэд Эрчим хүчний зохицуулах хорооноос "Дулаан орчин-хэрэглэгчийн ая тух” сэдэвт хэрэглэгчийн сарын аяныг эхлүүлээд байна. Улаанбаатар хотын орон сууцны хэрэглэгчдийн ая тухтай өвөлжих нөхцлийг бүрдүүлэх, тэдний гомдол маргааныг түргэн шуурхайшийдвэрлэх, хэрэглэгчийн эрх ашгийг хамгаалах үүднээс энэхүү аяныг зохион байгуулж байгаа аж.

   Аяны хүрээнд энэ сарын 8-9-ний өдрүүдэд дулаан түгээх, хангах үйл ажиллагаа эрхлэх тусгай зөвшөөрөл эзэмшигч нийслэлийн болон хувийн өмчит орон сууц ашиглалтын үйл ажиллагаа эрхэлж байгаа компаниудын диспетчерийн үйл ажиллагаа, горим барилт, ус, дулаан дамжуулах тоноглолын бэлэн байдал, хэрэглэгчийн гомдол, санал, дуудлага барагдуулалт зэргийг хянахаар гэнэтийн үзлэг шалгалт хийжээ. Үзлэг шалгалтанд Нийслэлийн Баянзүрх дүүргийн 16, 25 дугаар хороо, Хан-Уул дүүргийн 2, 3, 4, 15 дугаар хороо, Сонгинохайрхан дүүргийн 17, 18 дугаар хороо, Баянгол дүүргийн 1, 6 дугаар хорооны нутаг дэвсгэрт үйл ажиллагаа эрхэлж буй дулаан түгээх, хангах компаниуд хамрагдсан байна.



Шалгалтын явцад орон сууцны дулаан хангамж хариуцсан хувийн компаниудад
  • Хэрэгцээний халуун усны эргэлтийн насосыг зогсоосон, шөнийн цагаар хэрэгцээний халуун усыг хязгаарладаг
  • Халаалтыг тохируулга хийж хэрэглэгчдэд өгөх ёстой горимоос багасгасан
  • Батлагдсан горимын графикийг мөрдөж ажиллаагүй
  • Итгэмжлэгдсэн байгууллагаас албан ёсоор баталгаажуулаагүй тоолуур, хэмжих хэрэгслүүдийг ашигласан
  • Хэрэглэгчийн дуудлага, гомдол саналыг авдаг утасгүй
  • Горим, параметрийн мэдээг тогтмол хөтөлдөггүй, хөдөлмөр хамгааллын зааварчилгаа өгдөггүй зэрэг дутагдал илэрчээ.
 
   Эрчим хүчний зохицуулах хорооны мэргэжилтнүүд зөрчил дутагдлыг газар дээр нь арилгах зөвлөмж, чиглэл өгч ажилласан байна. Цаашид хэрэглэгчийн дулаан хангамжийн чанар, горим барилтыг шалгах ажлыг "Улаанбаатарын дулааны сүлжээ” ТӨХК-тай хамтарч явуулах юм.

  Үзлэг шалгалтаар илэрсэн алдаа дутагдлыг арилгах, засч залруулах ажлын хүрээнд тусгай зөвшөөрлийн нөхцөл, шаардлагын биелэлтийг дүгнэж, хэрэглэгчдийг найдвартай, чанартай дулааны эрчим хүчээр хангахад анхаарч ажиллана гэлээ. Мөн "Дулаан орчин-хэрэглэгчийн ая тух” сарын аяны хүрээнд холбогдох тусгай зөвшөөрөл эзэмшигч байгууллагуудад үүрэг чиглэл, зөвлөмж хүргүүлсний зэрэгцээ аймгийн төв, төвлөрсөн суурин газруудад холбогдох арга хэмжээ авч хэрэгжүүлж ажиллахыг аймгуудын Эрчим хүчний зөвлөлд даалгасан байна.
 
 
Эх сурвалж: Эрчим хүчний зохицуулах хороо

Сэтгэгдэл (1)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

    зочин 2018-01-10 14:30 202.70.33.242

    Тийм шүү. Нисэхийн ОС-ны халуун ус шөнө байхгүй болчихдог