Францын архитектор Элизабет де Портзамбарк нь Тайванийн Тайчунг хотноо сүндэрлэх Оюун ухааны төвд зориулсан барилгын төлөвлөлтийг танилцууллаа. 243 метр өндөр, өвөрмөц загвар дизайн бүхий уг цамхагт давхар бүртээ ногоон байгууламж, зүлэгтэй байх бөгөөд агаар сэлгэлт сайтай, эрүүл орчныг бүрдүүлсэн интерьерийн шийдэлтэйгээрээ онцлог аж. Хүрээлэн буй орчинд нь ногоон байгалийг санагдуулам таатай уур амьсгалыг бүрдүүлэхийг хичээжээ.

  TIOC цамхагт дижитал соёлын төвөөс гадна худалдааны төв, олон төрлийн зоогийн газрууд, оффис байрлах бөгөөд архитектурын шийдэл нь орчин тойрны хот төлөвлөлттэйгөө уялдаатай, зохицсон байхаар шийдэхийг хичээсэн аж. Оффис, зоогийн газрууд, олон нийтийн хэсэг, жижиг цэцэрлэгт хүрээлэн зэрэг нь тэндхийн ажилтнууд, зочид, аялагчдад таатай сэтгэгдэл төрүүлэхүйц тав тухтай, эргэн тойрон ногоон зүлэг ногоогоор дүүрэн байлгах гэнэ.



  Барилгын доод хэсгийн гурван давхар нь агаар сэлгэлт сайтай, байгалийн гэрэл, салхийг чөлөөтэй нэвтрүүлэх зохион байгуулалттай байх гэнэ. Цамхгийн үүдний хэсгээс авахуулаад явган замаар явж буй хүнд байгалийн үзэсгэлэнт газраар зугаалж буй мэт сэтгэгдэл төрүүлэхүйц орчныг бүрдүүлэхээр хичээжээ. Ялангуяа шалнаас тааз хүрсэн шилэн хана зэргийг уялдуулсан интерьер засал нь байгалийн гэрэлтүүлгийг нэмэгдүүлж, идэвхтэй эрүүл уур амьсгалыг бүрдүүлэхэд ихээхэн нөлөөлнө гэжээ.



  Дэлхий нийтийн барилгын хөгжилд хувь нэмэр оруулахуйц энэхүү цамхгийн консепт нь хотын орчинд өнгө үзэмж нэмээд зогсохгүй ногоон барилгыг хөгжүүлэх гэж буй олон олон архитектор, инженерүүдэд үлгэр дуурайл болно хэмээн гүйцэтгэгчид нь үзэж байна.