Ц.Тамир: Дизайны уг суурь нь гар зураг юм

Ц.Тамир: Дизайны уг суурь нь гар зураг юм
 
       Монгол улсад сүүлийн жилүүдэд интерьер, экстерьерийн салбар эрчимтэй хөгжих болсон бөгөөд энэ салбарт цойлон гарч ирж буй компани бол “TomThink” юм. Хэрэв манай улсын хаа нэгтээ шинэлэг өнгө төрх бүхий хараа булаам, бусдыг татсан загвар, орчин бүрдсэн байвал тэр “TomThink”-ийнх гээд хэлчихвэл хэтрүүлсэн болохгүй биз ээ.

Нэрээсээ авахуулаад гаргасан бүтээл нь өвөрмөц тэдний “гал тогоогоор” зочилж, тус компанийн үүсгэн байгуулагч Ц.Тамиртай хийсэн ярилцлагаа хүргэе.
 
-Манай уншигчдад өөрийгөө болон “TomThink” ХХК-ийнхаа тухай танилцуулна уу?
-Дүрслэх урлагийн дээд сургуулийн чимэглэх урлаг, уран зургийн ангийг зураач мэргэжлээр төгссөн. Гэвч үндсэн мэргэжлээрээ ажиллаагүй, тухайн үед сургалтын төлбөрөө төлөх шаардлагын үүднээс хоёрдугаар курсээсээ эхлэн хичээлийнхээ хажуугаар интерьер, дизайны компаниудын анхдагчдын нэг болох “House dezign” компанид ажиллаж, энэ салбарт хөл тавьсан байдаг. Үүнээс хойш 12 жил энэ компанидаа ажиллаж, тус компанийн захирал Д.Эрдэнэбилэгийн шавь хэмээн явах болсон. Энэ хугацаанд Чингис хааны морьт хөшөө, Их майдар, Морин хуурын цогцолбор гээд томоохон төслүүдэд гар бие оролцсон.
“TomThink” ХХК-иа 2015 онд зургаан хүний бүрэлдэхүүнтэйгээр байгуулснаасаа хойш  барилгын зураг төсөл, брэндинг, график дизайн, вэб хөгжүүлэлт, засал чимэглэл гэх зэрэг барилгын дизайнтай холбогдолтой бүхий л чиглэлээр үйл ажиллагаагаа явуулж байна.
 
-Өдөр тутмын ажил үүргийн тухайд?
-Ажилдаа өглөө ирээд эхлээд дизайнеруудынхаа хийж байгаа ажлыг шалгадаг. Ер нь би компанийн маркетингтай зууралдаад байдаггүй, манай гүйцэтгэх захирал зохицуулчихдаг учраас өдөржингөө л  уран бүтээлдээ бүх анхаарлаа хандуулдаг.
 
-Одоогоор ямар бүтээл дээр төвлөрч ажиллаж байна вэ?
-Үндэсний соёл амралтын хүрээлэнгийн үүдний хэсгийн гадна тал (фасад)-ыг шинэчилж байна.

-Компанийн нэр таны санаа байсан уу? Маш гоё утгатай юм
-Тийм. Монгол, англи хэлний аль алинийг нь л багтаасан нэр өгмөөр байсан. Тэгээд л томоор сэтгэж, томыг бүтээх утга агуулга бүхий “TomThink” нэрийг өгсөн.

 
-Танай компанийн бусдаас ялгарах онцлог нь юу вэ? Дизайны ямар чиглэлийг барьж ажилладаг вэ?
-Интерьер, дизайны чиглэлээр үйл ажиллагаа явуулдаг маш олон компани бий. Эдгээр нь бүгд өөр өөрсдийн гэсэн арга барилтай. Тэр арга барилаас нь шалтгаалж, захиалагч захиалгаа өгдөг. Хэрэв та оффис засах гэж бус бол аль компани нь энэ чиглэлээр илүү их мэргэшсэн бэ гэдгийг маш сайн судална шүү дээ. Энэ урсгал төрлөөрөө ялгардаг. Манай компанийн хувьд үндэсний гэсэн агуулгыг оруулж өгөхийг хичээдэг. Бусад зургийн компаниудыг харж байхад монгол дүр төрх оруулж байна гээд унь, тооно, хана, хээ хуар гээд л хэт туйлшруулж, хэт нялсан байдлаар шийдэж байна. Ийм чиглэлийг өвөрмонголчууд аль хэдийн гэр шиг том байшин хүртэл хийж, жинхэнэ утгаар нь хөгжүүлчихсэн шүү дээ. Харин бид арай өөр өнцгөөс сэтгэж, үндэсний хээ, ёс заншлаас сэдэвлэж загвартаа шигтгээ болгон шингээхийг зорьдог. Интерьер гэдэг аль хэдийн өндөр хөгжсөн салбарт энэ л бидний бусад улсаас ялгарах онцлог юм.
 
-Танайх дан эмэгтэй дизайнеруудтай юм байна? Эмэгтэй дизайнерийн чадвар илүү байдаг юм уу?
-Санаандгүй л  эмэгтэй дизайнеруудтай болчихсон. /инээв/ Эрчүүдийг бодвол эмэгтэйчүүд илүү нямбай, ажилдаа хариуцлагатай ханддаг.
 
-Та бүхэн байгуулагдсан цагаасаа хойш энэ хоёр жилийн хугацаанд хичнээн төсөл дээр ажилласан бэ?
-Ойролцоогоор жижиг, том нийлсэн 60 гаруй төсөл бий.
 
-Олны мэдэх ямар төслүүдийг хийж гүйцэтгэв?
-Нисэх онгоцны шинэ буудлын VIP хэсгүүдийн зураг төсөл, МУИС-ийн шинэ номын сангийн интерьер, “Pro on” барилгын нүүр талын  загвар болон интерьер зэргийг нэрлэж болно.
 
-Байгуулагдсанаасаа хойш хичнээн төгрөгийн борлуулалт хийсэн бэ?
-Тэрийг сайн хэлж мэдэхгүй байна. Ямартай ч жилийн орлого ойролцоогоор 200-300 орчим сая төгрөг байдаг.
 
-Таны баримталдаг зарчим?
-Зүрхнээс гарсан зүйл л зүрхэнд хүрдэг. Нэг сэтгэлийн ард арван сэтгэл, арван  хүний ард зуу... гээд л үргэлжилдэг л байхгүй юу. Тийм учраас хийж байгаа ажил бүртээ сэтгэлээсээ хандаж, бүрэн гүйцэд гүйцэтгэлтэй хийхийг хичээдэг. Ер нь манай компани өөрсдийгөө сурталчлаад байдаггүй. Хийсэн ажил дээрээс маань үндэслэж иргэд өөрсдөө аман сурталчилгаа хийгээд л дараа дараагийн ажил ороод ирдэг.
 
-Одоо уран зургаа зурдаг уу? Өөр сонирхол хобби бий юу?
-Оюутан цагаасаа хойш, саяхнаас л эргэн зурж эхэлж байна даа. Мөн баримал хийж байгаа. Харилцагчдадаа дурсгал болгох үүднээс зурсан зургаа эсвэл баримлаа бэлэглэх бодолтой явна.
 
-Сүүлийн жилүүдэд энэ салбарт нэлээд олон өрсөлдөгч хүч төрөн гарч ирж байгаа. Залуусын чадвар, чансаа, өрсөлдөөний тухайд?
-Үнэхээр их өрсөлдөөнтэй шүү. Бид нар нэг нэгнийхээ үйл ажиллагаа, арга барил, чиглэл, бүтээлийг сайн мэднэ. Тэр бүү хэл бие биенийхээ бүтээлд үнэлэлт, дүгнэлт өгч, харилцаатай байдаг. Харин энэ чиглэлийн боловсон хүчин олноор төрөн гарч ирж байгаа нь сайшаалтай ч манай компанид хандаж ирж байгаа хүмүүсийг ажиглахад арван хүүхдийн нэг нь л бусдаасаа дээр чадвартай байх жишээтэй. Чадвар муутай  төгсөж байгаа санагддаг. Энэ нь хүндээ байна уу, сурч байгаа сургуульдаа байна уу гэдгийг хэлж мэдэхгүй юм.
       Багш маань “Эхлээд таталбар зураг сайн зурах нь хар зургийг сайжруулна, хар зураг сайжирвал өнгөт зураг сайжирна. Өнгөт зураг сайжрахад зохиомж чинь сайжирна” гэдэг байсан юм. Зохиомж гэдэг бол  дизайны “алтан шугам”. Зохиомжийг л зөв төсөөлж чадвал дизайн үүснэ. Тэгэхээр дизайнын уг суурь нь зураг зурах явдал юм. Дизайнер хүн өөрөө хөгжихийн тулд ёстой хаа сайгүй л зураад явж байх ёстой. Гэвч манай барилгын интерьер, дизайнерийн сургуульд эхний ганцхан жил л зураад өнгөрөх байдлаар зохицуулагддаг. Угтаа төгсөн төгстлөө зургийг гараар дөрөв, таван жил зуруулаад л байх ёстой.

Дүрслэх урлагийн сургуульд өдөртөө 200 таталбар, арван зохиомж хийлгэдэг, жилийн төгсгөлд 5-6 мянган таталбартай төгсдөг. Энэ нь хүний бугалгыг чөлөөтэй, уян хатан хөдөлгөж сургаж буй хэрэг. Бугалга хэдий сайн хөдөлнө, зохиолж төдий чинээ “задарч”, харах өнцөг, өнгөний мэдрэмж тэлдэг. Ийм учраас л надад интерьер дизайнд ороход дөхүү, хялбар байсан.
 
-2018 оны интерьерийн болон түүнийг дагасан тавилгын чиг хандлага ямар байх бол?
-Манай улсад 1990-ээд оны үед байрандаа бүрэн засвар хийгээд л болчихно гэдэг ойлголттой байсан бол 2000 оноос хойш сонгодог, 2010-2016 оны үед модерн хандлагатай болж ирсэн. Харин энэ жилээс эхлэн 2020 оныг хүртэл дэлхийн загварын чиг хандлагын дагуу минималист  чиглэл зонхилох хандлагатай байна. Гэхдээ цэвэр минималист урсгал нь хүн амьдрахын эцэсгүй, хар эсвэл цагаан өнгөний сонголттой, хов хоосон байдаг учраас Монголд энэ чиглэлтэй дөхүүлж л загвар гаргаж байгаа.
Дэлхийд сүүлийн 50, 100 жил япончууд л интерьер загварыг утгаар нь хөгжүүлж байна. Учир нь манай дэлхий улам л жижиг, авсаархан, зөвхөн хэрэглээ шаарддаг болсон. Өмнөх зуун жил тансаг, нүсэр, том, хийж боломгүй зүйлийг хийж байсан бол энэ эринд авсаархан, минималист болж байгаа. Япончууд үүнийг бүтээхдээ  хамгийн зөв шийдлээр, загварлаг хийдэг.
 
-Орон сууцанд интерьер дизайнаа хийлгэхээр мэргэжлийн компанид хандаж байгаа хувь хүн олон байна уу?
-Харьцангуй олон болсон. Залуус байраа урьдчилж захиалахдаа саарлаар нь, дотор засалгүйгээр худалдан аваад зургаа зуруулдаг. Интерьерийн  зураг нь мөнгө зарж, зураг зуруулж буй хэрэг бус,  тухайн орон сууцныхаа үнийн дүнг хөнгөлж, илүүдэл зардал гаргахгүй, дурын загварыг хөрөнгөндөө тааруулж бүтээж байгаа явдал юм.
 
-Барилгын компаниуд бүрэн гүйцэтгэлтэй байр зарах сонирхолтой байдаг шиг санагддаг. Дотор засал нь иргэдэд таалагдах, тавилга, хэрэгсэлтэй нь зохицох эсэх нь хүндрэлтэй шүү дээ.
-Компаниуд яг энэ асуудлыг шийдэх боломжтой. Захиалагчид хэт эрээн обой, плита, таазны хийц зэргийг голж шилдэг. Харин ингэж шүүмжлүүлэхгүй, сэтгэлд нь нийцүүлэх арга нь зүгээр л энгийн, цулгуй, обой, цэвэрхэн цагаан тааз юм. Энэ нь бүх төрлийн тавилгатай нийцэх, эргээд оршин суугч дээрээс нь нэмж өөрчлөх, засвар хийхэд хялбар. Барилгын компаниуд дотроо иньерьер дизайны албатай байдаг. Гэхдээ дизайны компани, дизайны алба гэдэг тэнгэр газар шиг ялгаатай.
 
-Монголд зураг төслийнхөө дагуу гүйцэтгэл хийгдэж чадаж байна уу?
-Үйлдвэрлэгч орон биш учраас гүйцэтгэл ихдээ л 80 хувьтай хийгддэг.
 
-Гүйцэтгэл хийхэд та бүхэн давхар хянаж ажилладаг уу?
-Тэгэлгүй яахав. Ямар материал, ямар эд хэрэгсэл, өнгө байхыг хүртэл дизайнераараа батлуулж, засалд оролцоод явдаг.
 
-Танай компанийн хэтийн зорилт?
-“TomThink” олон чиглэлд хүч үзэхээр зорьж байгаа. Эхний ээлжид Монголд дутмаг байдаг тавилга, материал нийлүүлэлт, хавтангийн бэлэн бэлдцийн үйлдвэртэй болох зорилттой байна. Tawilga.com гээд домен манайд бүртгэлтэй байдаг. Энэ сайтыг хөгжүүлж, дизайнерууд эндээс бэлэн моделио авч ажлаа хийхэд дөхүү болгох зорилготой.
Одоогийн нөхцөлд зураг хийхдээ ямар ч хамаагүй буйдан, тавилга, чимэглэлийг энд тэндээс аваад тавьчихдаг. Дараа нь гүйцэтгэл хийх болоход нөгөө ашигласан тавилга, хэрэгсэл нь олдохгүй, орлуулдаг шүү дээ.
 
-Баярлалаа. Амжилт хүсье.





TomThink уран бүтээлээс..








 
Эх сурвалж: Барилга.МН сэтгүүл

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.