Нарны зайн хавтанг авто замд ашиглаад удаагүй байгаа шинэхэн туршлагыг Хятад улсад амжилттай эхлүүлжээ. Тус улсын Шандонг мужийн нийслэл Жинан хотод “Qilu” зам тээвэр хөгжлийн компани ийнхүү нэг километр урттай авто замд нарны эрчим хүчний хавтан суурилуулж, тэрхүү туршилтыг амжилттай гүйцэтгэж чадсан байна.

  Уг авто зам нь дээгүүрээ бетон, доод хэсэгтээ тусгаарлагч материал, дунд хэсэгтээ нарны зайн хавтан гэгчлэн гурван давхаргаас бүрджээ. Нарны хавтан бүхий уг зам нь яаралтай тусламжийн машинд зориулсан нэг шугам, хоёр урсгал гээд нийт 5,875 м.кв талбайг эзэлсэн байна. Эдгээр хавтангаар жил тутам нэг сая цаг/кВт цэвэр эрчим хүчийг үйлдвэрлэх боломжтой бөгөөд энэ нь 800 айл өрхийн өдөр тутмын хэрэгцээт цахилгааныг хангах хүчин чадалтай аж. Төслийн дизайнер Жан Хонгчаогийн мэдэгдсэнээр уг зам ердийн асфальтан замыг бодвол 10 дахин их нягтралтай, бат бөх гэнэ.



  “Qilu” зам тээвэр хөгжлийн компанийн Сю Чунфу “Энэхүү төсөл нь нарны эрчим хүч үйлдвэрлэх орон зайг хэмнээд зогсохгүй түүнийг дамжуулах талбайг ч богиносгох давуу талтай” хэмээн Сынхуа агентлагт өгсөн ярилцлагадаа онцолжээ.

  Түүнчлэн нарны зайн хавтангаас үүсгэн авсан эрчим хүчээр гудамжны гэрэлтүүлэг, цас хайлуулах систем, ажиглалтын камер, дохионы самбар, дааман хаалга зэргийн цахилгааныг шийдэх юм байна. Цаашлаад цэвэр эрчим хүчээр цахилгаан тээврийн хэрэгслүүдийг цахилгаанаар хангахаар төлөвлөжээ.

  Ноён Сю төслийнхөө зардлын нууцыг задлаагүй ч, бусад улс орнуудад хэрэгжүүлсэн ижил төрлийн төслөөс тавин хувийн хэмнэлттэйгээр хийж чадсанаа хэлээд “Цаашид Хятадад нарны эрчим хүчийг улам илүү хөгжүүлж чадвал өртгийг дахин бууруулах боломжтой” гэжээ. Харин Жан Хонгчаогийн хэлснээр нарны хавтан замын м.кв талбайн өртөг 458 ам.доллар буюу 3,000 юань болсон бөгөөд цаашид төслийг өргөжүүлэх бүрэн боломж байгаа аж.