Соёлч өрхөө шалгаруулжээ

Соёлч өрхөө шалгаруулжээ
        Сэлэнгэ аймгийн Орхонтуул сум "Соёлч өрх, орц" шалгаруулан, хуанлийн хуудасны сүүлчийн өдөр дүгнэн шалгаруулж байхаар сумын ИТХ-ын тогтоолоор батлуулсан аж.

Хамтын хүчээр амьдрах орчин нөхцөлөө сайжруулсан анхдагч ажлын ялагчаар Баянцогт 2-р багийн иргэн Г.Ууганбаяр, Б.Орхонтуяа нарын гэр бүл шалгарч “Соёлч өрх” гэсэн эрхэм шагналын эзэд болжээ. Сумандаа анх удаа зохион явуулж байгаа энэхүү ажил цаашид уламжлагдан жил бүр явагдах гэнэ. Энэхүү “Соёлч өрх, орц”-ыг гэр хорооллын өрх, хөдөөгийн өрх, орон сууцны орц гэсэн гурван төрлөөр шалгаруулахаар журамд тусгажээ. Гэр хорооллын хувьд нэлээд олон үзүүлэлтээр шалгаруулсан байна. Тодруулбал өөрийн хашааны 20 хувиас доошгүй хувьд ногоон орчин бүрдүүлэх, хашаандаа гэрэлтүүлэг, хаягжилт, шуудангийн хайрцаг хийсэн байх, мөн эрүүл ахуйн ил нойлын стандарт хангах, муу усны нүхтэй байх, түүнийгээ сард нэг удаа ариутгаж хэвшсэн байх ажээ. Түүнчлэн хашааны ойр орчим хог хаягдалгүй, цэвэр цэмцгэр орчин бүрдүүлэхээс гадна хашаагаа жигд /оохордож/ өнгө үзэмжтэй болгосон байх гэнэ. Мөн гэрийн тэжээвэр амьтан /нохой, муур/-аа гэрчилгээжүүлж, уяж малладаг байхаас гадна мал эмнэлгийн үйлчилгээнд хамруулан ИТХ-аар батлуулсан хураамжийг төлсөн байх ёстой ажээ. Тухайн өрх сумын ЗДТГ болон бусад байгууллагуудаас зохион байгуулсан олон нийтийн үйл ажиллагаанд идэвхтэй оролцохын зэрэгцээ мал сүргээ өвчин эмгэггүй байлгах зэрэг өндөр шалгуур үзүүлэлтийг давсан өрх энэхүү шагналын эзэд болох юм байна.







Эх сурвалж: МОНЦАМЭ

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.