Бид цаг ямагт барилгачидтайгаа хамт байна

Бид цаг ямагт барилгачидтайгаа хамт байна
         Монголын сайхан орны минь хөгжил дэвшил, мандал бадралын эх сурвалж болсон барилга, бүтээн байгуулалтын ажилд сэтгэл оюун, хөдөлмөр зүтгэлээ зориулж яваа бахархам гавьяатай үе үеийн барилгачид, “Барилга.МН” сэтгүүл, сайтын хүндэт уншигч, хэрэглэгч, хамтран ажилладаг эрхэм түншүүддээ болон “Барилга Экспо”, “Барилга, Орон сууц” үзэсгэлэнгийн оролцогч та бүхэндээ хэдхэн хоногийн дараа шилжин ирэх 2018 оны Шинэ жилийн баярын элгэмсэг дотно мэндийг өргөн дэвшүүлж байна.
 
Үүсэн байгуулагдсанаасаа хойш арван жилийн турш зураг төсөл, материал үйлдвэрлэл, барилга угсралт, хот байгуулалт, интерьер дизайн, сургалт судалгаа, үл хөдлөх хөрөнгийн ажил эрхэлдэг аж ахуйн нэгж байгууллагууд, өргөн олон уншигчид, идэвхтэн бичигчидтэйгээ ямагт хамт байж, тэднийхээ хүсэл сонирхол, хүндрэл бэрхшээл, ололт амжилт, жаргал зовлонг хуваалцаж, барилгачид төр засгийг холбосон гүүр, тэдний санаа бодлын индэр, мэргэжлийн “гал тогоо”  байхыг цаг ямагт хичээж ирсэндээ бид урамтай байдаг юм.
 
Уламжлал ёсоор барилга угсралтын ажил, хот суурины төлөвлөлт, барилгын материал үйлдвэрлэл, зураг төслийн боловсруулалтад нэвтэрч байгаа орчин үеийн шинэ техник, технологи, ноу хауг барилгын салбарынхан, хэрэглэгч олон түмэндээ танилцуулах зорилготой хавар, намрын ээлжит үзэсгэлэн-яармагийг аль болох өргөн хэмжээнд, олон оролцогчтойгоор зохион байгуулах гэсэн манай хамт олны хөдөлмөрийн үр шимийг цөөнгүй аж ахуйн нэгж, иргэн хүртсэн гэдэгт итгэлтэй байна.
 
“Бүтээн байгуулагчдаа дэмжье” уриатай “Барилга. МН” сэтгүүл, сайтын хамт олон  ирж буй шинэ ондоо төрийн болон төрийн бус байгууллагууд, бизнес эрхлэгчидтэйгээ ямагт холбоотой байж, тэднийхээ дуу хоолой байх үүргээ улам эрчимтэй, улам чамбай биелүүлэхийн төлөө зүтгэн ажиллана.
 
Мөн нийгмийн өмнө хүлээсэн соён гэгээрүүлэх, сэнхрүүлэн дагуулах үүргийнхээ хүрээнд нийгмийн хариуцлагатай хамт олон байж,  барилга, хот байгуулалтын салбарт хоцронгуй яваа “ногоон” бүтээн байгуулалтыг өргөжүүлэхийн төлөө идэвхийлэн ажиллах болно.
 
Эрхэм хүндэт барилгачид, бүтээн байгуулагч та бүхэн минь ирж байгаа ондоо эрүүл энх, ололт амжилт, аз жаргалаар дүүрэн байх болтугай.
 
                                   “БАРИЛГА.MН” ХХК-ИЙН ХАМТ ОЛОН

Холбоотой мэдээ