Канад технологийн орон сууц - Бидний туршлага, танд өгөх зөвлөгөө
Сүүлийн үед иргэд хот суурины төвөөс төдийлөн их холгүй боловч байгалийн үзэсгэлэн бүрдмэл, очих, буцах зам харгуй сайтай газарт, хоног, сараар, хүсвэл жилийн аль ч улиралд аж төрөх боломжтой, багашаархан талбайтай орон сууцыг хямд төсөр зардлаар барихыг илүүд үзэх болов. Тэгэхдээ эдгээр нөхцөлөөс гадна хувийн орон сууц барих газарт цахилгааны шугам сүлжээ хүрсэн, иргэд орон сууцныхаа халуун, хүйтэн ус хангамж, халаалт, бохир ус зайлуулах асуудлаа авсаархнаар шийдчих боломжтой бол илүү сайн. Ийм орон сууцны ашиглалтын зардал ч харьцангуй бага байдаг.
Чухамхүү ийм хүсэл сонирхолтой иргэдэд зориулан өөрийн компанийн туршлагадаа тулгуурлан канад технологиор 40-60 ам метр талбайтай амины орон сууцны загвараар жишээ болгож дараах зөвлөмжийг хүргэж байна.
- Байршил. Амины орон сууцны байршлаас тухайн барилгын суурь зоорийн хийц бүтээц, үнэ өртөг ихээхэн хамаарна. Манай компани Ар Гүнтэд, 40-60 ам метр талбайтай орон сууцнууд барихдаа засмал замтайгаа ойрхон, дэд бүтэц нь шийдэгдсэн байршил сонгосон. Иргэд байгалийн үзэмж сайтай, утаа багатай, хотод ойрхон гэж үзээд нийслэлээс хойд чиглэл рүү газар сонгох нь цөөнгүй. Гэвчиг энэ хавийн нутаг дэвсгэрийн хөрсний шинж чанар хотынхоос ялгаатай, ихэвчлэн, овойлт, суулт үзүүлдэг, уур амьсгал нь сэрүүн тул суурийг ямар материалаар, яаж хийх вэ, хэрхэн дулаан алдалт багатай барилга барих вэ гэдэгт онцгой анхаарах учиртай. Буурь хөрснийхөө шинж чанарт нь нийцсэн суурь хийж чадвал барилгад эвдрэл гэмтэл үүсэхгүй, удаан жил засвар хийлгүй ашиглах боломжтой, чанар сайтай болно.
- Суурь. Ар Гүнтэд хөрс нь мөнх цэвдэгтэй. Энэ хөрсөн дээр барих канад технологийн байшингийн шалыг нь ихэвчлэн газрын гадаргаас хөндий хийвэл илүү үр дүнтэй байдаг. Учир нь мөнх цэвдгийг гэсгээхгүйн тулд нэвт салхижуулснаар суурийн доорх хөрс гэсч, хөлдөх үзэгдэл багасна. Ингэснээр барилгын сууринд овойлт, суулт, үүсэхгүй, бусад хийц бүтээцэд ан цав, хагарал гарахгүй. Цэвдэгтэй хөрсөнд гадсан суурь илүү тохиромжтой байдаг. Хөрсийг хоёр метр гүн өрөмдөж, урьдчилан бэлтгэсэн төмөр бетонон гадсан сууриа байршуулж, түүн дээр хөнгөн материал бүхий канад технологийн сууцыг барьдаг .
- Төлөвлөлт. Бидний барьсан амины сууцны зураг төсөлд тусгаснаар 40-60 ам метр талбайд зочны өрөө, гал тогооны өрөө, унтлагын өрөө, ариун цэврийн өрөөг төлөвлөсөн байдаг. Өрөөнүүд нь нэг их том талбайтай биш ч, айл өрхийн хэрэгцээг хангахуйц боломжийн орон зайтай. Интерьерийн шийдэлд цагаан, цайвар өнгө түлхүү тусгасан, мөн таазны өндөр нь гурван метр учир байшингийн дотор талыг саруулхан, өнгөлөг харагдуулдаг.
Ер нь амины орон сууцыг төлөвлөхдөө хүрээлэн буй орчин, байгаль цаг уурт нь тохируулан, тухайн байршлынхаа давуу талуудыг тодотгосон зураг төсөл, амины орон сууц барих шаардлагатай. Тэгвэл оршин суугчдад илүү тав тухтай, стресс багатай орчныг бүрдүүлж өгч чаддаг. Тэрхүү төлөвлөлтийг тодотгохын тулд энэ загварт нэмэлтээр террас төлөвлөсөн. Мөн монголчууд байгаль эхээ шүтсэн нүүдэлчин уламжлалтай ард түмэн учраас аль болох нар сайн тусдаг тал руугаа цонхнуудаа төлөвлөж өгвөл зүгээр.
- Барилгын материал. Канад технологи нь өөрийн гэсэн онцлогтой модон арагт бүтээц юм. Ийм сууцны ханыг эрдэс хөвөнгөөр дулаалж, гадна талаас нь нэмэлт хөөсөн полистиролоор нэмэлт дулаалгыг хийсэн. Ар Гүнт нь хотын бүсийг бодвол 2-3 градусаар сэрүүн байдаг тул гурван давхар вакуум цонх суурилуулсан. Цонх нь том хэдий ч олон давхар учир дулаан алдалт багатай. Зуслангийн бүсэд байрлаж байгаа учир хүрээлэн буй орчинд нь нийцүүлж байгалийн гаралтай мод, чулуун материалыг түлхүү ашигласан.
- Цэвэр, бохир усны шийдэл. Дөрвөн айл дундаа нэг бохирын цооногтой байхаар шийдсэн. Энэ нь арван жилд нэг удаа сорж, цэвэрлэгээ хийдэг байгальд ээлтэй, бохирыг 98 хувь цэвэршүүлдэг септик юм. Газар зүйн онцлог, барилгын хийц загвараас хамаараад үнэ ханш нь ялгаатай. Бохирын цооногийн дэвшилтэт технологиуд төрөл бүрээрээ нэвтэрч байна. Гэхдээ манай орны цаг уурын эрс тэс нөхцөлд тэдгээр нь бүрэн зохицдоггүйгээс хөлдөх, эвдрэх, эсвэл хэт өндөр үнэтэй гээд олон асуудал тулгардаг. Харин монгол инженерүүдийн шийдлээр бүтээсэн бохирын цооногийг сонгон хэрэглэж байгаа.
- Төсөв өртөг. Хүмүүсийн нийтлэг гаргадаг алдааг анхааруулахад, таны байшин барих газрын байршил, онцлогоос хамаараад төлөвлөлт, суурийн ажил, материал, барилгын хийц зэргийн зардал нь ялгаатай гардаг. Тиймээс байшингийн төсөв өртгийг хэрэглэгч бүрт нэг ижил хэлж өгөх боломжгүй байдаг. Гэхдээ бидний барьсан сууцнуудын тухайд нэг ам метр талбайн үнэ 1,500,000 төгрөг орчим болсон. Үүнд цахилгаан, дулаан, авто зам, бохирын цооног, гүний худаг гээд бүхий л дэд бүтцээс гадна орчны тохижилтын зардал багтсан. Эрчим хүчнээс бусдыг нь бие даасан эх үүсвэрээс шийдэж өгсөн.
- Цахилгааны тоног төхөөрөмж. Хүмүүс ихэвчлэн Орос, Хятадын цахилгааны хэрэгсэл, кабелийг хэрэглэж байна. Чанартайг нь хэрэглэх гэж байна гээд өндөр үнэтэй кабель төхөөрөмж авах шаардлагагүй. Хэрэгцээндээ тохирсон материалыг сонгох нь чухал.
- Галын аюулгүй байдал. Канад технологийн сууц нь модон хийцтэй тул галд шатамтгай гэж эндүүрэх нь бий. Энэ төрлийн байшинг технологийнх нь дагуу барьж, дулаалга болон цахилгааны төхөөрөмж, материалаа зөв сонгох нь чухал байдаг. Хэрэглээндээ нийцсэн хүчин чадал бүхий кабель утас, төхөөрөмжийг нарийн тооцсоны үндсэн дээр суурилуулах ёстой. Хүмүүсийн ам дамжсан яриа, сурталчилгаанаас ташаа мэдээлэл авч, буруу сонголт хийх нь аюултай. Жишээлбэл, бүдүүн утас тавих ёстой хэсэгт тооцоолсноос нарийн утас тавьж, өндөр хүчин чадалтай автомат суурилуулах нь буруу юм. Нарийн утас нь ачааллаа дийлэхгүй халахад нөгөө хүчин чадал сайтай автомат нь буухгүй тохиолдолд гал гарах нөхцөл бүрдэнэ шүү дээ. Тэгэхээр хүчин чадал, хэрэглээнд нь тохирсон кабель утсуудыг зураг төслөөс нь авахуулаад зөв тооцоолж, төлөвлөж өгөх ёстой.
Эцэст нь хэлэхэд та мөрөөдлийн байшингаа бариулах гэж байна гээд төлөвлөлтөө оновчгүй хийлгэх, төсөв тооцоогоо алдаатай гаргах зэргээс болоод цаг хугацаа алдаж, зардал их гаргах эрсдэлтэй юм. Ашиглалтын зардал багатай, тав тухтай сууцтай болохын тулд юун түрүүнд зураг төслөө маш сайн хийлгэх хэрэгтэй. Тиймээс мэргэжлийн хүнээс тусламж зөвлөгөө авч, насан туршдаа амьдрах байшингаа чанар сайтай, бат бөх бариулаарай. Танд амжилт хүсье.
“UPDATE CONSTRUCTION” ХХК
Монгол Улс, Улаанбаатар хот, Сүхбаатар дүүрэг, 7 дугаар хороо,
Байршил: “ODCON HOLDING” оффис, 102 тоот
Утас: 7010-6077, 9906-1414, 9595-7586
“UPDATE CONSTRUCTION” ХХК
Монгол Улс, Улаанбаатар хот, Сүхбаатар дүүрэг, 7 дугаар хороо,
Байршил: “ODCON HOLDING” оффис, 102 тоот
Утас: 7010-6077, 9906-1414, 9595-7586