Шинэ орон сууцны дундаж үнэ м.кв нь 2.17 сая төгрөг байна

Шинэ орон сууцны дундаж үнэ м.кв нь 2.17 сая төгрөг байна

       Шинэ орон сууцны дундаж үнэ 10 дугаар сарын байдлаар нэг м.кв нь хоёр сая 177 мянган төгрөг болж сарын өмнөхөөсөө 0.92 хувиар өссөн байна. Үүнийг жилийн өмнөхтэй харьцуулахад 6.8 хувиар өссөн үзүүлэлт аж. Нэг өрөө шинэ орон сууцны дундаж үнэ 51 сая төгрөг, хоёр өрөө байр 71 сая төгрөгийн үнэтэй байна. Харин 3-4 өрөө байрны үнэ 95-116 сая төгрөгийн хооронд хэлбэлзэж байна. Сүхбаатар дүүрэгт шинэ орон сууцны нэг м.кв-ийн дундаж үнэ хамгийн өндөр буюу 2 сая 900 мянган төгрөг байгаа бол Сонгинохайрхан дүүрэгт хамгийн бага буюу нэг сая 500 мянган төгрөгийн үнэтэй байна. Харин барилгын материалын хувьд бүтээгдэхүүний төрлөөсөө хамаараад харилцан адилгүй байгаа ч эрэлт ихтэй зарим материалын үнэ өссөн байна. Тухайлбал, импортын арматур, тэр дундаа Хятадын арматур нэг тонн нь энэ оны нэгдүгээр сард нэг сая 40 мянган төгрөг байсан бол 11 дүгээр сарын байдлаар нэг сая 780 мянгад хүрч дунджаар 44 хувиар өсжээ. Харин цементийн ханш жилийн дүнгээр 10 орчим хувиар өссөн талаар Барилга.мн мэдээлсэн. Одоогоор дотоодын цемент үйлдвэрлэгч дөрвөн компани зах зээлийн цементийн хэрэгцээг 100 хувь хангаж байна.

Дотоодлын цемент тонн тутамдаа 138-175 мянган төгрөгийн хооронд борлуулагдаж байгаа юм. Энэ онд цементийн хэрэгцээ 1.6 сая тоннд хүрсэн. Харин ирэх онд цементийн эрэлт 2.2 сая тонноос давна гэж монголын барилгын материал үйлдвэрлэгчдийн холбоо үзэж байна. Дотоодын үйлдвэрлэгчид одоогоор хүчин чадлынхаа 50 хувийг ашиглаж байгаа бөгөөд цаашид зах зээлийнхээ эрэлтээс шалтгаалан үйлдвэрлэлээ нэмэгдүүлнэ гэж мэдээлсэн. Үүнээс гадна "МАК групп" хийт бетоны үйлдвэрээ ашиглалтад оруулж, зах зээлд евро цемент болон евро блок нийлүүлж эхлээд байгаа юм. Нэг их наяд орчим төгрөгөөр хэмжигдэж байгаа барилгын материалын дотоодын зах зээлд одоогийн байдлаар 11 төрлийн 700 гаруй үйлдвэр үйл ажиллагаа явуулж байна.

Эх сурвалж: Барилга.мн

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.