Карибын тэнгисийн хар салхи, Мексикт болсон хүчтэй газар хөдлөлт гэхчлэн сүүлийн жилүүдэд тохиосон байгалийн гамшгууд барилгын чанарыг дээшлүүлэх шаардлагатайг сануулсаар байна.

  Британи дахь Колумбийн их сургуулийн судлаачид барилгын гадна засалд ашиглах ган мэт бат бөх, байгалийн гэнэтийн гамшгийг тэсвэрлэх чадвартайгаас гадна хүрээлэн буй орчинд ээлтэй, шүршиж хэрэглэх боломжтой бетоныг гарган авчээ. Үүнийг экологид ээлтэй уян хатан цементийн бүтэцтэй материал буюу товчилбол EDCC хэмээн нэрлэж байгаа бөгөөд ихэнх хувь нь дэгдэмхий үнснээс бүрддэг аж.

  Колумбийн их сургуулийн профессор Неми Бантиа, “Цементийн үйлдвэрлэл дэлхийн хүлэмжийн хийн ялгаруулалтын долоон хувийг эзэлж байна. Тиймээс цементийн 70 хувьд нь дэгдэмхий үнс ашигласнаар цементийн хэрэглээг бууруулах боломжтой. Нэг тонн цемент үйлдвэрлэхийн тулд ойролцоогоор нэг тонн нүүрстөрөгчийн хийг агаар мандалд ялгаруулдаг тул нэн яаралтай арга хэмжээ авах шаардлагатай” хэмээн ярьжээ.

  Дээрх судлаачдын туршин гаргаж буй уг бетон нь бат бэх чанараараа гантай дүйцэх аж. Энгийн бетоноос ашиглалтын хугацаа урт, мөн уян хатан шинж чанартай. Шинэ бүтээгдэхүүнийг туршихдаа судлаач EDCC бетоныг хананд 10 мм зузаантайгаар шүршжээ. Дараа нь 2011 онд Японы Тохокуд болсон газар хөдлөлттэй ижил буюу 9 баллын хүчтэй газар хөдлөлтөд тэсвэрлэх эсэхийг нь шалгаж үзсэн байна. “Үр дүн нь амжилттай шүү. Бид одоо ханыг нурааж сүйтгэхгүйгээр сэгсэрч, доргиулах боломжтой боллоо” хэмээн судлаачдын нэг Салман Солеймани-Даштаки хэлсэн аж.



  Судлаачдын хийсэн дүрс бичлэгээс харвал чичиргээний үйлчлэл үзүүлэхэд хүчитгээгүй ханын 65 хувь нь нурж сүйдэж байсан бол хүчитгэсэн ханыг доргилтоор шалгахад эвдэрч сүйдээгүйгээс гадна маш уян хатан чанартай гэдэг нь ажиглагджээ.

  EDCC бетоныг Колумби, Канадын зах зээл дээр худалдаалж эхэлсэн байна. Энэ нь хямд өртөгтэйгөөрөө хэдийнээ хэрэглэгчдийг татаж байгаа юм. Уг бетоноор Ванкувер дэх бага сургуулийн барилгын ханыг хүчитгэхээр төлөвлөсөн бөгөөд Энэтхэгийн хойд зүгийн газар хөдлөлтийн идэвхтэй бүсэд орших дунд сургуулийн шинэчлэлийн ажилд ашиглахаар болжээ.