Дэлхийн хамгийн өндөр үнэтэй барилга 5.2 тэрбум ам.доллараар зарагдлаа

Дэлхийн хамгийн өндөр үнэтэй барилга 5.2 тэрбум ам.доллараар зарагдлаа

  Хонг Конгийн хамгийн чинээлэг эрхэм Ли Ка-Шиний “CK Asset Holding” компани “The Center” цамхгаа 40.2 тэрбум хонг конг доллар буюу 5.2 тэрбум ам.доллараар худалдсан нь дээд амжилт тогтоож, хамгийн өндөр үнэтэй оффисийн барилгад тооцогдож байна. Энэ нь тус хотын үл хөдлөх хөрөнгийн зах зээл идэвхтэй, сайн байгаагийн илрэл гэж ажиглагчид дүгнэлээ.

  “CK Asset”-ийн орлого 14.5 тэрбум хонг конг долларт хүрнэ хэмээн тус компани өнгөрөгч Лхагва гаригт хөрөнгийн бирж дээр мэдэгдээд байсан юм. Тус цамхгийг Хятадын улсын өмчит “China Energy Reserve and Chemicals” группийн 55 хувийн эзэмшилтэй, Хонг Конгтой хамтарсан компани худалдан авсан аж.

  Өнгөрөгч 6 дугаар сарын байдлаар “CK Asset”-ийн эзэмшилд 1.6 сая ам дөрвөлжин талбай бүхий үл хөдлөх хөрөнгө байдгаас 80 орчим хувь нь Хонг Конгод байрладаг гэсэн дүнг гаргажээ. Тэгвэл бизнесийн төв дүүрэгт байрлах 73 давхар “The Center” цамхаг нь хотынхоо тав дахь өндөр барилга юм байна.

  “Knight Frank” судалгааны байгууллагын гаргасан дүнгээр Хонг Конгийн оффисийн өндөр барилгууд дэлхийн хамгийн өндөр түрээстэй үл хөдлөх хөрөнгүүдэд тооцогддог гэнэ. Тухайлбал, түрээсийн төлбөр нь Сингапурынхаас дөрөв дахин өндөр байдаг аж. Ийнхүү түрээсийн үнэ өсөхөд эх газрын Хятадаас ирсэн түрээслэгчид голлох нөлөөг үзүүлж байна хэмээн судалгааны байгууллагаас дүгнэжээ.

Холбоотой мэдээ