Ширээнээсээ салгамгүй үнэтэй зөвлөмжүүдийг “БАРИЛГА.МН”-ний шинэ дугаараас

Ширээнээсээ салгамгүй үнэтэй зөвлөмжүүдийг “БАРИЛГА.МН”-ний шинэ дугаараас

  Хүйтний улирал ирж, барилгын ид ажлын ачаалал буурсан ч “БАРИЛГА.МН” сэтгүүл та бүхэнд шинэ сарын шинэхэн дугаараа өргөн барьж байна. Эрхэм инженерүүддээ зориулан хүйтний үед бетоныг хэрхэн хөлдөөхгүйгээр ашиглаж, ямар нэмэлт орцоор баяжуулдаг тухай иж бүрэн зөвлөгөөг хүргэж буй энэ удаагийн дугаартаа зөвхөн зөвлөмж гэлтгүй, салбарынхаа тулгамдсан асуудлуудыг хөндөхийг хичээлээ.

  Сэтгүүлийн редакцаас барилгын салбарын ахмад зөвлөхүүд, инженерүүдээ оролцуулсан “Үгээ хэлье” уулзалтыг зохион байгуулсан юм. Тэдний шүүмжлэл зэмлэл, шинэ санал санаачилгын талаар “Харах өнцөг” булангаас уншаад нэг үзээрэй.



  Үндэсний тогтвортой үйлдвэрлэгч, базальт чулуун хөвөнгөөр барилгын дулаалгын материалыг дэвшилтэт технологиор үйлдвэрлэж, ирээдүйд Азийн зах зээлд Монголынхоо нэрийг гаргахаар зорьж буй “Монгол Базальт” компанийн захирал Л.Ариунболдыг урьсан Зочны булангаар саатаж, түүний сэтгэл сэргээсэн эрч хүч дүүрэн ярилцлагыг нь уншаарай.



  Түүнчлэн зураг төсөлд ч, угсралтын ажилд ч орхигдсоор байгаа барилга байгууламжийн агааржуулалт, салхивчийн асуудлаар, гагнуурын электродын талаар мэргэжилтнүүд юу өгүүлснийг “БАРИЛГА.МН” танд хүргэж байна.



  Мөн дотоодын үйлдвэрлэгчдийн хуурай хольцын шинж чанарыг судлан туршилт явуулсан оюутан ямар дүгнэлтэд хүрснийг “Туршилт, судалгаа” буланд нийтэллээ.



  Харин амины орон сууцтай болохоор төлөвлөж буй иргэддээ зориулан “Мөрөөдлийн байшингаа барихдаа дагаж мөрдөх 10 зөвлөгөө”, Канад технологийн сууц барих зөвлөмжүүдийг хүргэж байна.



  Гэхдээ барилгын материалаа хаанаас сонгох талаар “Барилгачин” группээс мэдээлэл аваарай. Тэдний энэ сарын онцлох бүтээгдэхүүнүүд, мөн шинэхэн нүүр царай нь болоод буй, өдгөө энэ салбарт бизнес эрхлэхээр хэдийнээ хөл тавьсан “Камертон” хамтлагийн дуучин Г.Мэнд-Амартай цөөн хором ярилцсаныг сэтгүүлээс хүлээн авна уу.



  Сар бүр тогтмол хүргэдэг Барилгын материалын үнэ ханш ба дүгнэлт, Ажил гүйцэтгэлийн үнэлгээг уламжлал ёсоор шинэчлэн гаргалаа. Мөн орон сууц авахаар төлөвлөж буй иргэдийнхээ цаг завыг хэмнэх зорилгоор гаргадаг Улаанбаатар хотод захиалга авч буй шинэ орон сууцнуудын үнэ ханш, байршил, холбоо барих хаяг зэргийг дүүрэг тус бүрээр ангилан харуулж байна.

  Тэдэнд зориулсан бас нэгэн хэрэгцээт мэдээлэл бол “Хуулийн булан”-д нийтлэгдсэн “Орон сууц худалдан авахдаа талбайн зөрүүний асуудалд анхааралтай хандах хэрэгтэй” зөвлөгөө юм. Харин нэгэнт жижиг талбайтай орон сууц авсан иргэддээ түүнийгээ хэрхэн тохижуулж, засах тухай сонирхолтой шийдлийг санал болгож "Интерьер" булангаа бэлтгэлээ.



  Барилгын материал үйлдвэрлэгч, импортлогчдодоо хамгийн хэрэгцээт мэдээллийг нь хүргэх үүднээс “Зам, барилгын материалын итгэмжлэгдсэн сорилтын лабораториудын жагсаалт” гарган, холбоо барих мэдээллийг нь орууллаа. Түүнчлэн 2017 онд нэмэлт өөрчлөлт оруулсан болон шинээр баталсан норм, нормативын баримт бичгүүдийг албан эх сурвалжаас авч, уншигч та бүхэндээ хүргэж байна.

   Мэдээж уншигчдынхаа чөлөөт цагийг үр дүнтэй болгох, танин мэдэхүйд нь дусал мэдээлэл ч атугай нэмэхээр дэлхий дахинд өрнөж буй шинэ технологийн мэдээ, “Амрах агшин”-ийн сонирхолтой бодлогыг тусгайлан бэлтгэлээ.

Холбоотой мэдээ