Газраа барьцаалан орон сууцтай болохоор 30-аад иргэд бүртгүүлжээ

Газраа барьцаалан орон сууцтай болохоор 30-аад иргэд бүртгүүлжээ
          Агаарын бохирдлыг бууруулах үндэсний чуулганы “Гэр хороодод үүсч буй агаарын бохирдол, түүнийг шийдвэрлэх арга зам” сэдэвт салбар хуралдаан өнөөдөр Төрийн ордонд боллоо. 


Нийслэлийн төсвийн хөрөнгөөр энэ жил зорилтот бүлгийн 3600 өрхөд сайжруулсан түлш бэлтгэж, сургууль, цэцэрлэг, эмнэлэгт 350 ширхэг дотоод агаарын чанарыг сайжруулах төхөөрөмж суурилуулах, нийтдээ 33 бие даасан болон уурын зуухтай аж ахуйн нэгж байгууллагуудыг төвлөрсөн дулааны шугам сүлжээнд холбох гэх мэт тодорхой ажлыг хийхээр төлөвлөжээ. Эдгээр ажил төлөвлөгөөний дагуу хийгдээд дуусч байгаа аж.

Агаарын бохирдлын 80 хувь нь гэр хорооллоос үүдэлтэй. Өнөөдөр болж буй салбар хуралдаанаар гэр хороололд үүсээд буй бохирдлыг хэрхэн, яаж бууруулах вэ гэсэн асуудлыг хөндлөө. Гэр хорооллын иргэдийг орон сууцжуулбал агаарын бохирдлоос сална. Тиймээс орон сууцны хангамжийг сайжруулахын тулд энэ жил Азийн хөгжлийн банктай хамтраад гэр хорооллын дахин төлөвлөлтийн ажлыг хурдацтай урагшлуулсан. Үүний дагуу гол тендерүүдийн ажил зарлагдаж, бүтээн байгуулалтын ажил нэлээн хийгдсэн.

УЛААНБААТАР ХОТОД ШИЛЖИЖ ИРСЭН ИРГЭДИЙН ТОО ГУРАВ ДАХИН БУУРЧЭЭ.

Мөн БНХАУ-ын хоёр тэрбум юанийн буцалтгүй тусламжаар гэр хорооллын дахин төлөвлөлтийн 74 байрлалд нийслэлийн болон улсын төсвийн хөрөнгөөр хийгдэх ёстой төвлөрсөн шугам сүлжээний ажлуудыг шийдвэрлэхээр болсон. Цахилгаан, дулааны шугам сүлжээний асуудлыг ингээд шийдчихвэл дахин төлөвлөлтийн компаниудын ажил маш томоор урагшлах юм. Мөн 1000 айлын орон сууцны ажлын шавыг тавьсан гэх мэтчилэнгийн ажлыг үргэлжлүүлж байна.

Түүнчлэн нийслэлээс Улаанбаатарт газрын сан үүсгэх зорилгоор иргэдэд газраа барьцаалан орон сууцныхаа урьдчилгааг төлөх боломж бүрдүүлсэн. Одоогийн байдлаар 30-аад иргэн энэхүү санд хамрагдсан байгаа. Гэр хорооллын өрхүүд хуримтлалгүй учраас ганц барьцаанд тавих зүйл нь газар байдаг. Харин газрыг банкууд барьцаанд авдаггүй. Үүнийг Улаанбаатар хот иргэдтэйгээ зөвшилцсөний үндсэнд гурвалсан гэрээ байгуулаад газрыг нь орон сууцны урьдчилгаа болгох ажлыг үр дүнтэй өрнүүлж байна. 

        Улаанбаатар хотод жилдээ 30 гаруй мянган хүн шилжин ирдэг байсан. Харин нийслэлийн Засаг даргын зүгээс захирамж гаргаад агаарын бохирдлыг бууруулах зорилтын хүрээнд шилжилт хөдөлгөөнийг түр хориглосон. Үүний үр дүнд зөвхөн удаан хугацаагаар эмчлүүлэх, эрүүл мэндийн шалтгаантай эсвэл нийслэлд яндангийн тоо нэмэхгүйгээр ипотекийн зээлд хамрагдсан гээд 7800 иргэн шилжиж ирсэн. Шилжиж ирсэн иргэдийн тоо ийнхүү 3 дахин буурсан нь тэр хэмжээгээр агаарын бохирдлын хэмжээ багассан гэж байлаа.

Эх сурвалж: НЗДТГ

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.