Том м.кв талбайтай орон сууцны борлуулалт 10 хувьд хүрчээ

Том м.кв талбайтай орон сууцны борлуулалт 10 хувьд хүрчээ

  Орон сууцны үнийн индексийг 2017 оны 9 дүгээр сарын байдлаар гаргасныг үл хөдлөх хөрөнгийн “Тэнхлэг зууч” ХХК-ийн зүгээс танилцууллаа. Монголбанкны захиалгаар сар бүр тогтмол хийдэг уг индексийг гаргахдаа шинэ, хуучин 4857 орон сууцны үнийн мэдээллийг хамруулан судалжээ.

  Энэ оны гуравдугаар улирлын байдлаар үнийн ерөнхий индекс нь 1.01 хувь, шинэ орон сууцных 1.16 хувь, хуучин орон сууц нь 0.91 хувийн үзүүлэлттэй гарчээ. Ерөнхий индекс нь суурь үзүүлэлтээсээ нэг хувийн ялгаатай буюу 2013 оны нэгдүгээр сарынхтай тэнцэхүйц хэмжээний үзүүлэлттэй байгаа юм.

  Шинэ орон сууцны үнийг суурь үнэтэй харьцуулахад 15.6 хувийн өсөлттэй, хуучин орон сууцны индекс нь суурь үнийн индекс буюу 2013 оны нэгдүгээр сарынхаас 8.8 хувийн үнийн өсөлттэй байна. Харин сүүлийн нэг жилийн хугацаанд орон сууцны үнийн хувьд төдийлөн өөрчлөлт гараагүй, хэлбэлзэл багатай байсан тухай “Тэнхлэг зууч” ХХК-ийн гүйцэтгэх захирал Д.Должинсүрэн мэдээлэлдээ онцолж байсан юм.



  Үнийн бага зэрэг хэлбэлзэл нь зах зээл дэх эрэлт, нийлүүлэлтэд нөлөөлөхүйц их биш учраас дорвитой өөрчлөлт ажиглагдаагүй аж. Одоогоор 33 мянга орчим орон сууц захиалга авч байгаагаас борлуулалтын явц нь 56 хувьтай буюу цаана нь борлуулагдаагүй 15 мянган байр бий. Тэдгээрээс ашиглалтад орсон мөртлөө борлуулагдаагүй зургаан мянга орчим айлын орон сууц байгаа аж. /Зураг-эх сурвалж "Тэнхлэг зууч" ХХК/





  Харин хуучин орон сууцны тухайд сард давтагдсан тоогоор мянгаас хоёр мянга орчим байр зах зээлд эргэлддэгээс 700 орчим нь зарагддаг гэсэн тоон дүн гарчээ.

  М.кв талбайн дундаж үнээр авч үзвэл, шинэ орон сууц 2,160,000 төгрөг, амины орон сууц 2,280,000 төгрөг, хуучин байр 1,760,000 төгрөгийн үнэтэй байна.



“Тэнхлэг зууч” ХХК-ийн гүйцэтгэх захирал Д.Должинсүрэн, Манайд тансаг зэрэглэлийн орон сууц хараахан байхгүй, өндөр зэрэглэлийн хэд хэдэн байр байдаг. Энэ чиглэлээр эрэлтийн судалгааг хийгээгүй, харин борлуулалтын дүнгээс харахад том талбайтай орон сууцнууд өмнөх жилүүдтэй харьцуулахад нэмэгдсэн. Өмнө нь 40 хүртэлх м.кв-тай байр, 60 доторх м.кв талбайтай байр нийт борлуулалтад өндөр дүнг эзэлж, 80 ба түүнээс дээш м.кв-тай байр ипотекийн зээлийн нөхцөлөөс шалтгаалан борлуулалт муутай байсан. Харин сүүлийн саруудад хийсэн ажиглалтаар нийт борлуулалтын 10 хувийг том м.кв-тай буюу өндөр зэрэглэлийн орон сууцнууд эзэлж байна.
Эх сурвалж: Барилга.МН

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.