Шилэн фасадны хэрэглээ ба давуу тал, онцлогууд

Шилэн фасадны хэрэглээ ба давуу тал, онцлогууд
“Топгласс” ХХК-ийн Ерөнхий инженер С.Баяр

  Өнөө цагийн барилгын шилэн фасадны систем нь анх зохион бүтээгдсэн зориулалтаасаа хэд дахин олон үүрэгтэй болжээ. Анх байгалийн гэрэлтүүлгийг чөлөөтэй нэвтрүүлэх, барилгын дотор интерьерийг гадаад орчноос хамгаалах зориулалтаар шилэн фасадыг бүтээж байжээ. Харин энэ систем нь ашиглагдах явцдаа эрчим хүчийг хуримтлуулж, дулааны урсгал, нарны ягаан туяаг хянах замаар оршин суугчдад тав тухыг авчрах үүрэгтэй болон хувирчээ. Үүнээс гадна шилэн фасад нь байгалийн гамшиг, хүний гараар үүсэх аюул хор хохирлын үед тэсвэртэй байхаар үйлдвэрлэгдэж, ашиглагдаж эхлээд байна. Тиймээс өнөө цагт шилэн фасадыг барилгын салбарт олон төрлийн зориулалтаар өргөн ашиглах болжээ.

  Барилгын гадна фасадны бусад материалуудтай харьцуулахад шилэн фасад нь олон давуу талтай. Барилгын захиалагч эзэд нь өөрсдийн сонирхол болон санхүүгийн боломжид нийцүүлэн олон төрлийн шилэн фасадаас сонголт хийх боломжтой. Шилэн фасадны ихэнх нь хөнгөн цагаан рамтай учир үүнийг олон янзын хэлбэрт оруулж, шинэлэг шийдэлтэй барилга барих боломжийг бий болгодог. Ингэснээр дэлхийн улс орнуудын томоохон хотуудад загварын өвөрмөц шийдэлтэй өндөр барилгууд сүндэрлэсээр байна. Энэ нь инженерингийн шийдэл талаасаа барилгад суурилуулахад ч хялбар бөгөөд өртөг бага байдаг.



  Орчин үеийн барилгын архитектур, дизайн, барилгын инженер, үйлдвэрлэгчид, төслийн эзэд хамтран хийсэн судалгаагаараа шилэн фасадны дараах давуу талуудыг нотлон харуулсан байдаг. Үүнд:
*       Механик шинж чанар өндөр буюу хөнгөн жин
*    Стандартуудын хамгийн өндөр шаардлагыг хангасан, галд тэсвэртэй байдал
*       Цаг агаарын нөхцөл, химийн бодист тэсвэртэй байдал
*       Бат бөх, тэгш, мөн хэлбэрт оруулах боломжтой
*       Дуу чимээ, дулаан тусгаарлалт сайтай
*       Зардалд хэмнэлттэй
*       Байгальд ээлтэй, хорт нөлөөгүй
*       Ашиглалтын хугацаа урттай



  Худалдан авагч, түрээслэгчид шилэн фасадаар хийгдсэн орчин үеийн өнгө үзэмж сайтай барилгыг ихээр сонирхох болсон нь энэ төрлийн барилгын арилжааны шинж чанарыг уламжлалт бетонон барилгатай харьцуулахад хэд дахин өндөр байгаатай холбоотой.



Энэ мэт шилэн фасад ашиглан барьсан барилгууд давуу тал ихтэй учир товч тайлбарлан бичлээ. Үүнд:

1. Орчин үеийн дизайнтай, гэрэл шууд нэвтрүүлнэ 
Хөнгөн жин, гадаад үзэмж, агаар болон байгалийн гэрлийг дотогш сайн нэвтрүүлдэг гэх зэрэг олон ач холбогдолтой. Мөн гэрэл гэгээтэй орчныг бүрдүүлж, барилгын өнгө үзэмжийг нэмдэг.

2. Эрчим хүчний хэмнэлттэй 
Барилгын дотор талд бүхэлд нь байгалийн гэрэл нэвтрүүлж, гэрэл гэгээтэй орчныг бий болгоно. Өдрийн туршид барилгын гэрлийг ашиглах шаардлагагүй учир дотоод гэрэлтүүлгийн хэрэгцээг бууруулж, эрчим хүчийг хэмнэнэ. Шилэн фасад нь эрчим хүч хэмнэх технологийн хөгжилд томоохон ахиц гаргаж хэд хэдэн давхар,  гэрэл ойлгох чадвар сайтай, нарны хэт ягаан туяаг бага тусгах чадвартай дулаан дамжуулалт багатай шил болон хөнгөн цагаан хүрээг үйлдвэрлэдэг болсон. Мөн шилэн фасадыг нарны гэрлийг өөртөө хуримтлуулан эрчим хүч үйлдвэрлэдэг эх үүсвэр болгон ашиглах технологийг хөгжингүй орнуудад хэрэглэж эхлээд байна.

3. UV буюу хэт ягаан туяа 
Шилэн фасад нь нарны хэт ягаан туяанаас хүнд учруулж болох хорыг 99 хувь бууруулах ач холбогдолтой. Шилэн фасад нь дулаан, нарны хэт ягаан туяаг шингээдэг бөгөөд барилгын доторх халаалтыг хэмнэж, халалтаас хамгаалсан дулаан тусгаарлагчтай байдаг.

4. Хөнгөн жин
Шилэн фасад нь дунджаар 50кг/м2 жинтэй байдаг бөгөөд энэ нь тоосгон хананы 1/12, бетон цутгамал хананы 1/7-тэй тэнцэхүйц жин юм. Ингэснээр өндөр барилгуудын хананы жинг багасгаж, зардлыг бууруулж улмаар илүү өндөр барилга барих давуу талыг бий болгодог.

5. Ус чийгийн хамгаалалттай
Шил нь бусад материалтай харьцуулшгүй өвөрмөц онцлог шинж чанартай. Угсралтын үеийн дулуун тусгаарлагч материал, даацын болон гадна силикон нь ч гэсэн чийгийн хамгаалалттай. Ингэснээр нягтрал нь гэмтээгүй тохиолдолд бороо, чийг барилгад нэвтрэх боломжгүй. Нягтралыг тодорхой хугацааны хуваариар хэвийн горимд байгаа эсэхийг нь шалгаж байх шаардлагатай. Мөн шилэн фасад бүхий барилгуудад зэврэлтээс хамгаалах материалуудыг ашигладаг. Нягтрал нь тухайн барилгын засвар үйлчилгээний зардлыг бууруулна.

6. Галд тэсвэртэй
Шилэн фасад нь уламжлалт фасадтай харьцуулахад галд тэсвэрлэх чадвар өндөр байдаг.

7. Хүссэн загварын барилгаа сүндэрлүүлэх боломжтой
Шилэн фасадыг чулуу эсвэл хөнгөн цагаан хавтангуудтай хослуулан барилгад ашиглах боломжтой. Ингэснээр та шил болон хөнгөн цагаан хавтан хосолсон, эсвэл дан шилэн фасадаар хүссэн загварын барилгаа барих боломжтой.

Шилэн фасадыг хоёр ангилан үздэг.
  1. Нийлүүлсэн буюу үйлдвэрийн аргаар угсарсан шилэн хана  
  Нийлүүлсэн шилэн фасад нь хөнгөн цагаан рамыг үйлдвэрт угсарч шиллэсэн том хэмжээтэй хүрээтэй шилэн хавтангуудаас бүрдэх бөгөөд эдгээрийг үйлдвэрээс барилгын талбай руу илгээдэг. Барилгын талбай дээр эдгээрийг өргөгчөөр өргөж төмөр бэхэлгээнд холбоно. Барилгын талбай дээр шиллээгүй учраас нийлүүлсэн системийг ашиглахын өөр нэг том давуу тал нь угсрах хурд юм. Салангид угсардаг системийг угсрах хугацааны 1/3-тэй тэнцэх хугацаанд л энэ төрлийн системийг угсардаг. Энэ нь барилгын талбайн ажлын өртөг, бүтээмжийг нэмэгдүүлж илүү хурдан гүйцэтгэл шаардлагатай өндөр барилгууд, хавтангийн оновчтой ашиглалт шаардлагатай нөхцөлд, үйлдвэрт урьдчилан нийлүүлсэн их хэмжээний хавтангууд хэрэгтэй үед илүү тохиромжтой.   
 
  1. Газар дээр нь угсрах салангид – угсрах систем.
  Хэрэв таны барилгын төсөл нийлүүлсэн системийн нөхцөлүүдтэй тохирохгүй бол салангид угсардаг системийг ашиглаж болно. Нам, дундаж өндөртэй барилгуудын ихэнх нь гадна фасадыг энэ системээр угсарсан байдаг. Урт хэмжээтэй хөнгөн цагаануудыг босоогоор нь давхар хооронд, босоо хэсгүүдийг бэхлэх зорилгоор зарим хэсгийг хэвтээ чиглэлд оруулна. Угсрах, шиллэх ажлын ихэнхийг барилгын талбайд гүйцэтгэнэ. Энэ төрлийн системийн нэг давуу тал нь шилэн фасад бага хэмжээгээр шаардсан, янз бүрийн нөхцөл байдлуудад эдийн засгийн хувьд хэмнэлттэй байдаг. Өмнөх системтэй харьцуулахад үйлдвэрээс барилгын талбайд хүргэх хугацаа нь богино. Харин барилгын талбай дээрх угсралтын хувьд хугацаа их шаардах ба угсралт хийх болон хадгалах талбай шаардлагатай болдог. 
Эх сурвалж: Барилга.МН сэтгүүл

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.