Бидний мэдэх бас мэдэхгүй Орон сууц түрээслэх гэрээ

Бидний мэдэх бас мэдэхгүй Орон сууц түрээслэх гэрээ
      Barilga.mn сайт нь гишүүн байгууллагууддаа зориулж тогтмол үнэ төлбөргүй сургалт, семинар зохион байгуулдаг бөгөөд ээлжит сургалтыг аж ахуйн нэгжүүдийн хуулийн мэдлэг, энэ чиглэлийн тодруулах шаардлагатай асуудлуудад хариулт өгөх зорилгоор “Барилгын салбар-эрх зүйн орчин” сэдвээр өнөөдөр зохион байгуулагдлаа.

Сургалтаар Барилга, Хот Байгуулалтын Яамны Хуулийн хэлтсийн мэргэжилтэн Б.Амартүвшин барилгын салбарт Төрөөс хэрэгжүүлж буй хууль эрх зүйн баримт бичгийн талаарх мэдээллийг хүргэсэн бол өмгөөллийн “Барристер Кастос” ХХН-ийн захирал Б.Батжаргал Гэрээний тухай ойлголтыг өгч, оролцогчдын сонирхсон асуултуудад хариулт өглөө.


Сургалтын үеэр аж ахуйн нэгжүүдийн төлөөлөл олон чухал асуудлуудыг хөндөж, зөвлөгөө авч байсан бөгөөд түүнээс Гэрээний тухайд яригдсан асуудлыг онцлон хүргэж байна.


      Гэрээ боловсруулахад хамгийн чухал нь талуудын эрх үүрэг, гэрээний стандарт нөхцөлийг тодорхой тусгах ба үл хөдлөх хөрөнгөтэй холбоотой гэрээний харилцаа бол улсын бүртгэлд бүртгүүлэх явдал юм. Энэ тухайд ойлгомжтой байх үүднээс манай улсад дэлгэрсэн “Орон сууц түрээслэх” гэрээг жишээ болгоё.

Талууд түрээсийн гэрээгээ заавал Улсын бүртгэлийн ерөнхий газарт бүртгүүлэх ёстой бөгөөд хэрэв бүртгүүлээгүй тохиолдолд энэхүү гэрээ нь хүчингүйд тооцогдох юм. Энэ тохиолдолд түрээслэгч нь түрээслүүлэгчид /тухайн орон сууцанд/ хохирол учруулсан байлаа ч хуулийн дагуу заргалдахад хүндрэлтэй.

      Мөн түрээсийн гэрээний хугацаа дуусч, түрээслэгч нь байрыг хүлээлгэн өгөөгүй байхад түрээслүүлэгч нь дур мэдэн түрээслэгчийг эзгүйд цоожыг нээх, эвдэх нь хулгайд сэрдэгдэх эрсдэлтэй. Иймд зайлшгүй нэвтрэх шаардлагатай тохиолдолд гэрчтэй буюу хорооны цагдаа болон бусад этгээдтэй хамт орж, нотлох баримт бүхий видео бичлэг сэлтийг үйлдэх нь зүйтэй юм. 
Эх сурвалж: Барилга.мн

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.