Ахмад барилгачдадаа хүндэтгэл үзүүлж, залуу үедээ урам хайрласан БАРИЛГАЧДЫН БАЯР-ын өдөрлөгөөс

Ахмад барилгачдадаа хүндэтгэл үзүүлж, залуу үедээ урам хайрласан БАРИЛГАЧДЫН БАЯР-ын өдөрлөгөөс
  Эдүгээ цагийн барилгын үүсэл тэртээ 91 жилийн өмнөөс манай улсад тавигдаж, хөгжсөн түүхтэй. Шинэ цагийн бүтээн байгуулалтын эхлэлийг тавьсан тэрхүү тэмдэглэлт явдлыг жил бүр Барилгачдын баяртай хамтатган тэмдэглэдэг уламжлалтай билээ.

  Энэхүү баярыг өнөөдөр салбарын төрийн гол байгууллага Барилга Хот Байгуулалтын Яам, Барилгын Хөгжлийн Төв, Газар Зохион Байгуулалт Геодези Зураг зүйн газар, Төрийн бус мэргэжлийн байгууллагууд, барилга угсралт, үйлдвэрлэл болон зураг төслийн аж ахуйн нэгжүүд хамтран тэмдэглэж, үе үеийн ахмад инженерүүд, барилгачид, албан хаагчдадаа хүндэтгэл үзүүллээ.

  Өнөөдрийн арга хэмжээний гол зорилго нь барилгын салбарын төр ба хувийн хэвшлийн байгууллагууд, тэдгээрийн үйл ажиллагааны талаар иргэдэд тодорхой мэдээлэл өгөх явдал аж. Тийм ч учраас Барилгачдын талбайд Барилгачдын баярыг тэмдэглээд өнгөрөх бус, зорилтот хүмүүст нь хэрэгцээт мэдээллийг нь өгөх зорилгоор салбарын гол байгууллагууд, хувийн хэвшлийн зарим аж ахуйн нэгжүүдийг оролцуулсан тусгай асруудыг зассан байна.



Барилга, Хот Байгуулалтын Сайд Г.Мөнхбаяр, Өнөөдөр бид Барилгачдын баярын өдрөөрөө нийт барилгачид, бүтээн байгуулагчдынхаа хамтаар ард иргэдэд мэдээлэл өгөх, тэдэнд тулгамдаж буй асуудлуудыг шийдэхэд дэмжлэг үзүүлэх зорилгоор энэхүү өдөрлөгийг зохион байгуулж байна. Монгол Улсын Засгийн газар нь өнгөрсөн нэг жилийн хугацаанд цөөнгүй ажлыг хийж хэрэгжүүлсэн. Тухайлбал, манай барилгын салбарт технологийн асуудлууд, гэр хорооллын гадна шугам сүлжээний шийдлүүд, аймаг орон нутгийн цэвэрлэх байгууламжийн иж бүрэн шинэчлэл гэх мэт ажлуудыг хэрэгжүүллээ. Эдгээрээс хамгийн томоохон ажлыг онцолбол, Улаанбаатар хотын цэвэрлэх байгууламжийн усыг дахин боловсруулж, үйлдвэрт ашиглах ажлыг эхлүүлсэн явдал юм. Санхүүжилтийн эх үүсвэрийг АНУ-ын Мянганы сорилтын сангаас шийдэж чадлаа.

Цаашид хэрэгжүүлэх олон ажил байгаагаас эхний ээлжинд газар дээр нь явж танилцаж, барилгын салбарын хувийн хэвшлүүдийн үйл ажиллагаан дээр тулгуурлан гэр хорооллын бүст барилгажилтыг эрчимтэй үргэлжлүүлэх, тэнд гацсан асуудлуудыг шийдвэрлэх зэргийг онцолмоор байна.

Барилга барихад, ногоон байгууламж услахад, ер нь бүхий л салбарт ундны усыг ашигладаг байсныг зогсоож, бусад хотуудын жишигт нийцсэн шийдлүүдийг нэвтрүүлэх хэрэгтэй байна. Ингэхийн тулд цэвэрлэх байгууламжийн усыг дахин боловсруулж, ногоон байгууламж, цахилгаан станцуудын дотоод хэрэгцээ, машин угаалга зэрэгт ашиглахын зэрэгцээ шинээр баригдах орон сууцны хорооллуудын жорлонгийн усыг хангах юм. Технологийн иймэрхүү шийдлүүдийг цэвэрлэх байгууламжийн усаар шийдэх ажлыг хэрэгжүүлэх гэж байна.

Дараагийн чухал ажил бол амины орон сууцыг ипотекийн зээлд хамруулах, гэр хорооллын айл өрхүүд хашаандаа амины орон сууц барих боломжуудыг дэмжсэн төсөл рүү хөрөнгө оруулалтыг чиглүүлж, энэ ажлыг ямар шатлалаар хэрэгжүүлэх вэ гэдэг асуудлыг Засгийн газар шийдсэн. Энэ ажлыг нийслэлийн бүх дүүргүүдэд ижил түвшинд эхлүүлнэ. Гэр хорооллын бүст шугам сүлжээ, дэд бүтцээ шийдэж, түүнд тулгуурлан амины орон сууцнуудыг ипотекийн зээлд хамруулах ажлыг 2018 онд эхлүүлэх үндсийг тавьж байгаа юм.







  Энэ цаг мөчид Монгол Улсад зураг төслийн байгууллага үүсгэн байгуулагдсаны 91 жилийн ой, Барилгын зураг төсөл зохиогчдын холбооны 10 жилийн ойн өдөр мөн тохиож буй. Уг ойн баярын хүрээнд тус холбооныхон МҮЭСТО-д барилгын зураг төслийн компаниудын үйл ажиллагааг танилцуулсан Медиа үзэсгэлэн, баярын хурал зэргийг зохион байгуулж байгаа юм.

  Түүнчлэн баярын арга хэмжээний үеэр уламжлал ёсоор шилдэг аж ахуйн нэгж байгууллагуудыг шалгаруулж, салбарын шилдэг ажилтнуудыг шагнан урамшууллаа.

Барилгын салбарын шилдэг 10 аж ахуйн нэгж, байгууллагаар,
  • Барилга угсралтын оны шилдэг байгууллага - “Алтай констракшн” ХХК
  • Барилга угсралтын оны шилдэг байгууллага - “Түмэн Алт” ХХК
  • Барилга угсралтын оны шилдэг байгууллага - “Макс Өргөө” ХХК
  • Барилга угсралтын оны шилдэг байгууллага – “Монкон констракшн” ХХК
  • Хөдөлмөрийн аюулгүй байдал, эрүүл ахуйн шилдэг байгууллага – “Батс Өргөө” ХХК
  • Дэд бүтэц, инженерийн шугам сүлжээний шилдэг байгууллага - “Дэд бүтэц инженеринг” ХХК
  • Хот байгуулалтын баримт бичиг, инженер-геологи, барилга байгууламжийн зураг төслийн шилдэг байгууллага – “Эрчим төсөл” ХХК
  • Хот байгуулалтын баримт бичиг, инженер-геологи, барилга байгууламжийн зураг төслийн шилдэг байгууллага – “Татах хүч” ХХК
  • Хот байгуулалтын баримт бичиг, инженер-геологи, барилга байгууламжийн зураг төслийн шилдэг байгууллага – “Дулаан хөөс” ХХК
  • Барилгын материал үйлдвэрлэлийн шилдэг байгууллага – “Сика Монголиа” ХХК-ийг тус тус шалгаруулж, шагналыг гардууллаа.
Эх сурвалж:

Сэтгэгдэл (0)

АНХААРУУЛГА:Уншигчдын бичсэн сэтгэгдэлд barilga.mn хариуцлага хүлээхгүй болно.
Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.